ខេត្តបាត់ដំបង ៖ គិតត្រឹមដំណាច់ខែមិថុនា ឆ្នាំ២០១៩ ទំហំប្រាក់កម្ចីសរុបមានចំនួនជាង ២៥,៩២ ទ្រីលានរៀលគិតជាដុល្លាមានប្រមាណ ៦,៣៧ ប៊ីលានដុល្លារអាមេរិក ដែលបានផ្តល់ឲ្យអតិថិជនខ្ចីជិត ១,៩៩ លាននាក់ ក្នុងនោះសម្រាប់ប្រាក់បញ្ញើវិញមានប្រមាណ ១៣,៧៦ ទ្រីលានរៀលគិតជាប្រាក់ដុល្លាមានប្រមាណ ៣,៣៨ ប៊ីលានដុល្លារអាមេរិក ដែលទទួលបានពីអ្នកដាក់ប្រាក់បញ្ញើជាង ២,៥២ លាន នាក់ ។
ទំហំប្រាក់កម្ចីនិងបញ្ញើដ៏ច្រើននេះត្រូវបានលោក រ័ត្ន សុវណ្ណនរៈ អគ្គនាយកត្រួតពិនិត្យធនាគារជាតិនៃកម្ពុជាបញ្ជាក់ឲ្យដឹងនៅក្នុងសិក្ខាសាលាផ្សព្វផ្សាយ ស្តីពី វិស័យមីក្រូហិរញ្ញវត្ថុនៅកម្ពុជាដែលរៀបចំធ្វើនៅស្រុកសង្កែខេត្តបាត់ដំបងនាថ្ងៃទី២៧ ខែសីហា ឆ្នាំ២០១៩ ។
លោក រ័ត្ន សុវណ្ណនរៈបានឲ្យដឹងដែរថា វិស័យធនាគារដែលមានតួនាទីជាអ្នកកៀងគរមូលធន គាំទ្រដល់ការអភិវឌ្ឍសេដ្ឋកិច្ចជាតិឲ្យមានការរីកចម្រើនទាំងវិសាលភាព និងទំហំប្រតិបត្តិការ ហើយក្នុងនោះវិស័យមីក្រូហិរញ្ញវត្ថុ ក៏បានរួមចំណែកយ៉ាងសកម្មក្នុងការលើកកម្ពស់ជីវភាពប្រជាពលរដ្ឋ តាមរយៈការបង្កើនលទ្ធភាពទទួលបានសេវាហិរញ្ញវត្ថុ ដូចជាការផ្តល់សេវាឥណទាន និងការសន្សំ ជាពិសេសគឺបានផ្ដល់ទៅដល់ទីជនបទដាច់ស្រយាល ។
ហើយការទទួលបានសេវាហិរញ្ញវត្ថុដែលមានតម្លៃសមរម្យ វិញក៏នឹងជួយឲ្យប្រជាជនដែលមានចំណូលទាបអាចគ្រប់គ្រងហិរញ្ញវត្ថុរបស់ខ្លួនបានប្រសើរជាងមុន និងបង្កើនផលវិជ្ជមានដល់សេដ្ឋកិច្ច និងរួមចំណែកកាត់បន្ថយភាពក្រីក្រផងដែរ ។
សូមរលឹកថា វិស័យមីក្រូហិរញ្ញវត្ថុនៅកម្ពុជា ត្រូវបានកកើតឡើងចាប់ពីទសវត្សរ៍ឆ្នាំ១៩៨០ ហើយបានវិវត្តខ្លាំងនាដើមទសវត្សរ៍ឆ្នាំ១៩៩០ដោយបានធ្វើសកម្មភាពផ្តល់ប្រាក់កម្ចីខ្នាតតូចដល់ប្រជាជននៅតាមតំបន់ជនបទ ក្នុងគោលបំណងផ្តល់ឲ្យប្រជាជនទាំងនោះនូវដើមទុនសម្រាប់ការបង្កើត ឬបង្កើនមុខរបរអាជីវកម្មរបស់ខ្លួន។
