រាជធានីភ្នំពេញ ៖ តាមមន្ត្រីជាន់ខ្ពស់របស់គណៈកម្មាធិការជាតិរៀបចំការបោះ (គ.ជ.ប )នាព្រឹកថ្ងៃទី៤ មីនា បានអះអាងថា មានគណបក្សនយោបាយចំនួន៥ បានចុះបញ្ជីឈ្មោះបេក្ខជនចូលរួមប្រកួតប្រជែងការបោះឆ្នោតជ្រើសតាំងសមាជិកក្រុមប្រឹក្សារាជធានី ខេត្ត ក្រុង ស្រុក ខណ្ឌ អាណត្តិទី២ នាថ្ងៃទី១៨ ឧសភា ឆ្នាំ២០១៤ ។
រាជធានីភ្នំពេញ ៖ តាមមន្ត្រីជាន់ខ្ពស់របស់គណៈកម្មាធិការជាតិរៀបចំការបោះ (គ.ជ.ប )នាព្រឹកថ្ងៃទី៤ មីនា បានអះអាងថា មានគណបក្សនយោបាយចំនួន៥ បានចុះបញ្ជីឈ្មោះបេក្ខជនចូលរួមប្រកួតប្រជែងការបោះឆ្នោតជ្រើសតាំងសមាជិកក្រុមប្រឹក្សារាជធានី ខេត្ត ក្រុង ស្រុក ខណ្ឌ អាណត្តិទី២ នាថ្ងៃទី១៨ ឧសភា ឆ្នាំ២០១៤ ។
លោកទេព នីថា អគ្គលេខាធិការគ.ជ.ប បានប្រាប់កោះសន្តិភាពតាមទូរស័ព្ទថា ដំណើរការចុះបញ្ជីគណបក្សនយោបាយ និងចុះឈ្មោះបេក្ខជនឈរឈ្មោះបោះឆ្នោតជ្រើសតាំងសមាជិកក្រុមប្រឹក្សា រាជធានី ខេត្ត ក្រុង ស្រុក ខណ្ឌ បានចាប់ផ្តើមពីថ្ងៃទី២៧ កុម្ភៈ រហូតដល់ថ្ងៃទី៣មីនា ហើយការបោះឆ្នោតជ្រើសតំាងសមាជិកក្រុមប្រឹក្សារាជធានី ខេត្ត ក្រុង ស្រុក ខណ្ឌ នឹងធ្វើឡើងនាថ្ងៃទី១៨ ឧសភា ។ លោកទេព នីថា បានឲ្យដឹងថា រហូតមកដល់ល្ងាចថ្ងៃទី៣ មីនា ដែលជាថ្ងៃផុតកំណត់នៃការទទួលចុះបញ្ជីគណបក្សនយោបាយ និងបេក្ខជនឈរឈ្មោះបោះឆ្នោតជ្រើសតាំងសមាជិកក្រុមប្រឹក្សារាជធានី ខេត្ត ក្រុង ស្រុក ខណ្ឌ គឺមានគណបក្សចំនួន៥បានចុះឈ្មោះដាក់បេក្ខជន ចូលរួមការបោះឆ្នោតតាមបែបអសកលនោះ ។ គណបក្សទាំង៥នោះរួមមាន គណបក្សប្រជាជនកម្ពុជា គណបក្សសង្គ្រោះជាតិ គណបក្សហ្វុ៊នស៊ិនប៉ិច គណបក្សសម្ព័ន្ធដើម្បីប្រជាធិបតេយ្យ និងគណបក្សសាធារណរដ្ឋប្រជាធិបតេយ្យ ។
លោកបញ្ជាក់ថា គណបក្សនយោបាយដែលបានចុះបញ្ជីបេក្ខជនមាន គណបក្សប្រជាជនកម្ពុជា បានចុះឈ្មោះដាក់បេក្ខជននៅគ្រប់មណ្ឌលបោះឆ្នោតគឺនៅរាជធានី-ខេត្តទាំង២៥ និងនៅក្រុង ស្រុក ខណ្ឌ សរុបចំនួន១៩៧ទូទាំងប្រទេស ។ ចំណែកគណបក្សសង្គ្រោះជាតិចុះឈ្មោះនៅ២៤រាជធានី-ខេត្ត ក្រុង ស្រុក ចំនួន ១៥៨ និងនៅខណ្ឌចំនួន១២ ។ គណបក្សហ្វុ៊នស៊ិនប៉ិចចំនួន២ ខេត្ត ក្រុង៣ និងស្រុក១៦ ។គណបក្សសម្ព័ន្ធដើម្បីប្រជាធិបតេយ្យចុះឈ្មោះនៅស្រុក១ និងគណបក្សសាធារណរដ្ឋប្រជាធិបតេយ្យដាក់បេក្ខជនឈរឈ្មោះបោះឆ្នោតនៅខេត្ត២ និងស្រុក១ ។
