អ្នកស្រី Jennifer Spencer ដែលជាសហគ្រិនមួយរូបបានចែករំលែកថា ផលិតផលថ្មីៗលើទីផ្សារភាគច្រើនបរាជ័យព្រោះតែមូលហេតុសំខាន់ៗពីរ គឺព្រោះតែអតិថិជនមិនយល់ច្បាស់ពីផលិតផលរបស់អ្នក ឬព្រោះផលិតផលរបស់អ្នកមិនមានទីផ្សារ ។ ដូច្នេះដើម្បីចៀសវាងជួបការបរាជ័យ តើសហគ្រិនគួរតាមដានមើលមុខសញ្ញាអ្វី ? អ្នកស្រី Spencer ប្រាប់មកថា សហគ្រិនគួរតែមើលលើមុខសញ្ញាខាងក្រោមនេះ ៖
១. ការយល់ដឹងពីផលិតផលអ្នក ៖ មូលហេតុអ្វីបានជាអតិថិជនត្រូវទិញផលិតផលអ្នក? តើផលិតផលរបស់អ្នកអាចដោះស្រាយបញ្ហាអ្វី? តើនរណាជាអតិថិជនដែលអ្នកកំណត់? ប្រសិនបើអ្នកមិនអាចឆ្លើយសំណួរទាំងនេះទេ ប្រហែលជាមិនមាននរណាទិញផលិតផលអ្នកឡើយព្រោះអ្នកមិនអាចពន្យល់ប្រាប់អតិថិជនពីមូលហេតុដែលពួកគេត្រូវការផលិតផលនេះ ឬពីអ្វីដែលផលិតផលអ្នកដោះស្រាយ និងមូលហេតុដែលពួកគេគួរទិញពីអ្នក ។
២. ការផ្សព្វផ្សាយផលិតផល៖ អ្នកមិនអាចលក់ផលិតផលចេញបានច្រើនទេប្រសិនបើអ្នកមិនចេះពីយុទ្ធសាស្ត្រក្នុងការផ្សព្វផ្សាយផលិតផលរបស់អ្នក ។ ក្រៅពីដឹងពីអ្វីដែលអ្នកលក់ហើយ អ្នកត្រូវដឹងពីវិធីក្នុងការលក់វា ។ អ្វីដែលអ្នកគួរពិចារណាលើមានដូចជា ការណែនាំពីផលិតផល ចំណុចទាក់ទាញសំខាន់ និងអត្ថប្រយោជន៍ផ្សេងៗដែលអតិថិជនទទួលបានជាដើម ។
៣. មតិយោបល់អ្នកសាកល្បងផលិតផល៖ វិធីដែលល្អជាងគេក្នុងការដឹងពីភាពជោគជ័យរបស់ផលិតផលរបស់អ្នកគឺការសាកល្បងផលិតផល ។ មុននឹងដាក់លក់ផលិតផលលើទីផ្សារ អ្នកគួរតែសាកល្បងឲ្យមនុស្សមួយក្រុមសាកប្រើផលិតផលអ្នកជាមុនសិន រួចប្រមូលមតិយោបល់ដែលពួកគេមានដើម្បីយកមកពិចារណា និងកែសម្រួលផលិតផល ។
ប្រសិនបើអ្នកទទួលបានមតិយោបល់អវិជ្ជមានច្រើន នោះអ្នកគួរតែពិចារណាបោះបង់ចោលផលិតផលនេះទាំងស្រុង និងប្រើធនធានដើម្បីផ្តោតស្មារតីលើផលិតផលថ្មីដែលមានឱកាសជោគជ័យច្រើនជាងវិញ ៕ កែសម្រួលដោយ ៖ សុឃាក់
ចែករំលែកព័តមាននេះ