ខេត្តស្ទឹងត្រែង ៖ ប្រជាពលរដ្ឋនៅក្បែរបឹងវាលរំពេរ ចង់ឃើញការអភិវឌ្ឍន៍បឹងនេះឱ្យទៅជាតំបន់អេកូទេសចរណ៍មួយ សម្រាប់បម្រើឱ្យវិស័យទេសចរណ៍ ព្រោះទឹកបឹងនេះមានស្ថានភាពចម្លែកណាស់ ដោយខែប្រាំងទឹកឡើង ឯខែវស្សានេះទឹកស្រកខុសពីធម្មតាទៅវិញ ។ បឹងវាលរំពេរនេះ ស្ថិតនៅក្នុងភូមិកាតូត ឃុំកំភុន ស្រុកសេសាន ជាប់នឹងផ្លូវជាតិលេខ៧៨ ។
ជាមួយជាមួយស្រី្ត ភ្លិ នឿន រស់នៅក្បែបឹងនេះបានអះអាងថា មានភាពខុសប្លែកតាមចាស់ទុំនិយាយតៗគ្នាថា មានតាំងពីយូរលង់ណាស់មកហើយ ហើយបច្ចុប្បន្នស្ថានភាពទឹកបឹងនេះ នៅតែមានកម្រិតចុះឡើងធ្វើឱ្យភ្ញៀវទេសចរទៅមក ឆ្លងកាត់តាមផ្លូវជាតិលេខ៧៨នេះ ចាប់អារម្មណ៍ព្រើតតែម្តង ដោយសារនៅខែប្រាំងទឹកបឹងនេះបានឡើងលិចផ្ទះសម្បែង និងផលដំណាំខ្ទេចខ្ទីរអស់ ។ ចំណែកខែវស្សាភ្លៀងធ្លាក់ជោកជាំវិញ បែរជាបឹងនេះស្រកទឹកទៅវិញ ។
ស្រី្ត ងួន ស៊ីន រស់នៅក្បែនោះដែរបានលើកឡើងថា ប្រជាពលរដ្ឋពុំសូវចាប់អារម្មណ៍ទេ ដោយសារតែស្ថានភាពកើតមានរាល់រដូវទៅហើយ តែវាប្លែកសម្រាប់ភ្ញៀវទេសចរជាតិ និងអន្តរជាតិ ដែលពួកគាត់បានចាប់អារម្មណ៍ឃើញ ហើយគាត់ក៏ចង់ឱ្យស្ថាប័នពាក់ព័ន្ធ រៀបចំឱ្យបានត្រឹមត្រូវ ដើម្បីជាភាពទាក់ទាញ។
ទាក់ទិនរឿងរ៉ាវខាងលើនេះ មន្ត្រីជំនាញមន្ទីរធនធានទឹក និងឧតុនិយមខេត្តបានអះអាងថា នេះជាអភូតហេតុចម្លែក (ភ្លៀងច្រើនអត់ទឹក) ចំណែកខែប្រាំងអត់ភ្លៀងបែរទឹកឡើងច្រើនទៅវិញ។ (សម្រួលដោយ៖ ស្រីណា)
ចែករំលែកព័តមាននេះ