ក្នុងពិភពលោកដែលពោរពេញទៅដោយមនុស្សថ្នាក់កណ្តាលដែលទៅធ្វើការឲ្យអ្នកដទៃដើម្បីចិញ្ចឹមជីវិតនេះ មានមនុស្សជាច្រើនដែលមានក្តីសុបិនចង់ចូលរួមក្រុមមហាសេដ្ឋីធំៗជុំវិញពិភពលោក និងឈប់ធ្វើការ រួចដើរផ្សារទិញទំនិញដោយមិនចាំបាច់គិតច្រើនជាដើម ។
ប៉ុន្តែអ្នកគួរដឹងថា អ្នកមានជាច្រើនមិនធ្វើដូច្នេះទេ ហើយវាជាមូលហេតុដែលពួកគេកាន់តែមានទ្រព្យសម្បត្តិស្តុកស្តម្ភបន្ថែមទៀត ។ ប្រាកដណាស់ អ្នកមានមួយចំនួនមិនមែនជាមនុស្សដែលឆ្លាតវៃជាងអ្នកដទៃទេ ប៉ុន្តែពួកគេមានគោលការណ៍សំខាន់ៗមួយចំនួនដែលជួយឲ្យពួកគេបន្តឈានមុខអ្នកដទៃ ។
ដូច្នេះប្រសិនបើអ្នកចង់ចូលរួមក្រុមមនុស្សខាងលើ អ្នកអាចសិក្សាពីអ្វីដែលអ្នកមានមួយចំនួនធ្វើដែលជួយឲ្យពួកគេកាន់តែមានដូចខាងក្រោមនេះ៖ ១. មានគំនិតបង្កើនទ្រព្យ៖ អ្នកមានពិតជាមានគំនិតច្នៃប្រឌិតខ្ពស់ពេលដែលគិតពីអាជីវកម្ម និងស្វែងរកវិធីផ្សេងៗដើម្បីរកលុយ ។ អ្នកដែលជោគជ័យអាចឈានមុខអ្នកដទៃព្រោះពួកគេមានគំនិតបង្កើនទ្រព្យដែលផ្លាស់ប្តូរការមើលទៅលុយ និងជួយឲ្យពួកគេអាចផ្តោតស្មារតីលើការមើលឱកាសក្នុងការរកលុយ ។
គំនិតនេះជួយអ្នកមាន និងអ្នកដែលជោគជ័យជាច្រើនរូបឲ្យជឿជាក់ថាពួកគេតែងតែមានគម្រោងកាន់តែធំ និងល្អជាងនេះ ហើយឱកាសរកលុយមិនដែលអស់ទេ ។ ពួកគេបើកទូលាយក្នុងការទទួលយកគំនិតថ្មី ហើយពួកគេជឿជាក់ថាពួកគេមានសមត្ថភាពក្នុងការជំរុញដល់ការផ្លាស់ប្តូរ និងបង្កើតជាលទ្ធផលវិជ្ជមានផ្សេងៗ ។
២. រាប់អានមនុស្សជោគជ័យដទៃ៖ អ្នកមានយល់ដឹងពីសារៈសំខាន់នៃការនៅជិតមនុស្សជោគជ័យ ។ ពួកគេចូលចិត្តចំណាយពេលវេលាក្នុងការពង្រីកបណ្តាញមនុស្សដែលពួកគេស្គាល់តាមសន្និសិទ កម្មវិធី និងកិច្ចប្រជុំនានាជាដើម ។ វាគឺជាការប្រើប្រាស់ពេលវេលាដ៏វៃឆ្លាតព្រោះវាជួយឲ្យពួកគេផ្តោតស្មារតីលើភាពជោគជ័យ និងជួយឲ្យពួកគេស្គាល់មនុស្សថ្មីៗដែលមានគំនិតប្លែកៗ និងគួរឲ្យចាប់អារម្មណ៍ជាដើម ។
៣. ធ្វើអ្វីដែលពួកគេមិនដែលធ្វើពីមុន៖ អ្នកមានបានក្លាយជាមនុស្សជោគជ័យព្រោះពួកគេដឹងថាភាពជោគជ័យកើតមានឡើងពេលដែលមនុស្សធ្វើអ្វីដែលពួកគេមិនចង់ធ្វើពេលខ្លះ ។ ពួកគេដឹងថាវិធីមួយដែលជួយឲ្យពួកគេកាន់តែមានសមត្ថភាពជាងមុនគឺការជំរុញខ្លួនឲ្យខិតខំបន្ត ។ ប្រសិនបើអ្នកចង់ក្លាយជាអ្នកមាន អ្នកត្រូវតែចេះជំរុញដល់គំនិតច្នៃប្រឌិតរបស់ខ្លួន ។
ប្រាកដណាស់ ទ្រព្យសម្បត្តិ និងភាពជោគជ័យមិនកើតចេញតែពីការងារការិយាល័យដែលចូលធ្វើការម៉ោង ៩ និងចេញម៉ោង ៥ ទេ ។ វាកើតចេញពីការខិតខំរបស់អាជីវករ និងអ្នកដឹកនាំដែលមានគំនិតថ្មីៗ និងដើរចេញពីដែលខ្លួនធ្លាប់តែនៅដើម្បីសម្រេចគោលដៅខ្លួន ៕ កែសម្រួលដោយ ៖ សុឃាក់
ចែករំលែកព័តមាននេះ