រាជធានីភ្នំពេញ៖ លោកស្វាយ សំអឿ គឺជាអ្នកនិពន្ធទំនុកច្រៀង និងបទភ្លេងល្បីឈ្មោះមួយរូបជំនាន់លោកស៊ីន ស៊ីសាមុត ។ ស្នាដៃរបស់លោកជាច្រើនបន្សល់ទុកមកដល់បច្ចុប្បន្ន មានដូចជាបទខ្យងក្ដក់ ស្រមោលអក្ខរា ស្ទឹងកែវ និងបទនិស្ស័យកម្មព្រះមោក្ខលាន ជាដើម ។
យោងតាមសេចក្តីប្រកាសជូនដំណឹងរបស់ក្រសួងវប្បធម៌ និងវិចិត្រសិល្បៈកាលពីថ្ងៃទី១៦ សីហា ២០១៩ បានសម្រេចប្រគល់សិទ្ធិគ្រប់គ្រងស្នាដៃបទចម្រៀងចំនួន៦៥បទ ជូនលោកស្រីដុំ សំអូន ភរិយា លោកស្វាយ សំអឿ ។
ក្រសួងវប្បធម៌ និងវិចិត្រសិល្បៈ បន្ទាប់ពីបានពិនិត្យ និងសិក្សាស្រាវជ្រាវ យ៉ាងយកចិត្តទុកដាក់ លើបទចម្រៀងទាំង៦៥បទ ដែលជាស្នាដៃនិពន្ធបទភ្លេង និងទំនុកច្រៀងដោយលោកស្វាយ សំអឿ តាមការស្នើសុំសិទ្ធិគ្រប់គ្រងរបស់លោកស្រីដុំ សំអូន ភរិយារបស់លោករួចមក ក្រសួងក៏សម្រេចប្រគល់សិទ្ធិគ្រប់គ្រងស្នាដៃបទចម្រៀងទាំង៦៥បទ (សូមមើលបញ្ជីរាយឈ្មោះបទចម្រៀង) ជូនលោកស្រីដុំ សំអូន គ្រប់គ្រងតាមការស្នើសុំ នាពេលខាងមុខ ។
បទចម្រៀងទាំង៦៥បទនោះដូចជាបទពេលអូនឃ្លាតទៅ ,ចៅដក ,កាលណាផ្ការីក ,សំណព្វចិត្ត និងបទសំណៅកាកី ជាដើម ។ សេចក្តីប្រកាសជូនដំណឹងនេះ ក្រសួងវប្បធម៌ និងវិចិត្រសិល្បៈនឹងបើកសិទ្ធិប្តឹងទាស់ជូនដល់ភាគីពាក់ព័ន្ធទាំអស់រយៈពេល១ខែ ដោយគិតពីថ្ងៃប្រកាសជូនដំណឹងនេះតទៅ ។
កន្លងមកក្រុមគ្រួសារលោកស៊ីន ស៊ីសាមុត ក្រុមគ្រួសារអ្នកស្រីរស់ សេរីសុទ្ធា និងក្រុមគ្រួសារលោកគង្គ ប៊ុនឈឿន ក៏ទទួលបានសិទ្ធិគ្រប់គ្រងលើបទចម្រៀង ដូចជាភរិយាលោកស្វាយ សំអឿ ដែរ ៕
ចែករំលែកព័តមាននេះ