រាជធានីភ្នំពេញ ៖ ដោយមើលឃើញការយកដងផ្លូវដាក់តាំងលក់ដូរយ៉ាងអនាធិបតេយ្យ ជុំវិញផ្សារកណ្តាល គឺផ្លូវលេខ១៤៤ ១៤៨ ១៣ និងផ្លូវលេខ១៥៤ តាំងពីទសវត្សទី៩០មកម្ល៉េះ ហើយបណ្តាលឲ្យប្រជាពលរដ្ឋធ្វើដំណើរឆ្លងកាត់មានការលំបាកនិងកកស្ទះជាខ្លាំង…
រាជធានីភ្នំពេញ ៖ ដោយមើលឃើញការយកដងផ្លូវដាក់តាំងលក់ដូរយ៉ាងអនាធិបតេយ្យ ជុំវិញផ្សារកណ្តាល គឺផ្លូវលេខ១៤៤ ១៤៨ ១៣ និងផ្លូវលេខ១៥៤ តាំងពីទសវត្សទី៩០មកម្ល៉េះ ហើយបណ្តាលឲ្យប្រជាពលរដ្ឋធ្វើដំណើរឆ្លងកាត់មានការលំបាកនិងកកស្ទះជាខ្លាំង ។ ដោយមានការឯកភាពពីសាលារាជធានីភ្នំពេញ គណៈបញ្ជាការឯកភាពខណ្ឌដូនពេញ បានបើកយុទ្ធនាការផ្សព្វផ្សាយសុំឲ្យអាជីវករលក់ដូរលើដងផ្លូវខាងលើចាប់ពីម៉ោង០៦ព្រឹក ដល់ម៉ោង១២ថ្ងៃត្រង់ ហើយចាប់ពីម៉ោង១២ថ្ងៃត្រង់ដល់យប់មិនអនុញ្ញាតឱ្យលក់ដូរជាដាច់ខាត ។
លោកសុខ ពេញវុធ អភិបាលខណ្ឌដូនពេញបានមានប្រសាសន៍ថា រដ្ឋបាលខណ្ឌដូនពេញ ប្តេជ្ញាបន្តរៀបចំកំណាត់ផ្លូវលេខ១៤៨ និងផ្លូវមួយចំនួនទៀត ជុំវិញទីរួមផ្សារកណ្ដាល ឲ្យបានល្អប្រសើរឡើង ចាប់តាំងពីទស្សវត្សទី៩០ មកដល់បច្ចុប្បន្ន បងប្អូនអាជីវករនៅផ្សារកណ្តាល នៅតែបន្តយកចំណីផ្លូវទាំងមូល នៃកំណាត់ផ្លូវលេខ១៤៨ ផ្លូវលេខ៥ និងផ្លូវលេខ១១ ជុំវិញផ្សារ ដើម្បីដាក់គ្រែចល័ត កញ្ច្រែង ល្អីលក់ដូរដោយបិទផ្លូវទាំងមូល ២៤/២៤ម៉ោង មិនអាចឲ្យយានយន្តគ្រប់ប្រភេទធ្វើដំណើរឆ្លងកាត់បានឡើយ ។
យោងតាមសារាចរលេខ០១៣/១៨សណន ចុះថ្ងៃទី០៧ ខែធ្នូ ឆ្នាំ២០១៨ របស់រដ្ឋបាលរាជធានីភ្នំពេញ ស្តីពីការរៀបចំសណ្តាប់ធ្នាប់តាមដងផ្លូវ និងការប្រើប្រាស់ចិញ្ចើមផ្លូវសាធារណៈទាំងអស់ក្នុងភូមិសាស្ត្ររាជធានីភ្នំពេញ បានធ្វើការរៀបចំឲ្យបងប្អូនអាជីវករលក់ដូរនៅលើផ្លូវលេខ១៤៨.១៤៤.