ខេត្តកំពង់ស្ពឺ ៖ រថយន្តកែច្នៃបាកុងចំនួន៣គ្រឿង និងឈើហុប២កំណាត់ ដែលមានមុខកាត់ធំៗស្ទើរមួយម៉ែត្រ៤ជ្រុងរបស់ក្រុមឈ្មួញ ដែលយកមកលាក់ទុកក្នុងព្រៃ បន្ទាប់ពីយុទ្ធនាការបង្ក្រាបទូទាំងប្រទេសយ៉ាងក្តៅគគុករួចមកនោះ ក៏ប្រទះឃើញកាលពីរសៀលថ្ងៃទី៣ កញ្ញា នៅចំណុចក្រោយភូមិដំបងវេញ ឃុុំសង្កែសាទប ស្រុកឱរ៉ាល់ ។
បើតាមមន្ត្រីអាវុធហត្ថខេត្តឱ្យដឹងថា បន្ទាប់ពីធ្វើការរុករកក្នុងព្រៃនិងស្រាវជ្រាវយ៉ាងយកចិត្តទុកដាក់មកនោះ ក៏ប្រទះឃើញរថយន្តបាកុង(កែច្នៃដឹកឈើធំៗ) ក៏បានរាយការណ៍ទៅថ្នាក់លើហើយ លោក វ៉ី សំណាង អភិបាលខេត្ត និងជាប្រធានគណៈបញ្ជាការឯកភាពខេត្ត បានដឹកនាំកម្លាំងចម្រុះចុះបង្ក្រាបរថយន្តបាកុងចំនួន៣គ្រឿង និងរឹបអូសនូវឈើហ៊ុប២កំណាត់ធំមានមុខកាត់ធំ មិនក្រោម១០ម៉ែត្រគូបឡើយ ដោយអះអាងថា ឈ្មួុញឈើប្រព្រឹត្តបទល្មើសនៅខេត្តក្រចេះ បើកយកមកលាក់ទុកនៅក្នុងភូមិសាស្ត្រ ភូមិដំបងវិញ ឃុំត្រពាំងជោ ស្រុកឱរ៉ាល់ ខេត្តកំពង់ស្ពឺនេះ ។
បើតាមការឱ្យដឹងពីសមត្ថកិច្ចថា រថយន្តបាកុងទាំង៣គ្រឿងខាងលើនេះក្រោយពីមានបទបញ្ជាយ៉ាងក្តៅគគុកពីនាយឧត្តមសេនីយ៍សៅ សុខា ធ្វើការបង្ក្រាបទូទាំងប្រទេសដើម្បីទប់ស្កាត់បទល្មើសធនធានធម្មជាតិបំផ្លាញព្រៃឈើជាចំបងនោះ ក៏បើកយកមកលាក់នៅទីនេះ ។
កន្លងមក លោក វ៉ី សំណាង អភិបាលខេត្តកំពង់ស្ពឺមានប្រសាសន៍ថា ខេត្តកំពង់ស្ពឺ មិនមែនជាកន្លែងសម្រាប់ប្រព្រឹត្តបទល្មើសនិងលាក់ទុកមធ្យោបាយប្រព្រឹត្តបទល្មើសព្រៃឈើនោះឡើយ បង្ក្រាបទាល់តែអស់មិនថា ក្រុមឈ្មួញមានអំណាច ឬបុណ្យសក្តិប៉ុនណាឡើយ ។
គួរកត់សម្គាល់ថា នៅខេត្តកំពង់ស្ពឺពីអតីតកាលមានព្រៃឈើដ៏មហាសាល ប៉ុន្តែមានឈ្មួញឈើបំផ្លាញឈើនៅស្រុកឱរ៉ាល់ស្ទើរវាលទៅហើយ ។ ច្រើនឆ្នាំកន្លងមកល្បីខាងដឹកឈើចេញពីខេត្តទៅលក់នៅប្រទេសវៀតណាមតាមព្រំដែនខេត្តតាកែវ ។
រថយន្តបាកុងដឹកឈើរបស់ឈ្មួញក៏មានមិនតិចដែរ មិនដែលឃើញចាប់បានទេ ។ លុះចាប់បាន៣គ្រឿង ស្រាប់តែឆ្លើយថា ជារថយន្តគេចមកពីខេត្តក្រចេះ យកមកលាក់នៅខេត្តកំពង់ស្ពឺ ។ ការអះអាងបែបនេះ តើថ្នាក់លើជឿដែរអត់ ?
ចែករំលែកព័តមាននេះ