ខេត្តកំពង់ចាម ៖ ថៅកែឡឥដ្ឋម្នាក់ឈ្មោះ ម៉េន សុធា ភេទប្រុស អាយុ ៤៩ឆ្នាំ រស់នៅភូមិព្រៃទទឹង ឃុំជ្រៃវៀន ស្រុកព្រៃឈរ បានប្រើអំពើហិង្សាវាយទាត់ធាក់លើកម្មកររបស់ខ្លួនម្នាក់ឈ្មោះ ហេង វិរៈ ហៅល័ក្ខ ភេទប្រុស អាយុ ២៧ឆ្នាំ បណ្តាលឲ្យរងរបួសរហូតសន្លប់ ដែលហេតុការណ៍នេះ បានកើតឡើងនៅវេលាម៉ោង ១១ និង ៤៥នាទី ព្រឹកថ្ងៃទី២៧ កុម្ភៈ ២០១៤ ស្ថិតនៅភូមិទួលតាកោ ឃុំជ្រៃវៀន ស្រុកព្រៃឈរ ក្រោយកើតហេតុថៅកែគ្មានចិត្តមេត្តាធម៌រូបនោះ បានរត់គេចខ្លួនបាត់ ខណៈដែលកម្លាំងសមត្ថកិច្ចកំពុងតាមប្រមាញ់ចាប់ខ្លួន។
លោកវរសេនីយ៍ត្រី កែវ ស៊ាងហ៊ន់ អធិការនគរបាលស្រុកព្រៃឈរ បានប្រាប់ឲ្យដឹងថា កម្មកររងគ្រោះឈ្មោះ ល័ក្ខ បានមកបម្រើការងារជាអ្នកបើកបរតៃកុងអាអេច ឲ្យថៅកែឡឥដ្ឋឈ្មោះ សុធា ហៅណុយ ដែលមានទីតាំងស្ថិតនៅភូមិឃុំកើតហេតុខាងលើ នាពេលកន្លងទៅថ្មីៗនេះ ដែលបើកបរទំនងជាខ្វះការប្រុងប្រយ័ត្នជាហេតុបណ្តាលឲ្យបែកកញ្ចក់គ្រឿងចក្រអាអេចនោះ។
បន្ទាប់មក ថៅកែឡឥដ្ឋបានហៅកម្មករនេះ មកសួរនាំដោយបានសុំកាត់ប្រាក់ខែក្នុង ១ខែ ចំនួន ១០ដុល្លារ ជារៀងរាល់ខែរហូតរួចតម្លៃកញ្ចក់ដែលបាក់នោះ។ លុះមកដល់ព្រឹកថ្ងៃទី២៧ កុម្ភៈ ពេលដែលកម្មករឈ្មោះ ល័ក្ខ ធ្វើការបានប្រហែលជាម៉ោងជាង ១០ព្រឹក ក៏បានរត់ចេញពីកន្លែងឡឥដ្ឋ ដើម្បីត្រលប់មកផ្ទះវិញ ស្របពេលនោះ ថៅកែដឹងថា បាត់កម្មករ ក៏បានជិះម៉ូតូតាមរក ក៏ប្រទះឃើញតាមផ្លូវកំពុងតែជិះម៉ូតូ ១គ្រឿង ហើយបានហៅឲ្យឈប់ និងបានឲ្យត្រលប់មកធ្វើការជាធម្មតាវិញ។
លុះជិះម៉ូតូជិតដល់ឡឥដ្ឋ ពេលដែលឃើញផ្ទះអ្នកភូមិកំពុងតែធ្វើពិធីភ្ជាប់ពាក្យកូនក្រមុំកូនកម្លោះនោះ កម្មករឈ្មោះ ល័ក្ខ បានលោតចុះពីលើម៉ូតូរត់សំដៅចូលទៅក្នុងផ្ទះគេ ក៏ត្រូវថៅកែរបស់ខ្លួនទៅតាមដឹកដៃចេញមកក្រៅវិញ ទើបថៅកែប្រើហិង្សាវាយលើរាងកាយកម្មករនេះ រហូតសន្លប់ ហើយបានរត់គេចខ្លួនបាត់ ត្រូវជាប់ចោទពីបទប្រើហិង្សាដោយចេតនា៕
ចែករំលែកព័តមាននេះ