១៥៤និងផ្លូវលេខ១៩ ពីលក់ដូរ ២៤/២៤ម៉ោង មកលក់ដូរត្រឹម ១២ម៉ោងវិញ ពោលគឺអនុញ្ញាតឲ្យមានការលក់ដូរចាប់ពីព្រឹក រហូតដល់ម៉ោង ១២,០០នាទីថ្ងៃត្រង់ បន្ទាប់មក សល់រយៈពេល ១២ម៉ោងទៀត កម្លាំងយើងធ្វើការប្រមូល ដឹកជញ្ជូនសំរាម បាញ់លាងសម្អាតលើផ្លូវនេះរួច នៅម៉ោង ១៤,០០នាទីតទៅ បើកឲ្យយានយន្តគ្រប់ប្រភេទធ្វើចរាចរណ៍បាន ។
លោកអភិបាលខណ្ឌដូនពេញបានបញ្ជាក់ថា ៖ កិច្ចការចំពោះមុខ រដ្ឋបាលខណ្ឌនឹងបន្តរៀបចំកំណាត់ផ្លូវលេខ១៤៨ ដោយចាក់បេតុងឆ្អឹងដែកចាប់ពីផ្លូវលេខ៥ ដល់ផ្លូវលេខ១៣ ឲ្យបានស្អាតឡើងវិញ ក្នុងនោះ រដ្ឋបាលខណ្ឌ រៀបចំឲ្យបងប្អូនអាជីវករផ្លាស់ប្តូរទីតាំងលក់ដូរនៅលើកំណាត់ផ្លូវនេះទាំងស្រុង រួចអនុញ្ញាតឲ្យបងប្អូនទៅលក់ដូរនៅលើផ្លូវលេខ១៤៤ ចាប់ពីផ្លូវលេខ៥ ដល់ផ្លូវលេខ១៣ វិញ ហើយអនុញ្ញាតឲ្យលក់ដូររយៈពេល ១២ម៉ោង គឺលក់ដូរដូចផ្លូវលេខ១៤៨ បច្ចុប្បន្ន ដោយអនុវត្តតាមស្មារតីអង្គប្រជុំរបស់រដ្ឋបាលរាជធានីភ្នំពេញ ។
ស្ត្រីម្នាក់លក់សាច់គោលើកំណាត់ផ្លូវលេខ១៤៨និយាយក្នុងន័យសុំមិនឲ្យថតរូបនិងបង្ហាញឈ្មោះបានឲ្យដឹងថា ៖ អ្នកស្រីបានប្រកបមុខរបលក់សាច់គោលើកំណាត់ផ្លូវលេខ១៤៨អស់ពេលជាង១០ឆ្នាំមកហើយដោយមិនខ្វល់ការកកស្ទះចរាចរណ៍នោះទេកាលណោះសាលាខណ្ឌដូនពេញមិនបានហាមឃាត់អ្វីឡើយ ។
ពេលសាលាខណ្ឌដូនពេញបានចេញគោលការមិនអនុញ្ញាតឲ្យលក់២៤ម៉ោងឡើយតែអនុញ្ញាតឲ្យលក់ចាប់ពីព្រឹកដល់ម៉ោង១២ថ្ងៃត្រង់ ហើយចាប់ម៉ោង១២ថ្ងៃត្រង់ដល់យប់មិនឲ្យលក់ទេទុកផ្លូវនេះស្រាប់ការធ្វើចរាចរណ៍គ្រប់ប្រភេទ ។ គោលការណ៍នេះអ្នកស្រីមិនមានការប្រឆាំងអ្វីឡើយ វាជាចូលរួមអភិវឌ្ឍន៍រាជធានីភ្នំពេញផងដែរ ជាពិសេសអភិវឌ្ឍន៍ខណ្ឌដូនពេញដែលជាខណ្ឌមួយនៅចំកណ្តាលបេះដូងរាជធានីភ្នំពេញតែម្តង ។ (សម្រួលដោយ៖ ស្រីណា)
ចែករំលែកព័តមាននេះ