អង្គការសហប្រជាជាតិធ្លាប់ចេញរបាយការណ៍មួយដែលប្រាប់មកថា បម្រែបម្រួលបរិយាកាសកំពុងតែប៉ះពាល់ដល់ការផ្គត់ផ្គង់អាហារយ៉ាងធ្ងន់ធ្ងរ ខណៈដែលគណៈកម្មាធិការមួយក្រោមអង្គការសហប្រជាជាតិបានប្រទះឃើញថា មនុស្សលោកមានរយៈពេលតែ១២ឆ្នាំប៉ុណ្ណោះ ក្នុងការកាត់បន្ថយការបញ្ចេញឧស្ម័នជាតិពុល ដើម្បីធានាបរិស្ថានដែលមានសុវត្ថិភាព និងចីរភាពសម្រាប់រស់នៅ ។ ជាមួយគ្នានេះផងដែរព្រៃអាម៉ាហ្សូនដែលជាកន្លែងផលិតឧស្ម័នអុកស៊ីសែនដ៏ធំមួយរបស់ពិភពលោកកំពុងតែមានការឆាបឆេះដែលកាន់តែពន្លឿនបម្រែបម្រួលបរិយាកាសទៅទៀត ។
ទាំងនេះប្រហែលជាព័ត៌មានដែលអ្នកអានប៉ះលើប្រព័ន្ធសង្គមរបស់អ្នក ឬឮពីអ្នកដទៃពីមាត់មួយទៅមាត់មួយជាដើម ។ ដោយហេតុដូច្នេះ មនុស្សជាច្រើនបានអស់សង្ឃឹមនឹងអនាគត ដែលធ្វើឲ្យពួកគេធ្វើការសម្រេចចិត្តដោយមិនគិតគូរបានវែងឆ្ងាយ និងអាចប៉ះពាល់ដល់ស្ថានការហិរញ្ញវត្ថុរបស់ពួកគេជាដើម ។ ប៉ុន្តែអ្នកស្រី Amy Zalman ដែលជានាយកប្រតិបត្តិ និងស្ថាបនិករបស់ក្រុមហ៊ុនប្រឹក្សាយោបល់ Prescient បានឲ្យដឹងថា មនុស្សតែងតែផ្តោតស្មារតីលើរឿងអវិជ្ជមានដែលនឹងកើតឡើង ប៉ុន្តែពួកគេគួរតែត្រៀមខ្លួនសម្រាប់ហេតុការណ៍ទាំងល្អទាំងអាក្រក់ទៅវិញ ។ អ្នកស្រីបានបន្តថា មនុស្សលោកត្រូវតែគិតពីពិភពលោក ដែលពួកគេចង់រស់នៅ រួចចេញសកម្មភាព ដើម្បីធ្វើឲ្យវាក្លាយជាការពិត ។ គ្រាន់តែគិតសុទិដ្ឋិនិយម គឺមិនគ្រប់គ្រាន់ទេ ហើយមនុស្សគួរតែមានរឿងនិទានមួយទាក់ទងនឹងពិភពលោក នៅថ្ងៃអនាគតដែលពួកគេចង់រស់នៅ ។
លោក Daniel Swain ដែលជាអ្នកវិទ្យាសាស្ត្រផ្នែកបរិយាកាសនៅ UCLA បានប្រាប់មកថា ស្ថានការនាពេលបច្ចុប្បន្ននេះគឺមានសភាពធ្ងន់ធ្ងរ ប៉ុន្តែវាមិនទាន់ជាទីបញ្ចប់នៃពិភពលោកទេ ។ មនុស្សរាប់លាននាក់នឹងទទួលរងការប៉ះពាល់ ហើយពួកគេនឹងត្រូវការលុយដើម្បីផ្លាស់ប្តូរលំនៅដ្ឋាន ឬទប់ទប់នឹងគ្រោះទាំងឡាយដែលបង្កឡើងដោយបម្រែបម្រួលបរិយាកាសនេះ ។
ដូច្នេះជំនាញទាំងនេះផ្តល់យោបល់ឲ្យអ្នកចាប់ផ្តើមត្រៀមខ្លួនដោយធ្វើការវិនិយោគ ជាពិសេសលើក្រុមហ៊ុនដែលមានគោលដៅក្នុងការជួយដល់ពិភពលោក ឬបង្កើតពិភពលោកមួយដែលអ្នកចង់រស់នៅ ។ ប្រាកដណាស់ ពេលដែលវិនិយោគលើក្រុមហ៊ុនទាំងនេះ អ្នកត្រូវយល់ដឹងថា វាមិនអាចរកប្រាក់ចំណេញឲ្យអ្នកមកវិញច្រើនទេ ហើយពេលខ្លះវាក៏មិនច្បាស់លាស់ថាក្រុមហ៊ុនទាំងនេះពិតជាអាចបង្កើតចេញលទ្ធផលដែលជួយដល់ពិភពលោកមែន ឬអត់ដែរ ។ ប៉ុន្តែលោក Swain បានកត់សម្គាល់ថា វាបង្ហាញជាសញ្ញាមួយដល់ពិភពលោកថា វាជាការចូលរួមមួយដែលវិនិយោគិនអាចធ្វើដើម្បីជួយដល់ពិភពលោកបាន ។ លោកបានបន្ថែមថា «ខ្ញុំសុទិដ្និនិយមពីអនាគត ដូច្នេះខ្ញុំត្រូវតែសន្សំលុយឲ្យបានច្រើន» ៕ កែសម្រួលដោយ ៖ សុឃាក់
ចែករំលែកព័តមាននេះ