រាជធានីភ្នំពេញ ៖ ទីតាំងបើកលេងហ្គេមតាមកុំព្យូទ័រមួយកន្លែង ស្ថិតនៅផ្ទះលេខ៨១៩ ក្រុមទី៨ ផ្លូវចូលវត្តឧត្តរាវតី ក្នុងភូមិមិត្តភាព សង្កាត់មិត្តភាព ខណ្ឌឫស្សីកែវ បានត្រូវសមត្ថកិច្ចដឹកនាំដោយលោក អីុវ ឈុនផេង អធិការរងនគរបាលខណ្ឌ សហការជាមួយនគរបាលប៉ុស្តិ៍ចុះបង្ក្រាប កាលពីវេលាម៉ោង១០និង៣០នាទី ព្រឹកថ្ងៃទី៤ មីនា ដោយចោទប្រកាន់ថា ផ្ទះហ្គេមនេះពង្វក់សិស្សឱ្យភេ្លចសាលា ហើយក៏យោងតាមបណ្តឹងរបស់អាណាព្យាបាលសិស្សទាំងនោះដែរ ។
ក្នុងប្រតិបត្តិការចុះបង្ក្រាបហ្គេមនេះ សមត្ថកិច្ចឃាត់ខ្លួនក្មេងៗអ្នកញៀនហ្គេមបានចំនួន៣៦នាក់ ដកហូតម៉ូតូ៨គ្រឿង កង់៦គ្រឿង កុំព្យូទ័រ៣១គ្រឿង រួមទាំងកៅអីចំនួន២០ និងអ្នកមើលការខុសត្រូវ ហើយបញ្ជូនទៅកាន់អធិការដ្ឋាននគរបាលខណ្ឌឫស្សីកែវ ។ តាមសមត្ថកិច្ចមូលដ្ឋានឱ្យដឹងថា ម្ចាស់ទីតាំងខាងលើនេះ ឈ្មោះ ណូ វ៉ាណេត ភេទប្រុស អាយុ២៨ឆ្នាំ ដែលបានឱ្យប្អូនប្រុសឈ្មោះ វា៉ន់ សុភារៈ អាយុ២១ឆ្នាំ ជាអ្នកមើលការខុសត្រូវ ។ នៅមុនពេលចុះបង្ក្រាបទីតាំងហ្គេមនេះ មានក្មេងតូចៗ នាំគ្នាពពាក់ពពូនចូលលេងហ្គេម ហើយពេលកម្លាំងសមត្ថកិច្ចចុះទៅដល់ ក្មេងៗបាននាំគ្នារត់ប្រសាចចូលទៅពួននៅបន្ទប់ទឹកជាន់លើ ។
តាមមន្ត្រីសមត្ថកិច្ចបានឱ្យដឹងទៀតថា ផ្ទះបើកលេងហ្គេមតាមកុំព្យូទ័រខាងលើនេះ បានពង្វក់សិស្សសាលាឱ្យចូលលេង ដោយពុំគិតពីការរៀនសូត្រ ហើយត្រូវបានអាណាព្យាបាលប្តឹងមកសមត្ថកិច្ច ។ ទោះបីជាយ៉ាងណា នៅពេលសមត្ថកិច្ចចុះបង្ក្រាប ម្ចាស់ទីតាំងបានមានប្រតិកម្មយ៉ាងខ្លាំង ដោយអះអាងថា ការបើកអាជីវកម្មអីុនធើរណេតរបស់គាត់មានអាជ្ញាប័ណ្ណពីទូរគមនាគមន៍កម្ពុជាត្រឹមត្រូវ ព្រមទាំងមានប្រតិកម្មចំពោះសមត្ថកិច្ច ដែលចុះទៅចាប់ដកហូតរបស់របរពុំមានដីកាឆែកឆេរ និងពុំមានព្រះរាជអាជ្ញាចូលរួម ។ មិនតែប៉ុណ្ណោះ បានចោទថា សមត្ថកិច្ច បានសម្រុកចូលក្នុងផ្ទះមើលតែបង្ក្រាបបទល្មើសព្រហ្មទណ្ឌ និងបានយកភេសជ្ជៈ ដែលគាត់ដាក់តាំងលក់ផឹកតាមចិត្ត ។ តាមម្ចាស់ទីតាំងមានប្រតិកម្មទៀតថា ផ្ទះហ្គេមគេក្បែរគ្នានោះ២កន្លែង និងផ្សេងៗទៀត ស្ទើរពេញទីក្រុង ហេតុអ្វីមិនចាប់ផង មកចាប់តែកន្លែងរបស់គាត់ ។
តាមមន្ត្រីនគរបាលបានឱ្យដឹងទៀតថា ក្មេងៗត្រូវបានសមត្ថកិច្ចនាំយកទៅធ្វើការអប់រំហើយបានហៅអាណាព្យាបាលឱ្យមកទទួលយកទៅអប់រំបន្តទៀត ។ ចំណែកកុំព្យូទ័ររក្សាទុកនៅអធិការដ្ឋានខណ្ឌបណ្តោះអាសន្ន រង់ចាំគោលការណ៍ពីព្រះរាជអាជ្ញាអមសាលាដំបូងរាជធានីភ្នំពេញ ៕
ចែករំលែកព័តមាននេះ