រាជធានីភ្នំពេញ ៖ នៅមុននេះ អតីតតារាសម្តែងអ្នកនាង ម៉ៅ សុចាន់ធី បានអះអាងថា នាងមានគំរោងមកលេងស្រុកកំណើតជាលើកដំបូងនៅក្នុងឱកាសបុណ្យចូលឆ្នាំខ្មែរ នាពេលខាងមុខនេះ បន្ទាប់ពីបានចាកចេញទៅរស់នៅលើទឹកដីអាមេរិកអស់ពេលជាង១០ឆ្នាំ ។ ប៉ុន្តែឱកាសជាន់ដីស្រុកខ្មែរម្តងទៀត របស់អ្នកនាង ម៉ៅ សុចាន់ធី ត្រូវបានលុបចោលវិញ ដោយសារតែជំងឺចាស់របស់នាងបានរើឡើងវិញ ហើយគ្រូពេទ្យតម្រូវមិនឱ្យអ្នកនាងចេញទៅណាឡើយ ដើម្បីពិនិត្យ និងព្យាបាល ។
ថ្លែងប្រាប់កោះសន្តិភាពតាមទូរស័ព្ទពីទឹកដីអាមេរិក កាលពីថ្ងៃទី១២ មីនា ២០១៤ នេះ អតីតតារាសម្តែងអ្នកនាង ម៉ៅ សុចាន់ធី បានឱ្យដឹងថា គំរោងមកលេងស្រុកខ្មែរជាលើកដំបូងរបស់នាងបានលុបចោលវិញហើយ ដោយសារតែជំងឺដែលនាងធ្លាប់ឈឺអស់ជាច្រើនឆ្នាំនោះបានរើឡើងវិញ ។ អ្នកនាងបញ្ជាក់ថា នាងមានជំងឺម្យ៉ាងស្រដៀងនឹងអ្នកនាង ស្វែង សុជាតា ហើយជំងឺមួយនេះបានធ្វើទុក្ខដល់រូបនាងតាំងពីមកដល់ទឹកដីអាមេរិកជាលើកដំបូងម៉្លេះ ។ ជំងឺនេះធ្លាប់បានធ្វើឱ្យនាងឈឺ រហូតដល់ជ្រុះសក់ ហើយសុខភាពរបស់នាងក៏មិនសូវល្អ ហើយឥឡូវវាបានរើឡើងវិញម្តងទៀត ទើបក្រុមគ្រូពេទ្យមិនអនុញ្ញាតឱ្យនាងចេញទៅណាឡើយ ដើម្បីពិនិត្យ និងតាមដានជំងឺមួយនេះថា តើត្រូវវះកាត់ ឬយ៉ាងណានោះ ។
ក្នុងដំណើរខកខានមិនបានមកលេងស្រុកកំណើតជាលើកដំបូងនេះ អ្នកនាង ម៉ៅ សុចាន់ធី បានសម្តែងការសោកស្តាយ ខណៈពេលគំរោងមួយចំនួនដែលបានត្រៀមនោះត្រូវលុបចោលវិញ ក្នុងពេលដែលសំបុត្រយន្តហោះក៏នាងបានកក់រួចរាល់ហើយដែរ ។
អ្នកនាងបញ្ជាក់ថា «ខ្ញុំសោកស្តាយមែនទែន ដែលមិនបានទៅតាមគំរោង ហើយខ្ញុំក៏សោកស្តាយណាស់ដែរ ចំពោះការងារសិល្បៈមួយចំនួនដែលគេបានត្រៀមទុកសម្រាប់រូបខ្ញុំក្នុងពេលដែលខ្ញុំមានវត្តមាននៅក្នុងស្រុកខ្មែរ» ។ អ្នកនាងបន្តថា «មានផលិតកម្មមួយបានទាក់ទងមកខ្ញុំ ហើយគេថា បានសរសេររឿងមួយ ដើម្បីទុកឱ្យរូបខ្ញុំសម្តែង ពេលដែលនាងខ្ញុំមកលេងស្រុក ប៉ុន្តែឥឡូវអ្វីៗត្រូវបានរលាយអស់ ដោយសារជំងឺមួយនេះ ។ ខ្ញុំសប្បាយចិត្តនៅពេលដែលមានគេទាក់ទងឱ្យខ្ញុំសម្តែងជាមួយ ព្រោះដូចដឹងស្រាប់ហើយ នាងខ្ញុំស្រលាញ់សិល្បៈខ្លាំងណាស់ បើទោះបីជាពេលនេះនាងខ្ញុំមករស់នៅស្រុកគេក៏ដោយ ប៉ុន្តែសិល្បៈខ្ញុំមិនដែលចោលឡើយ ។
ចែករំលែកព័តមាននេះ