រាជធានីភ្នំពេញ ៖ ខ្សែភាពយន្តខ្នាតធំរបស់ផលិតកម្មKHរឿង «លងម៉ាឆ្ងាញ់» បាន សម្ពោធចាក់បញ្ចាំងនៅរោងភាពយន្តលុច្ស ក្នុងរាជធានីភ្នំពេញកាលពីព្រឹកថ្ងៃទី៧ មីនា ឆ្នាំ២០១៤ ។ រឿងនេះមានការចូលរួមសម្តែងពីតារាជាច្រើនដូចជា នី មុន្នីនាថ, លី ច័ន្ទសីហា , មូល សុវណ្ណគិរី, ប៊ើរី , នេត ចរិយា , កែវ ប៉ូរ៉ា , អឹុម រិទ្ធី និងនាយឆើត ជាដើម ។
លោកសួស រ៉ែន អ្នកនិពន្ធប្រាប់កោះសន្តិភាពឱ្យដឹងថា រឿង «លងម៉ាឆ្ងាញ់» គឺជាស្នាដៃទី៣របស់លោកបន្ទាប់ពីទទួលបានជោគជ័យពីររឿងរួចមកហើយគឺរឿង «មិត្តភក្តិខ្ញុំលងញាក់សាច់ »និងរឿង «មន្តអាគមស្នេហ៍ខ្ទើយ » ។ សម្រាប់រឿង «លងម៉ាឆ្ងាញ់ » នេះ លោកបានចំណាយប្រាក់ជាង២ម៉ឺនដុល្លារ ហើយថតរយៈពេល៧ខែ និងកាត់តរយៈពេលជិតមួយឆ្នាំ ទើបចេញជាផ្លែផ្កា និងចាក់បញ្ចាំងនៅពេលនេះ ។
លោកសួស រ៉ែន បន្តទៀតថា នេះគឺជារឿងភាពយន្តបែបកំប្លែងរវាងខ្មោចនិងមនុស្ស ហើយធានាថាសើចតាំងពីដើមរហូតដល់ចប់ ពិសេសរឿងនេះក៏មានលាយឡំដោយមនោសញ្ចេតនាស្នេហារវាងកំលោះអ្នកក្រីក្រ និងកញ្ញាអ្នកទីក្រុង តែស្នេហាមួយនេះបែកបាក់ដោយសារតែតួចិត្តអាក្រក់មានចិត្តស្រឡាញ់នាងនោះ ហើយក៏ចាប់រំលោភ និងសម្លាប់ចោលឱ្យក្លាយទៅជាខ្មោចទឹកចងពៀរ លងគេពេញភូមិ ។ បន្ទាប់ពីចាក់បញ្ចាំងនៅរោងភាពយន្តលុច្ស ហើយនោះ រឿង«លងម៉ាឆ្ងាញ់» នឹងបន្តចាក់បញ្ចាំងនៅតាមបណ្តាខេត្តជាច្រើនទៀត ។
រឿង « លងម៉ាឆ្ងាញ់ » ជាស្នាដៃសម្តែងរបស់កញ្ញានី មុន្នីនាថ ដែលបានបន្សល់ទុកបន្ទាប់ពីនាងចេញទៅសម្តែងនៅសហរដ្ឋអាេមរិក ហើយមិនទាន់ដឹងថានឹងវិលត្រឡប់មកវិញពេលណាទេ ៕
ចែករំលែកព័តមាននេះ