រាជធានីភ្នំពេញ ៖ ស្ត្រីជាមេការកាន់បន្ទប់ខារ៉ាអូខេស្កាយផតម្នាក់ បានចោទប្រកាន់ភ្ញៀវថា វាយនាងបណ្តាលឱ្យដួល ខណៈដែលនាងសរសៃខ្ចីទើបនឹងសម្រាលកូនបាន៣ខែ ហើយទាមទារឱ្យភ្ញៀវសងជំងឺចិត្ត១.០០០ដុល្លារ។
រាជធានីភ្នំពេញ ៖ ស្ត្រីជាមេការកាន់បន្ទប់ខារ៉ាអូខេស្កាយផតម្នាក់ បានចោទប្រកាន់ភ្ញៀវថា វាយនាងបណ្តាលឱ្យដួល ខណៈដែលនាងសរសៃខ្ចីទើបនឹងសម្រាលកូនបាន៣ខែ ហើយទាមទារឱ្យភ្ញៀវសងជំងឺចិត្ត១.០០០ដុល្លារ។
ហេតុការណ៍នេះបង្កឱ្យមានការភ្ញាក់ផ្អើលកាលពីវេលាម៉ោង១២ និង៣០នាទីរំលងអធ្រាត្រឈានចូលថ្ងៃទី៨ កុម្ភៈ ២០១៤ នៅខារ៉ាអូខេ និងផ្ទះសំណាក់ស្កាយផត ស្ថិតតាមបណ្តោយផ្លូវលេខ២០០៤ សង្កាត់កាកាប ខណ្ឌពោធិ៍សែនជ័យ។
ប្រភពព័ត៌មានពីភ្ញៀវដែលចូលច្រៀងខារ៉ាអូខេបានឱ្យដឹងថា មុនពេលកើតហេតុ ខ្លួន និងមិត្តភក្តិចំនួន៤នាក់បាននាំគ្នាចូលទៅច្រៀងខារ៉ាអូខេ ដោយមានស្ត្រីកំដឆ្វេងស្តាំ និងស្ត្រីមេការម្នាក់ជាអ្នកកាន់បន្ទប់ចាំចាក់បទចម្រៀងបណ្តើរ ផឹកស៊ីជាមួយភ្ញៀវបណ្តើររហូតស្រវឹងទាំងអស់គ្នា។ ខណៈពេលកំពុងស្រវឹងបុរសជាភ្ញៀវបានដណ្តើមយកតេឡេបញ្ជាបទចម្រៀងយកមកចុចត្រូវស្ត្រីមេការរូបនោះទាញដណ្តើមយកវិញ ព្រោះខ្លាចខូចត្រូវកាត់ប្រាក់ខែធ្វើឱ្យមានការប្រទាញប្រទង់គ្នាបណ្តាលឱ្យស្ត្រីជាមេការពាក់ស្បែកជើងកែងចោតរអិលដួលខ្លួនឯងហើយចោទថា ខ្លួនជាអ្នកវាយ។
ចំណែកប្រភពព័ត៌មានពីស្ត្រីមេការអះអាងថា ភ្ញៀវបានដណ្តើមយកតេឡេចុចបញ្ជាបទចម្រៀងពីនាង នាងមិនព្រមទើបភ្ញៀវរូបនោះវាយនាងឱ្យដួលទាំងនាងសរសៃខ្ចីទើបសម្រាលកូនបាន៣ខែ។
ចំពោះករណីនេះត្រូវបានឈ្មោះលី សីហា ជាមេការក្លឹបហៅភាគីទាំង២មកធ្វើការសម្របសម្រួលគ្នា ដោយភាគីខាងស្ត្រីមេការទាមទារសំណង១.០០០ដុល្លារ ព្រោះគេនៅសរសៃខ្ចី ចំណែកភ្ញៀវដែលចូលច្រៀងខារ៉ាអូខេមានប្រាក់តែ១០០ដុល្លារ នាងមិនព្រមយក មេការក្លឹបនោះក៏បានឃាត់ភ្ញៀវមិនឱ្យចេញពីក្លឹបរហូតជិត២ម៉ោងទើបបង្កឱ្យមានការភ្ញាក់ផ្អើលដល់សមត្ថកិច្ចចុះទៅជួយអន្តរាគមន៍ និងប្រាប់មេការឱ្យនាំភាគីទាំង២ទៅដោះស្រាយគ្នានៅប៉ុស្តិ៍នគរបាលកាកាប។ ខណៈពេលភាគីទាំង២យល់ព្រមទៅដោះស្រាយនៅប៉ុស្តិ៍ ហើយបានជិះម៉ូតូចេញទៅរៀងៗខ្លួន។ ពេលទៅដល់ប៉ុស្តិ៍នគរបាលកាកាបបែរជាបាត់ក្រុមខាងភ្ញៀវគេចទៅផ្ទះបាត់ នៅសល់តែស្រ្តីជាមេការមិនដឹងជាទៅទាមទារសំណងពីខាងណាក៏ត្រឡប់ទៅផ្ទះវិញទាំងអត់បានលុយមួយរៀល ៕
ចែករំលែកព័តមាននេះ