សិក្ខាសាលានេះក៏បានផ្ដល់ឱកាសដល់អ្នកចូលរួមបានបង្ហាញពីក្ដីកង្វល់លើបញ្ហានៃការប្រើប្រាស់សេវាពីបណ្ដាគ្រឹះស្ថានមីក្រូហិរញ្ញវត្ថុក្នុងមូលដ្ឋានខ្លួនផងដែរដើម្បីរួមគ្នាធ្វើឲ្យវិស័យមួយនេះមានសកម្មភាពល្អកាន់តែរឹងមាំនិងគេចផុតពីហានិភ័យផ្សេងៗ ។
ចំណែកលោក ស៊ុំ សន្និសិទ្ធ ទេសាភិបាលរងធនាគារជាតិនៃកម្ពុជាដែលអញ្ជើញជាអធិបតីភាពក្នុងសិក្ខាសាកានេះបានបញ្ជាក់ថា គ្រឹះស្ថានធនាគារ និងគ្រឹះស្ថានមីក្រូហិរញ្ញវត្ថុទាំងអស់ គឺមានតួនាទីគោរពតាមច្បាប់ និងបទប្បញ្ញត្តិដែលមានជាធរមាន និងគោលការណ៍នៃកិច្ចការពារអតិថិជន ព្រមទាំងត្រូវមានការប្រុងប្រយ័ត្នក្នុងប្រតិបត្តិការឥណទានរបស់ខ្លួន ។ ជារួមគ្រឹះស្ថានទាំងអស់គឺ ជាគ្រឹះស្ថានឯកជន ស្វែងរកប្រាក់ចំណេញ ដើម្បីនិរន្តរភាពហិរញ្ញវត្ថុរបស់ខ្លួន ក្នុងការបន្តផ្តល់ប្រាក់កម្ចីជូនប្រជាពលរដ្ឋ ។
ដូច្នេះហើយ ប្រជាពលរដ្ឋដែលខ្ចីប្រាក់ពីគ្រឹះស្ថានធនាគារ និងមីក្រូហិរញ្ញវត្ថុណាមួយ ត្រូវតែមានកាតព្វកិច្ចសងប្រាក់កម្ចីឲ្យគ្រឹះស្ថាននោះវិញ។ ជារួមប្រព័ន្ធហិរញ្ញវត្ថុមួយកាន់តែមានភាពរឹងមាំទៅបានគឺ នៅពេលដែលអ្នកខ្ចី និងអ្នកឱ្យខ្ចីរួមគ្នាក្នុងការការពារខ្លួនពីបញ្ហាទាក់ទងនឹងសេវាមីក្រូហិរញ្ញវត្ថុ តាមរយៈការអនុវត្ត ឬធ្វើការសម្រេចចិត្តដោយប្រុងប្រយ័ត្ន ដូចពាក្យស្លោកមួយឃ្លាបានពោលថា «ការពារគ្នារក្សាគ្នាទើបមាននិរន្តរភាពយូរអង្វែង» ។
ជាមួយនេះដែរលោក ស៊ុំ សន្និសិទ្ធ បានជម្រុញឲ្យអ្នកពាក់ព័ន្ធត្រូវមានកិច្ចសហការនិងខិតខំប្រឹងប្រែងអភិវឌ្ឍវិស័យមីក្រូហិរញ្ញវត្ថុក្នុងដែនដីខេត្តឲ្យមានការរីកចម្រើនជាបន្តបន្ទាប់ ទៀតដើម្បីរួមចំណែកកាត់បន្ថយភាពក្រីក្ររបស់ប្រជាពលរដ្ឋ ។ ទន្ទឹមនឹងនេះដែរក៏ត្រូវបន្តទប់ស្កាត់ឲ្យបានរាល់សកម្មភាពដើរបោកប្រាស់របស់ជនខិលខូលដែលចងការឬឲ្យខ្ចីប្រាក់ក្រៅប្រព័ន្ធដែលគ្មានច្បាប់ឲ្យបានផងដែរ ៕
កែសម្រួលដោយ ៖ សំណាង
ចែករំលែកព័តមាននេះ