រាជធានីភ្នំពេញ ៖ តំណាងភាគីកម្ពុជា- វៀតណាម- ឡាវ បានប្តេជ្ញា កសាង និងអភិវឌ្ឍតំបន់ព្រំដែននៃប្រទេសទាំងបីឱ្យក្លាយជាព្រំដែនមួយប្រកបដោយសន្តិភាព ស្ថិរភាព សន្តិសុខ មិត្តភាព និងវឌ្ឍនភាពជានិរន្តរ៍ ។ ការប្តេជ្ញារក្រោយពីបានដំណើរការពេញ១ថ្ងៃកិច្ចប្រជុំលើកទី៤ រវាងគណៈកម្ម ការការពារជាតិ និងសន្តិសុខនៃរដ្ឋសភាកម្ពុជា ឡាវ វៀតណាម ស្តីពី «តួនាទីភារកិច្ចក្នុងការពិនិត្យតាមដានរបស់គណៈកម្មការ គណៈកម្មាធិការនៃរដ្ឋសភាប្រទេសទាំងបី ក្នុងការកសាងសហប្រតិបត្តិការ និងការអភិវឌ្ឍព្រំដែនមួយប្រកបដោយសន្តិភាព និងមិត្តភាព» បានបិទបញ្ចប់ប្រកបដោយជោគជ័យ នៅល្ងាចថ្ងៃទី២៧ ខែសីហានេះ ។
ថ្លែងបិទកិច្ចប្រជុំនៅឯសណ្ឋាគារសុខាភ្នំពេញ លោកហ៊ុន ណេង ប្រធានគណៈកម្មការមហាផ្ទៃ ការពារជាតិ និងមុខងារសាធារណៈនៃរដ្ឋសភានៃព្រះរាជាណាចក្រកម្ពុជាបានមានប្រសាសន៍អបអរសាទរចំពោះលទ្ធផលដែលកិច្ចប្រជុំលើកទី៤ រវាងគណៈកម្មការជំនាញទទួលបន្ទុកកិច្ចការការពារជាតិ និងសន្តិសុខ របស់រដ្ឋសភានៃប្រទេសទាំងបីសម្រេចបានពេលនេះ ។ លោកបន្តថា សមិទ្ធផលដ៏មានតម្លៃនេះឆ្លុះបញ្ជាំងពីការយកចិត្តទុកដាក់ ប្រកបដោយស្មារតីទទួលខុសត្រូវខ្ពស់របស់គណៈកម្មការនៃប្រទេសទាំង៣ ក្នុងការធានា និងថែរក្សាឱ្យបាននូវសុខសន្តិភាព ស្ថិរភាព និងសណ្តាប់ធ្នាប់ ក្នុងការកសាង និងអភិវឌ្ឍប្រទេស ឱ្យមានភាពរីកចម្រើនជឿនលឿន និងសុខដុមរមនា ជាពិសេសការកសាងព្រំដែននៃប្រទេសទាំងបីក្លាយជាព្រំដែនមិត្តភាព សន្តិភាព និងកិច្ចសហប្រតិបត្តិការអភិវឌ្ឍ ។
លោក ហ៊ុន ណេង បានបន្ថែមថា កិច្ចសហប្រតិបត្តិការលើវិស័យការពារជាតិ និងសន្តិសុខ បានរួមចំណែកទប់ស្កាត់ និងបង្ក្រាបបាននូវបទល្មើសព្រហ្មទណ្ឌឧក្រិដ្ឋកម្មឆ្លងដែនការជួញដូរគ្រឿងញៀន ការជួញដូរមនុស្ស ការលាងលុយកខ្វក់ ការរត់ពន្ធ និងបទល្មើសឆ្លងដែនផ្សេងៗ ។ វឌ្ឍនភាពនេះកំពុងតែផ្តល់នូវភាពសុខដុមរមនាដល់ការរស់នៅរបស់ប្រជាពលរដ្ឋឆ្លើយតបនឹងបំណងប្រាថ្នារបស់ប្រជាពលរដ្ឋនៃប្រទេសទាំងបី ។
ជាមួយគ្នានោះដែរ ប្រធានគណៈកម្មការក៏បានធ្វើការកត់សម្គាល់នូវបញ្ហាប្រឈមមួយចំនួនដូចជា គម្លាតនៃការអភិវឌ្ឍតាមតំបន់ព្រំដែននៃប្រទេសទាំងបី ការខ្វះខាតហេដ្ឋារចនាសម្ព័ន្ធ ការថែទាំសុខភាពបឋម និងអនាម័យ ការផ្គត់ផ្គង់ទឹកស្អាត ថាមពលអគ្គិសនី អប់រំ និងកិច្ចសហការចែករំលែកព័ត៌មានឲ្យគ្នាទៅវិញទៅមកមិនឆ្លើយតបទាន់ពេលវេលា ការផ្សព្វផ្សាយលិខិតបទដ្ឋានគតិយុត្ត ឬគោលនយោបាយរបស់រដ្ឋាភិបាលនៅមិនទាន់ទូលំទូលាយគួបផ្សំនឹងនិន្នាការតំបន់ក៏ដូចពិភពលោក កំពុងតែជួបប្រឈមនឹងវិបត្តិស្មុគស្មាញ និងហានិភ័យច្រើនផងនោះបានធ្វើឲ្យមានក្តីបារម្ភពីសន្តិភាព ស្ថិរភាព និងសន្តិសុខ អាចរងការគំរាមកំហែង ដែលអាចបង្អាក់ការអភិវឌ្ឍ និងបំផ្លាញសមិទ្ធផលដែលសម្រេចបានក្នុងរយៈពេលកន្លងមកក៏ដូចជា ការបន្ថយសក្តានុពលសម្រាប់ការអភិវឌ្ឍក្នុងពេលអនាគតផងដែរ ៕ កែសម្រួលដោយ ៖ សុឃាក់
ចែករំលែកព័តមាននេះ