ខេត្តតាកែវ ៖ ប្រជាពលរដ្ឋប្រមាណជា៣០០នាក់មកពីឃុំត្នោត ស្រុកបាទី នៅថ្ងៃទី២៨ កុម្ភៈ២០១៤ បានលើកគ្នាមកតវ៉ាបិទផ្លូវទាមទារឱ្យក្រុមហ៊ុនGL (ក្រុមហ៊ុនដែលបានទទួលសិទ្ធិរំលាយយកថ្មភ្នំចំប៉ាប់យកទៅលក់) ធ្វើផ្លូវក្រាលកៅស៊ូបញ្ចៀសដីហុយចាប់ពីភ្នំចំប៉ាប់រហូតដល់ភូមិរបស់ពួកគាត់ និងទាមទារឱ្យក្រុមហ៊ុននេះអនុវត្តតាមការសន្យារបស់ខ្លួន។
តំណាងប្រជាពលរដ្ឋដែលនាំគ្នាមកតវ៉ាបិទផ្លូវលំនេះបាននិយាយថា ថ្ងៃនេះពួកគាត់មកពីភូមិចំនួន៣ គឺភូមិរំចេក ភូមិទំបន់ ភូមិពែ ឃុំត្នោតប្រមាណជិត៣០០នាក់មកតវ៉ាបិទផ្លូវមិនឱ្យរថយន្តដឹកថ្មរបស់ក្រុមហ៊ុន GL ដំណើរការបានដោយសារក្រុមហ៊ុននេះបានសន្យាជាមួយប្រជាពលរដ្ឋជាច្រើនឆ្នាំមកហើយថា ចាក់ក្រាលកៅស៊ូធ្វើផ្លូវចាប់ពីភ្នំចំប៉ាប់រហូតដល់ភូមិរបស់ពួកគាត់ចម្ងាយ២.៥០០ម៉ែត្រ តែរហូតមកដល់ពេលនេះមិនឃើញអនុវត្តតាមការសន្យាសោះ ។
ជាមួយគ្នានោះដែរពួកគាត់ក៏បានចោទប្រកាន់អាជ្ញាធរស្រុកថាបានឃុបឃិតជាមួយក្រុមហ៊ុននេះទើបមិនបានខ្វល់ខ្វាយដល់ការលំបាករបស់ប្រជាពលរដ្ឋដែលរស់នៅអមសងខាងផ្លូវក្នុងភូមិដែលរថយន្តដឹកដីទៅមកហុយប៉ះពាល់ដល់សុខភាព និងការរស់នៅរបស់ពួកគាត់។
ចែករំលែកព័តមាននេះ