រាជធានីភ្នំពេញ ៖ សំណង់ភូមិគ្រឹះមួយកន្លែងត្រូវបានអាជ្ញាធរខណ្ឌឬស្សីកែវចុះទៅដកហូតយកសម្ភារៈមួយចំនួនដោយចោទថា សំណង់នោះបានសាងសង់ដោយអត់ច្បាប់ និងមិនស្តាប់តាមការណែនាំរបស់អាជ្ញាធរ ។
ការចុះដកហូតដកហូតសម្ភារៈសំណង់ខាងលើនេះធ្វើឡើងកាលពីវេលាម៉ោងប្រមាណ១០និង១០នាទីព្រឹកថ្ងៃទី២០ ខែសីហា ឆ្នាំ២០១៩ នៅចំណុចសំណង់ភូមិគ្រឹះដែលទើបតែសាងសង់ថ្មី ស្ថិតនៅភូមិឃ្លាំងសាំង សង្កាត់ឬស្សីកែវ ខណ្ឌឬស្សីកែវ រាជធានីភ្នំពេញ។
តាមអាជ្ញាធរខណ្ឌឬស្សីកែវបានអោយដឹងថា សំណង់ភូមិគ្រឹះខាងលើនេះបានសាងសង់ឡើង ជាច្រើនខែមកហើយ ដោយអត់ច្បាប់ ។ កន្លងមកអាជ្ញាធរធ្លាប់ចុះផ្អាកការសាងសង់ ព្រមទាំងណែនាំអោយម្ចាស់ទៅសុំច្បាប់អនុញ្ញាតអោយបានត្រឹមត្រូវដែរ តែម្ចាស់មិនស្តាប់តាមការណែនាំនៅតែបន្តសាងសង់រហូតជិតរួចរាល់ដោយអត់ច្បាប់ ទើបអាជ្ញាធរចុះទៅដកហូតសម្ភារៈតែម្តង។
តាមប្រភពព័ត៌មានបានអោយដឹងទៀតថា សម្ភារៈដែលសមត្ថកិច្ចដកហូតរួមមានម៉ូទ័របុក, ម៉ូទ័រកាត់ប៉ែល, ការ៉ូ,ទុយោ និងខ្សែភ្លើង ព្រមទាំងសម្ភារៈមួយចំនួនទៀតត្រូវបានអាជ្ញាធរដកហូតប្រមូលដាក់តាមរថយន្តបញ្ជូនទៅកាន់សាលាខណ្ឌឬស្សីកែវ ព្រមទាំងណែនាំអោយម្ចាស់ និងមេការសំណង់បញ្ឈប់ការសាងសង់បន្តទៀត។
ទោះបីជាយ៉ាងណា មហាជនមានការឆ្ងល់ថា សំណង់ភូមិគ្រឹះមួយទាំងមូលបានដំណើរការប្រមាណ៨០ភាគរយជិតរួចរាល់ទៅហើយ ទើបអាជ្ញាធរចុះចាប់ដកហូតសម្ភារៈ និងចោទថាអត់ច្បាប់ ។ គេសង្ស័យថា មានការឃុបជិតគ្នាជាមួយមន្ត្រីថ្នាក់មូលដ្ឋានមួយចំនួន ៕ (កែសម្រួលដោយ ៖ ធីតា)
ចែករំលែកព័តមាននេះ