ខេត្តស្ទឹងត្រែង ៖ ពោតបារាំងជាប្រភេទបន្លែមួយមុខដែលបច្ចុប្បន្នគេនិយមជ្រើសយកទៅទទួលទានដោយសារតែបន្លែពណ៌បៃតងនេះសម្បូរទៅដោយវីតាមីនល្អសម្រាប់សុខភាព ។ ជាក់ស្តែងកសិករម្នាក់នៅខេត្តស្ទឹងត្រែងបានសម្រេចចិត្តជ្រើសដាំដំណាំពោតបារាំងសាកល្បងរហូតទទួលបានជោគជ័យ ។ កសិកររូបនោះបានទម្លាយពីការពិតនៃការបង្កបង្កើនផលជោគជ័យលើដំណាំពោតបារាំងនេះថា ខ្លួនពុំមានបច្ចេកទេស ឬអ្នកជំនាញបង្ហាត់បង្ហាញឡើយ តែការដាំសាកល្បងរហូតទទួលបានផ្លែផ្កានេះដោយសារឃើញគេបង្ហោះពីបច្ចេកទេសដាំបន្លែប្រភេទនេះ តាមបណ្តាញសង្គមហ្វេសប៊ុក ហើយខ្លួនអនុវត្តតាមប៉ុណ្ណោះ ។
លោក តុ អិនប៉ កសិករនៅភូមិហាងខូបាន សង្កាត់សាមគ្គី ក្រុងខេត្តស្ទឹងត្រែងបានប្រាប់ថាសព្វថ្ងៃ លោកប្រកបរបរដាំដុះបន្លែជីគ្រប់ មុខ ដើម្បីទ្រទ្រង់ជីវភាពគ្រួសារ ហើយមួយរយៈចុងក្រោយនេះលោកបានដាំពោតបារាំងបន្ថែមមួយមុខទៀតបន្ទាប់ពីឃើញពីរបៀបដាំដុះដំណាំប្រភេទនេះតាមហ្វេសប៊ុកធ្វើឲ្យលោកចាប់អារម្មណ៍ក៏ចាប់ផ្តើមសាកល្បងដាំ ហើយទទួលបានលទ្ធផលល្អជាបន្តបន្ទាប់ ។ លោកបន្តថា នៅថ្ងៃខាងមុខលោកនឹងបង្កើនការដាំពោតបារាំងនេះបន្ថែមទៀតពីព្រោះបន្លែជីគ្រប់មុខ ដែលលោកបានដាំអស់រយៈពេលជិត១០ឆ្នាំមកហើយ ឥឡូវអ្នកភូមិនាំគ្នាសម្រុកដាំច្រើន បណ្តាលឲ្យតម្លៃមានការធ្លាក់ចុះ ។ ប៉ុន្តែពោតបារាំងវិញស្រួលដាំ និងងាយស្រួលថែរក្សា ចំណែកតម្លៃក៏បានសមរម្យ ដោយនៅលើទីផ្សារលោកអាចលក់ចេញបានតម្លៃចន្លោះពី៧០០០ ទៅ៨០០០រៀល ក្នុងមួយគីឡូ ក្រាមនៅរដូវប្រាំង រីឯនៅរដូវវស្សាវិញអាចលក់បានតែ៣០០០រៀលប៉ុណ្ណោះ ។
ដោយឡែកសម្រាប់បច្ចេកទេសដាំដុះ និងវិធីដោះស្រាយបញ្ហាប្រឈមចំពោះដំណាំពោតបារាំងវិញកសិកររូបនេះបានរៀបរាប់ថា ដើម្បីធ្វើឲ្យដំណាំពោតបារាំងដុះលូតលាស់បានល្អ និងមានទិន្នផលខ្ពស់មុនដាំយើងត្រូវភ្ជូរដីឲ្យបានផុស និងសព្វល្អ រួចបណ្តុះកូនពោតបារាំងឲ្យបានប្រវែងជិត២តឹកសិនសឹមយកទៅដាក់ដាំ ។ លោកថា ដំណាំនេះមិនមានបញ្ហាប្រឈមធ្ងន់ធ្ងរដូចដំណាំផ្សេងៗទេ ហើយបើមានក៏មានតិចតួចដែរ ដូចជា សត្វស្រមោចរោមតាមគល់ និងដើមដែលបណ្តាលឲ្យស្លឹក និងផ្លែពោតបារាំងរួញតែបញ្ហានេះយើងអាចដោះស្រាយបានដោយប្រើទឹកសាប៊ូ បាញ់សម្លាប់សត្វល្អិតទាំងនោះ ។
កសិកររូបនេះ បានណែនាំឲ្យប្រជាពលរដ្ឋ ក៏ដូចជាយុវជន ពុំទាន់មានការងារធ្វើគួរងាកមកធ្វើ ការដាំដុះបន្លែបង្ការ ជាពិសេសដំណាំពោតបារាំងនេះតែម្តង ព្រោះវាងាយស្រួលដាំ ហើយលោកនឹងជួយបង្ហាត់បង្រៀនពីវិធីដាំដុះ ដោយមិនយកប្រាក់កម្រៃនោះឡើយ ៕ កែសម្រួលដោយ ៖ សុឃាក់
ចែករំលែកព័តមាននេះ