រាជធានីភ្នំពេញ ៖ បុរសម្នាក់ត្រូវគេចាប់ប្រគល់ឱ្យសមត្ថកិច្ច បន្ទាប់ពីជននេះធ្វើសកម្មភាពឆបោកនារីម្នាក់តាមហ្វេសបុក យកម៉ូតូម៉ាកស្គូពី(ម៉ូតូកូនទា) មួយគ្រឿង ពណ៌លឿង ពាក់ស្លាកលេខភ្នំពេញ 1BW-6958 បាន១ថ្ងៃ ដោយប្រាប់ថាជួយរកការងារឱ្យធ្វើ ។ ហេតុការណ៍នេះកើតឡើង កាលពីវេលាម៉ោង១១ព្រឹកថ្ងៃទី០៥ មីនា ២០១៤ នៅចំណុចស្ថានីយប្រេងកាល់តិច ស្ថិតក្នុងភូមិត្រពាំងឈូក សង្កាត់ទឹកថ្លា ខណ្ឌសែនសុខ ។
ជនសង្ស័យឈ្មោះ មាន ភារម្យ ភេទប្រុស អាយុ៣៣ឆ្នាំ ស្នាក់នៅផ្ទះជួលក្បែរផ្សារទួលគោក សង្កាត់បឹកក់២ ខណ្ឌទួលគោក មានស្រុកកំណើត ឯខេត្តស្វាយរៀង ។ ចំណែកនារីដែលចាញ់បោកបុរសខាងនលើ ឈ្មោះ ថេង ចន្ថា អាយុ២១ឆ្នាំជាកម្មការិនីរោងចក្រ ក្នុងតំបន់សេដ្ឋកិច្ចពិសេស សង្កាត់ភ្លើងឆេះរទេះ ខណ្ឌពោធិ៍សែនជ័យ ។
បើតាមការអះអាងពីបងថ្លៃនារីរងគ្រោះបានឱ្យដឹងថា កាលពីវេលាម៉ោង១០ព្រឹកថ្ងៃទី០៤ មីនា ប្អូនស្រីរបស់ខ្លួនបានស្គាល់ទំនាក់ទំនងជាមួយជនសង្ស័យខាងលើ តាមហ្វេសបុក ដោយជនសង្ស័យអួតថាជាអ្នកធ្វើការនៅក្រុមហ៊ុន និងជួយរកការងារឱ្យធ្វើ រួចក៏បានណាត់ជួបគ្នានៅខាងមុខក្រុមហ៊ុនមួយ ។
ប្រភពបន្តថា ពេលប្អូនស្រីរបស់ខ្លួនទៅដល់កន្លែងណាត់ជួប ជនសង្ស័យបានអួតប្រាប់កន្លែងធ្វើការរបស់គេ រួចក៏យកម៉ូតូប្អូនស្រីរបស់ខ្លួនទៅផ្ញើ ហើយទៅបាត់រហូត ។ លុះមកដល់ថ្ងៃទី០៥ មីនា ក្រុមគ្រួសារនារីរងគ្រោះបានប្រើល្បិចលេងហ្វេសបុកជាមួយជនសង្ស័យ ដោយប្រាប់ថាចង់រកការងារធ្វើ រួចណាត់ជួបគ្នានៅស្ថានីយប្រេងកាល់តិច ហើយចាប់ប្រគល់ឱ្យប៉ូលិសតែម្តង ៕
ចែករំលែកព័តមាននេះ