ខេត្តកំពត ៖ ក្រុមអ្នករត់តាក់សីុនៅចំណតរថយន្តក្រុងកំពត ប្រមាណជាង៧០នាក់ នាព្រឹកថ្ងៃទី៤ មីនា បាននាំគ្នាមកកាន់អធិការដ្ឋាននគរបាលក្រុងកំពត ដោយចតរថយន្តតាក់សីុមួយខ្សែយា៉ងវែង ដើម្បីធ្វើការតវា៉ចំពោះអ្នកគ្រប់គ្រងចំណតក្នុងក្រុងកំពត និងសូមឱ្យលោកអធិការនគរបាលក្រុងដោះស្រាយជូនពួកគាត់ឱ្យបានសមស្របចំពោះចំណុចអវិជ្ជមានមួយចំនួន ជុំវិញការបង់សេវាអាជីវកម្មរត់តាក់សីុ ។
ខេត្តកំពត ៖ ក្រុមអ្នករត់តាក់សីុនៅចំណតរថយន្តក្រុងកំពត ប្រមាណជាង៧០នាក់ នាព្រឹកថ្ងៃទី៤ មីនា បាននាំគ្នាមកកាន់អធិការដ្ឋាននគរបាលក្រុងកំពត ដោយចតរថយន្តតាក់សីុមួយខ្សែយា៉ងវែង ដើម្បីធ្វើការតវា៉ចំពោះអ្នកគ្រប់គ្រងចំណតក្នុងក្រុងកំពត និងសូមឱ្យលោកអធិការនគរបាលក្រុងដោះស្រាយជូនពួកគាត់ឱ្យបានសមស្របចំពោះចំណុចអវិជ្ជមានមួយចំនួន ជុំវិញការបង់សេវាអាជីវកម្មរត់តាក់សីុ ។
ពួកគាត់តវា៉ថា សព្វថ្ងៃនេះពួកគាត់កំពុងរងការគាបសង្កត់ ដោយអ្នកគ្រប់គ្រងចំណតអនុវត្តការបង់សេវាខុសពីសៀវភៅបន្ទុកដែលបានកំណត់នាពេលបច្ចុប្បន្ន ។
ក្រុមអ្នករត់តាក់សីុទាំងនោះបានប្រាប់អ្នកយកព័ត៌មានថា ថៅកែគ្រប់គ្រងចំណតលោក កូវ រដ្ឋា បានប្រើអំណាចដោយបញ្ជាឱ្យកូនចៅតាមប្រមាញ់រថយន្តតាក់សីុណាដែលធ្លាប់ចតនៅចំណតតែមិនចូលចត ហើយចេញទៅប្រមូលមនុស្សតាមផ្ទះឬតាមផ្លូវ ក៏ត្រូវបញ្ជាឱ្យហៅរថយន្តនោះត្រឡប់ចូលចំណតវិញដើម្បីបង់ប្រាក់ដែរ ។ ជាមួយនេះ បានចោទប្រកាន់អ្នករត់តាក់សីុនោះថា មិនគោរពបទបញ្ជាផ្ទៃក្នុងចំណត ឬមិនគោរពតាមការជូនដំណឹងរបស់ចំណត ហើយត្រូវផាកពិន័យយា៉ងធ្ងន់ធ្ងរហួសការកំណត់បង់សេវានៅក្នុងសៀវភៅបន្ទុក។ ប្រភពដដែលឱ្យដឹងទៀតថា មានរថយន្តតាក់សីុខ្លះ ដែលត្រូវទៅដឹកភ្ញៀវមានធុរៈនៅតាមផ្ទះ ហើយចេញបង្ហួសទៅភ្នំពេញ ឬក្រុងព្រះសីហនុ មិនបានចូលចំណតបង់លុយ ដោយឱ្យប្រពន្ធឬកូនយកប្រាក់មកបង់ជំនួស ព្រោះខ្លាចអំណាចថៅកែចំណត ក៏ថៅកែមិនយោគយល់ដែរ គឺមិនទទួលការបង់សេវានេះទេ ទុកសម្រាប់ពេលរថយន្តនោះត្រឡប់មកវិញ កោះហៅមកពិន័យជាប្រាក់ទ្វេមួយជាពីរជាញឹកញាប់ ។
ចំពោះការតវា៉របស់ក្រុមអ្នករត់តាក់សីុខាងលើនេះ លោកងឹម ដេត អធិការនគរបាលក្រុង កំពត បានមានប្រសាសន៍ណែនាំដល់បងប្អូនអ្នករត់តាក់សីុដែលនាំគ្នាមករកសមត្ថកិច្ចឬអាជ្ញាធរ ដើម្បីជួយដោះស្រាយរាល់បញ្ហាមិនប្រក្រតីនេះសុំឱ្យចាត់ជាតំណាងពីរទៅបីនាក់បានហើយ ដើម្បីជួបពិភាក្សាជាមួយលោកអភិបាលខេត្ត រកដំណោះស្រាយ ។ មេប៉ូលិសណែនាំថា កុំនាំគ្នាមកព្រោងព្រាតបែបនេះ នាំគេយល់ច្រឡំថាជាការធ្វើបាតុកម្មប្រឆាំងអ្វីមួយ ។ ក្រោយពីជួបការណែនាំពីលោកអធិការនគរបាលក្រុងកំពតហើយ ក្រុមអ្នករត់តាក់សីុទាំងនោះក៏បានបន្តទៅសុំការអន្តរាគមន៍ពីលោកអភិបាលខេត្តទៀត ប៉ុន្តែលទ្ធផលបែបណានោះនៅមិនទាន់ដឹងនៅឡើយទេ ៕
ចែករំលែកព័តមាននេះ