ខេត្តពោធិ៍សាត់ ៖ ស្ពានដែកបេឡេមួយកន្លែងស្ថិតនៅភូមិឆាយលូក ឃុំអូរសោម ស្រុកវាលវែង ខេត្តពោធិ៍សាត់ បានបាក់ផុង បណ្តាលឱ្យផ្ដាច់ការធ្វើចរាចរណ៍ ដោយសារតែរថយន្ដដឹកថ្មរបស់ក្រុមហ៊ុនចិនបើកឆ្លងកាត់កាលពីល្ងាចថ្ងៃទី២៥ ខែសីហា…
ខេត្តពោធិ៍សាត់ ៖ ស្ពានដែកបេឡេមួយកន្លែងស្ថិតនៅភូមិឆាយលូក ឃុំអូរសោម ស្រុកវាលវែង ខេត្តពោធិ៍សាត់ បានបាក់ផុង បណ្តាលឱ្យផ្ដាច់ការធ្វើចរាចរណ៍ ដោយសារតែរថយន្ដដឹកថ្មរបស់ក្រុមហ៊ុនចិនបើកឆ្លងកាត់កាលពីល្ងាចថ្ងៃទី២៥ ខែសីហា ឆ្នាំ២០១៩។
ស្ពានខាងលើនេះជាស្ពានដែកបេឡេក្រាលឈើមានប្រវែង៤៥ម៉ែត្រដែលបានកើតឡើងក្រោមគំនិតផ្ដួចផ្ដើមរបស់លោក ស៊ុយ សែម រដ្ឋមន្ត្រីក្រសួងរ៉ែនិងថាមពល កសាងដោយមន្ទីរសាធារណការនិងដឹកជញ្ជូន ហើយបានដាក់សម្ពោធឲ្យប្រើប្រាស់ជាផ្លូវការកាលពីប្រមាណ១០ឆ្នាំមុន គឺទន្ទឹមគ្នានឹងការចាប់ផ្ដើមសាងសង់ទំនប់វារីអគ្គីសនីស្ទឹងអាតៃដែរ ។
ស្ពានដែកបេឡេនេះឆ្លងកាត់ស្ទឹងឆាយ ឆ្ពោះទៅកាន់ទំនប់វារីអគ្គីសនីស្ទឹងអាតៃ និងខេត្តកោះកុង ហើយក៏មានដាក់ស្លាកសញ្ញាថា ផ្ទុកទម្ងន់បាន១៥តោន ប៉ុន្តែមកដល់ពេលនេះស្ពានមានសភាពចាស់ទ្រុឌទ្រោម មិនអាចផ្ទុកលើសចំណុះនោះទេ ទើបពេលរថយន្តដឹកថ្មបើកឆ្លងកាត់ក៏បណ្ដាលឲ្យបាក់ផុងកម្រាលឈើធ្លាក់គូថរថយន្ដចុះក្រោម ចំណែកក្បាលរថយន្តបះឡើងលើជាប់នៅលើស្ពាននោះតែម្ដង ប៉ុន្តែមិនមានគ្រោះថ្នាក់ដល់មនុស្សនោះទេ។
អាជ្ញាធរនិងសមត្ថកិច្ចកំពុងខ្នះខ្នែងក្នុងការស្ទួចយករថយន្ដខាងលើចេញពីលើស្ពាន ដើម្បីសម្រួលចរាចរណ៍ និងតម្រូវឲ្យខាងក្រុមហ៊ុនចិនធ្វើស្ពាននេះឡើងវិញ៕ (កែសម្រួលដោយ ៖ ធីតា)
ចែករំលែកព័តមាននេះ