លោក ទេព នីថា ឲ្យដឹងទៀតថា គណៈកម្មការរាជធានី-ខេត្ត រៀបចំការបោះឆ្នោត នឹងត្រូវពិនិត្យរយៈពេល៥ថ្ងៃ ដើម្បីសម្រេចលើពាក្យស្នើសុំទាំងនោះ ហើយបើមានចំណុចខ្វះខាតតម្រូវឲ្យគណបក្សនយោបាយកែតម្រូវក្នុងរយៈពេល៥ថ្ងៃទៀត ។ ប្រសិនបើគណបក្សនយោបាយដែលបានចុះឈ្មោះបេក្ខជនរបស់ខ្លួននៅគណៈកម្មការរាជធានី-ខេត្តមានបញ្ហា និងមិនសុខចិត្តនោះ គណបក្សនយោបាយអាចប្តឹងមកគណៈកម្មាធិការជាតិរៀបចំការបោះឆ្នោត (គ.ជ.ប) បាន ដោយគ.ជ.ប មានរយៈពេល៥ថ្ងៃសម្រាប់ត្រួតពិនិត្យ និងផ្តល់យោបល់ទៅគណបក្សនយោបាយនោះវិញ ។ ចំពោះការបោះឆ្នោតជ្រើសតាំងក្រុមប្រឹក្សារាជធានី ខេត្ត ស្រុក ក្រុង ខណ្ឌ គ.ជ.ប គ្រោងចំណាយថវិកាជាង១លាន៦សែនដុល្លារតាមគម្រោងរបស់ក្រសួងសេដ្ឋកិច្ច និងហិរញ្ញវត្ថុ ប៉ុន្តែដោយសារឆ្នំានេះបានបង្កើតខេត្តមួយទៀត និងខណ្ឌចំនួន៣ទៀត ដូច្នេះត្រូវចំណាយថវិកាជាង១ម៉ឺនដុល្លារថែមទៀត ។
លោក ទេព នីថា បញ្ជាក់ថា មណ្ឌលដែលត្រូវបោះឆ្នោតជ្រើសតាំងក្រុមប្រឹក្សារាជធានី-ខេត្ត ក្រុង ស្រុក ខណ្ឌ គឺមាន២៥រាជធានី-ខេត្តទូទំាងប្រទេស និងមានចំនួន១៩៧ការិយាល័យ ។ សមាជិកក្រុមប្រឹក្សាក្រុង ស្រុក ខណ្ឌ មាន២.៩៣១នាក់ និងសមាជិកក្រុមប្រឹក្សារាជធានី-ខេត្តមាន៣៩៣នាក់ ចំណែកឃុំ-សង្កាត់ទំាងអស់មានចំនួន១.៦៣៣ ។ សូមបញ្ជាក់ថា ការបោះឆ្នោតជ្រើសតាំងសមាជិកក្រុមប្រឹក្សារាជធានី ខេត្ត ក្រុង ស្រុក ខណ្ឌ អាណត្តិទី២ នឹងធ្វើឡើងជាលក្ខណៈអសាកល នាថ្ងៃទី១៨ ឧសភា ខាងមុខនេះ ហើយមានតែសមាជិកក្រុមប្រឹក្សាឃុំ-សង្កាត់ក្នុងតំណែងសរុបប្រមាណជា១១.៤៥៩នាក់ ដែលមកពីគណបក្សនយោបាយចំនួន៧ប៉ុណ្ណោះ ជាអ្នកមានសិទ្ធិបោះឆ្នោត ដើម្បីជ្រើសតាំងសមាជិកក្រុមប្រឹក្សារាជធានី ខេត្ត ក្រុង ស្រុក ខណ្ឌ សរុបចំនួន៣.៣២៤នាក់ ក្នុងនោះមានក្រុមប្រឹក្សារាជធានី-ខេត្ត ចំនួន៣៩៣នាក់ និងក្រុមប្រឹក្សា ក្រុង ស្រុក ខណ្ឌ ២.៩៣១នាក់ ។
គួររំឭកថា កាលពីអាណត្តិទី១ សមាជិកក្រុមប្រឹក្សាឃុំ-សង្កាត់ សរុបមាន១១.៤៥៩នាក់ ដែលជាអ្នកបោះឆ្នោត ក្នុងនោះមកពីគណបក្សប្រជាជនកម្ពុជាចំនួន៨.២៩២នាក់ គណបក្សសមរង្ស៊ី ២.១៥៥ នាក់ គណបក្សសិទ្ធិមនុស្ស៨០០នាក់ គណបក្សហ្វុ៊នស៊ិនប៉ិច១៥១នាក់ គណបក្សនរោត្តមរណឫទ្ធិ ឬគណបក្សជាតិនិយមចំនួន៥២នាក់ គណបក្សសម្ព័ន្ធដើម្បីប្រជាធិបតេយ្យ៨នាក់ និងគណបក្សសញ្ជាតិកម្ពុជាចំនួន១នាក់ ៕
ចែករំលែកព័តមាននេះ