រាជធានីភ្នំពេញ ៖ បុរសប្រកបរបររត់រ៉ឺម៉ក់ម៉ូតូម្នាក់ បានព្យាយាមបើករ៉ឺម៉ក់ម៉ូតូមកកាន់មន្ទីរកាល់ម៉ែត ដើម្បីសង្រ្គោះជីវិត ក្រោយពីបុរសនោះត្រូវបានខ្មាន់កាំភ្លើងមិនស្គាល់មុខបាញ់ប្រហារចំនួន៣គ្រាប់ បណ្តាលឲ្យរងរបួស នៅចំណុចកែងផ្លូវលេខ៤៧និង៦១ស្ថិតក្នុងភូមិទី៨ សង្កាត់ស្រះចក ខណ្ឌដូនពេញ កាលពីវេលាម៉ោង១២និង១០នាទីរំលងអធ្រាត្រ ឈានចូលថ្ងៃទី០៥ មីនា ឆ្នាំ២០១៤។
សមត្ថកិច្ចមូលដ្ឋានបានឲ្យដឹងថា បុរសរងគ្រោះត្រូវបានគេស្គាល់ឈ្មោះ ជន ហាត ភេទប្រុស អាយុ៤៣ឆ្នាំ ស្នាក់នៅផ្សារតាខ្មៅ ក្រុងតាខ្មៅ ខេត្តកណ្តាល រងរបួសមួយគ្រាប់ចំចង្កេះខាងឆ្វេង។
សាក្សីបានឲ្យសមត្ថកិច្ចដឹងថា មុនពេលកើតហេតុបុរសរងគ្រោះជន ហាត បើករ៉ឺម៉ក់ម៉ូតូដឹកបុរសម្នាក់តាមផ្លូវលេខ៤៧ទិសដៅពីជើងទៅត្បូង លុះមកដល់កែងផ្លូវលេខ៦១ ស្ថិតក្នុងសង្កាត់ស្រះចក ខណ្ឌដូនពេញ ស្រាប់តែមានម៉ូតូមួយគ្រឿងម៉ាកអាយខនជិះម្នាក់ឯងបញ្ច្រាសទិសគ្នា ហើយជិះប៉ះរ៉ឺម៉កម៉ូតូ។ ពេលបុរសរងគ្រោះឈប់រ៉ឺម៉កម៉ូតូស្រែកជេរហើយក៏ចុះទាញយកបំពង់ទីបបម្រុងវាយទៅលើភាគីម៉ូតូអាយខន តែត្រូវបានបុរសម្នាក់ដែលជាភ្ញៀវជិះរ៉ឺម៉ក់ម៉ូតូកង់បីជួយឃាត់។ពេលនោះភាគីម៉ូតូអាយខនបានបើកទៅបាត់ ប្រហែលជា៥នាទីក្រោយមក ឃើញជននេះ បានដឹកបក្សពួកម្នាក់ត្រឡប់មកវិញឈប់ក្បែរម៉ូតូជនរងគ្រោះរួចបុរសម្នាក់ដែលអង្គុយខាងក្រោយក៏បានធាក់ទៅលើជនរងគ្រោះបណ្តាលឲ្យដួល។ ក្រោយមកពួកគេក៏ជិះម៉ូតូចេញប្រហែល១០ម៉ែត្រក៏ទាញកាំភ្លើងចេញពីចង្កេះខោហើយបាញ់សំដៅទៅលើបុរសរងគ្រោះជាបន្តបន្ទាប់ចំនួន៣គ្រាប់រួចគេចខ្លួនបាត់។ សមត្ថកិច្ចបាននិយាយថា ក្រោយពីខ្មាន់កាំភ្លើងគេចខ្លួន ជនរងគ្រោះបានបើករ៉ឺម៉ក់ម៉ូតូចេញ តែមិនដឹងថារូបខ្លួនត្រូវគ្រាប់នោះទេ លុះបន្តិចមកទើបដឹងថាត្រូវគេបាញ់ចំចង្កេះខាងឆ្វេងហូរឈាមយ៉ាងច្រើនរួចបង្ហួសចូលមន្ទីរពេទ្យកាល់ម៉ែត។
សមត្ថកិច្ចក៏បានបញ្ជាក់ថា នៅកន្លែងកើតហេតុ រកឃើញសំបកគ្រាប់កាំភ្លើងមួយប្រភេទកា៥៩ ហើយបច្ចុប្បន្នបុរសរងគ្រោះកំពុងសម្រាកព្យាបាលនៅមន្ទីរពេទ្យកាល់ម៉ែត្រ៕
ចែករំលែកព័តមាននេះ