រាជធានីភ្នំពេញ ៖ សម្តេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិបានស្នើឲ្យប្រជាពលរដ្ឋកុំចាញ់បោកជនខិលខូចមួយចំនួនដែលធ្វើឲ្យខ្លួនល្មើសច្បាប់ ពាក់ព័ន្ធនឹងផ្តួលរំលំរាជរដ្ឋាភិបាល ។ សម្តេច…
រាជធានីភ្នំពេញ ៖ សម្តេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិបានស្នើឲ្យប្រជាពលរដ្ឋកុំចាញ់បោកជនខិលខូចមួយចំនួនដែលធ្វើឲ្យខ្លួនល្មើសច្បាប់ ពាក់ព័ន្ធនឹងផ្តួលរំលំរាជរដ្ឋាភិបាល ។ សម្តេច ទៀ បាញ់ បានសរសេរលើបណ្តាញសង្គមនៅថ្ងៃទី២២ សីហានេះថា «សូមបងប្អូនប្រជាពលរដ្ឋទាំងអស់ មេត្តាប្រុងប្រយ័ត្នចំពោះការបោកប្រាស់របស់ជនខិលខូចមួយចំនួនដែលអាចធ្វើឱ្យបងប្អូនជាប់ពាក់ព័ន្ធនឹងអំពើល្មើសច្បាប់ផ្សេងៗ ជាពិសេសការចូលរួមប៉ុនប៉ងផ្តួលរំលំរាជរដ្ឋាភិបាលស្របច្បាប់ ដែលកើតចេញពីការបោះឆ្នោត»។
ជាមួយគ្នានោះដែរ សម្តេចក៏បានលើកឡើងថា ធនធានមនុស្សត្រូវបានបំផ្លាញស្ទើរគ្មានសល់នៅក្នុងរបបវាលពិឃាដ ហើយយើងស្ទើរតែមិនអាចរកអ្នកចេះដឹងបានក្រោយថ្ងៃរំដោះឆ្នាំ១៩៧៩ ។ នេះ គឺជាឧបសគ្គដ៏ធំមួយដែលយើងបានជួបប្រទះនៅក្នុងដំណើរការនៃការអភិវឌ្ឍប្រទេស ព្រោះធនធានមនុស្សជាកត្តាចាំបាច់បំផុតមិនអាចខ្វះបាន ។ សម្តេចបន្តថា ដោយមើលឃើញពីភាពចាំបាច់នេះរាជរដ្ឋាភិបាលបានខិតខំប្រឹងប្រែងគ្រប់បែបយ៉ាង ដើម្បីកសាងធនធានមនុស្ស ។ ជាលទ្ធផលសាលារៀនរាប់ម៉ឺនខ្នងត្រូវបានជួសជុល និងកសាងឡើង គ្រឹះស្ថានអប់រំសម្រាប់ថ្នាក់ឧត្តមសិក្សា និងក្រោយឧត្តមសិក្សារាប់រយត្រូវបានបង្កើតឡើង ដែលបានរួមចំណែកយ៉ាងសកម្មក្នុងការបណ្តុះបណ្តាលសិស្ស និស្សិតរបស់យើង ។
មិនតែប៉ុណ្ណោះនិស្សិតរបស់យើងរាប់ពាន់នាក់បានទទួលការបណ្តុះបណ្តាលថ្នាក់បរិញ្ញាបត្រ បរិញ្ញាបត្រជាន់ខ្ពស់ និងបណ្ឌិតពីបរទេសថែមទៀតផង ។ សម្តេចបន្ថែមថា ការរីកចម្រើនផ្នែកធនធានមនុស្សរបស់កម្ពុជាបានរួមចំណែកយ៉ាងសំខាន់ក្នុងការទាក់ទាញវិនិយោគិនបរទេសយ៉ាងច្រើនសន្ធឹកសន្ធាប់មកវិនិយោគក្នុងប្រទេសនាអំឡុងពីរទសវត្សរ៍ចុងក្រោយនេះដែលបានធ្វើឱ្យសេដ្ឋកិច្ចជាតិរីកចម្រើនគួរជាទីមោទនៈ ៕ កែសម្រួលដោយ ៖ សុឃាក់
ចែករំលែកព័តមាននេះ