រាជធានីភ្នំពេញ ៖ សេចក្តីរាយការណ៍បឋមឲ្យដឹងថា ចាងហ្វាងគេហទំព័រដែលគេមិនសូវស្គាល់មិនធ្លាប់ឮសំឡេង៤នាក់ កាលពីល្ងាចថ្ងៃទី១៩ សីហា ត្រូវបានកម្លាំងសមត្ថកិច្ចនគរបាលខេត្តពោធិ៍សាត់ឃាត់ខ្លួន ពាក់ព័ន្ធករណីឆបោកប្រាក់ចំនួន១០ដុល្លារអាមេរិក ពីថៅកែការ៉ាស់សាំង ដោយប្រើរូបភាពជាមន្ត្រីនគរបាលជាតិ…
រាជធានីភ្នំពេញ ៖ សេចក្តីរាយការណ៍បឋមឲ្យដឹងថា ចាងហ្វាងគេហទំព័រដែលគេមិនសូវស្គាល់មិនធ្លាប់ឮសំឡេង៤នាក់ កាលពីល្ងាចថ្ងៃទី១៩ សីហា ត្រូវបានកម្លាំងសមត្ថកិច្ចនគរបាលខេត្តពោធិ៍សាត់ឃាត់ខ្លួន ពាក់ព័ន្ធករណីឆបោកប្រាក់ចំនួន១០ដុល្លារអាមេរិក ពីថៅកែការ៉ាស់សាំង ដោយប្រើរូបភាពជាមន្ត្រីនគរបាលជាតិ ។
ចាងហ្វាងគេហទំព័រ៤នាក់នោះ
១-ឈ្មោះ រ៉ូ រដ្ឋា ភេទប្រុស អាយុ៣១ឆ្នាំ មានទីលំនៅភូមិរំចេក១ សង្កាត់រតនៈ ក្រុងបាត់ដំបង ខេត្តបាត់ដំបង ជាចាងហ្វាង គេហទំព័រ NTC ។ ២-ឈ្មោះ ឯម សុវិសេដ្ឋ ភេទប្រុស អាយុ៣១ឆ្នាំ មានទីនៅភូមិរតនៈ សង្កាត់រតនៈ ក្រុងបាត់ដំបង ខេត្តបាត់ដំបង ជាចាងហ្វាងគេហទំព័រCPM ។ ៣-ឈ្មោះ ឯម សុវិសាល ភេទប្រុស អាយុ៣១ឆ្នាំ រស់នៅភូមិរតនៈ សង្កាត់រតនៈ ក្រុងបាត់ដំបង ខេត្តបាត់ដំបង ជាចាងហ្វាងគេហទំព័រTNC និង៤-ឈ្មោះ ថុង គឹមងួន ភេទប្រុស អាយុ៤០ឆ្នាំ រស់នៅភូមិវត្តរំដួល សង្កាត់សំរោងភ្នំ ក្រុងបាត់ដំបង ខេត្តបាត់ដំបង ជា ចាងហ្វាងគេហទំព័រ PCN ។
សេចក្តីរាយការណ៍បន្តថា ដើមបណ្តឹងឲ្យមានការឃាត់ខ្លួនចាងហ្វាងគេហទំព័រ៤នាក់នោះមានឈ្មោះ យ៉ាន់ រ៉ាឌី ភេទប្រុស អាយុ៣៩ឆ្នាំ រស់នៅភូមិកំពែងស្វាយ ឃុំស្នាមព្រះ ស្រុកបាកាន ខេត្តពោធិ៍សាត់ ជាថៅកែស្ថានីយប្រេងឥន្ធនៈ ។ ដើមចមបណ្តាលឲ្យសមត្ថកិច្ចឃាត់ខ្លួនជនសង្ស័យទាំង៤នាក់នេះ កាលពីវេលាម៉ោង២និង៤០នាទីថ្ងៃទី១៩ សីហា នៅចំណុចស្ថានីយប្រេងឥន្ធនៈមួយកន្លែងស្ថិតនៅភូមិឃុំខាងលើ មានមនុស្ស៤នាក់ជិះរថយន្តឡិចស៊ីសRX300 ពណ៌ផ្សែងបារី ពាក់ស្លាកលេខប.ប.២ B.០២៤៨ បានចុះពីលើរថយន្តទៅសួរម្ចាស់ស្ថានីយប្រេងថា ការ៉ាស់នេះមានច្បាប់ឬទេ ?
ពួកគេបានអះអាងថា មកពីអគ្គស្នងការដ្ឋាននគរបាលជាតិ ។ សួរចុះសួរឡើង ស្រាប់តែនិយាយសម្រួលទារលុយម្ចាស់ការ៉ាស់ចំនួន៣០០ដុល្លារអាមេរិក ។ ពេលនោះប្រពន្ធថៅកែស្ថានីយឈ្មោះ យ៉ាន់ រ៉ាឌី ពុំបានឲ្យតាមការទាមទារទេ តែបានឲ្យ១០ដុល្លារយកទៅផឹកកាហ្វេសិនទៅ ហើយបាននិយាយទៅកាន់ពួកគេថា ខុសត្រូវអីចាំប្តីគាត់មកសិន ព្រោះគាត់ជាប់រវល់លក់ដូរ ។ បន្ទាប់មកចាងហ្វាងគេហទំព័រ៤នាក់នោះក៏ទទួលលុយ១០ដុល្លារ ហើយនាំគ្នាឡើងជិះរថយន្តចេញតែម្តងទៅ ។
ជនរងគ្រោះបានបំភ្លឺប្រាប់សមត្ថកិច្ចទៀតថា ក្រោយពេលជនសង្ស័យចេញរថយន្តទៅផុត គាត់បានទៅរាយការណ៍ប្រាប់នគរបាលមូលដ្ឋាន ពីករណីជន១ក្រុមជិះរថយន្តទៅឆបោកប្រាក់ពីភរិយាគាត់ ។ លុះល្ងាចថ្ងៃដដែលសមត្ថកិច្ចក៏បានឃាត់ខ្លួន ជនសង្ស័យទាំង៤នាក់ទៅសាកសួរ រហូតមានការបំភ្លឺថា ពិតជាបានប្រព្រឹត្តបទល្មើសដូចការចោទប្រកាន់មែន ទើបពួកគេត្រូវបានឃាត់ខ្លួនកសាងសំណុំរឿង ដើម្បីបញ្ជូនទៅកាន់សាលាដំបូងខេត្តតាមនីតិវិធី ៕
ចែករំលែកព័តមាននេះ