ដោយសារតែអង្ករសរីរាង្គជាប្រភេទអង្ករដែលផលិតឡើងមិនប្រើប្រាស់សារធាតុគីមី និងថ្នាំពុល ដូច្នេះអង្ករសរីរាង្គវាផ្ដល់នូវអត្ថប្រយោជន៍ជាច្រើនចម្រើនដល់សុខភាពអ្នកទទួលទាន ។ លោកបណ្ឌិតយ៉ង សាំងកុមារ ប្រធានអង្គការសេដាក់បានធ្វើការពន្យល់ដូចខាងក្រោម ៖
១-អត្ថប្រយោជន៍ចំពោះសុខភាព ៖ ទាំងអ្នកផលិតនិងអ្នកប្រើប្រាស់នឹងមិនទទួលរងនូវឥទ្ធិពលរបស់ថ្នាំគីមីឡើយ ព្រោះអង្ករសរីរាង្គមិនមានសារធាតុគីមី ។
២-ការផ្គត់ផ្គង់សារធាតុចិញ្ចឹម៖ ដោយសារអង្ករសរីរាង្គផ្ដោតលើការផលិតដោយប្រើជីធម្មជាតិទាំងស្រុងដូច្នេះវាអាចផ្គត់ផ្គង់សារធាតុចិញ្ចឹមដល់អ្នកប្រើប្រាស់ ឬបរិភោគបានច្រើនជាងអង្ករធម្មតា ។
៣-ជីជាតិដី ៖ ការផលិតតាមសរីរាង្គដោយប្រើប្រាស់ជីធម្មជាតិវានាំឱ្យដីមានជីជាតិយូរអង្វែងដែលអាចធានាបាននូវនិរន្តរភាពសន្ដិសុខស្បៀង ។
៤-បរិស្ថានជុំវិញ៖ តាមរយៈការមិនប្រើប្រាស់សារធាតុគីមី ពិសេសជីគីមី និងថ្នាំពុលវានឹងមិនធ្វើឱ្យប៉ះពាល់ទៅដល់ទឹកនិងជីវិតសត្វជាច្រើនផ្សេងទៀតនោះដែរ ។
ភាពខុសគ្នារវាងអង្ករសរីរាង្គ និងអង្ករធម្មតា
បើតាមការពន្យល់របស់លោកប្រធានអង្គការសេដាក់ឱ្យដឹងថា អង្ករគេអាចបែងចែកជាពីរប្រភេទគឺអង្ករធម្មតា និងអង្ករសរីរាង្គដោយយោងទៅលើកត្ដាវិនិច័្ឆយមួយចំនួនដូចខាងក្រោម៖
១-ទាក់ទងនឹងការផលិត៖ ចំពោះអង្ករសរីរាង្គគឺយើងឈរលើគោលការណ៍ធម្មជាតិទាំងស្រុងដោយមិនអាស្រ័យលើសារធាតុសំយោគដូចជា គីមី និងថ្នាំពុលឡើយដោយយើងផ្ដោតសំខាន់តែទៅលើការបង្កើនជីជាតិដីតាមរយៈការប្រើប្រាស់ជីធម្មជាតិហើយយើងផ្ដោតសំខាន់លើការការពារដំណាំតាមរយៈការអនុវត្តនូវបច្ចេកទេសជាច្រើនដែលផ្ដុំចូលគ្នាដូចជាថ្នាំផ្សំពីរុក្ខជាតិជាដើម ។ ល។ ដោយឡែកការធ្វើតាមកសិកម្មធម្មតា (អង្ករធម្មតា) វាច្រើនតែ ងាកមកប្រើប្រាស់ជីគីមី និងថ្នាំពុលក្នុងការផលិត ។
២-ការកែច្នៃវេចខ្ចប់ ទុកដាក់ ៖ ចំពោះអង្ករសរីរាង្គគឺយើងអត់មានប្រើប្រាស់នូវសារធាតុគីមីអ្វីបន្ថែម ដើម្បីឱ្យវាមានក្លិនក្រអូប ឬទុកបានយូរនោះទេ ដោយយើងទុកដាក់វាជាលក្ខណៈធម្មជាតិតែម្ដង ។ ប៉ុន្តែចំពោះអង្ករធម្មតាគេអាចប្រើសារធាតុគីមីបន្ថែមដើម្បីការពារកុំឱ្យខ្មូតស៊ីឱ្យទុកបានយូរ និងបន្ថែមនូវជាតិថ្នាំមួយចំនួនដើម្បីឱ្យមានក្លិនក្រអូបជាដើម ។
ហេតុអ្វីចាំបាច់ងាកមកបរិភោគអង្ករសរីរាង្គ ?
ឆ្លើយតបនឹងសំណួរនេះលោកបណ្ឌិតយ៉ង សាំងកុមារ បានពន្យល់ថា កាលពីដើមឡើយការផលិតអង្កររបស់យើងជាទូទៅគឺមិនសូវមានប្រើប្រាស់សារធាតុគីមីអ្វីនោះទេ ប៉ុន្តែឥឡូវនៅសម័យទំនើបនេះយើងឃើញមានការប្រើប្រាស់នូវសារធាតុគីមីយ៉ាងច្រើនសម្បើមក្នុងការផលិតដូច្នេះអ្នកបរិភោគគួរតែងាកមកបរិភោគអង្ករសរីរាង្គ ទើបជាការប្រសើរ ពីព្រោះការបរិភោគអង្កសរីរាង្គវាសំខាន់ទី១ចំពោះសុខភាពដោយសារបរិមាណជាតិពុលនៅក្នុងអង្ករគ្មាន ឬមានតិចតួចបំផុត ទី២ ទាក់ទងនឹងសារធាតុចិញ្ចឹមដែលមានក្នុងអង្កសរីរាង្គដែលមានច្រើនជាងអង្ករធម្មតា និងទី៣ រសជាតិរបស់អង្ករសរីរាង្គល្អហើយឆ្ងាញ់ជាងអង្ករធម្មតា ។ លើសពីនេះអ្នកបរិភោគបានចូលរួមចំណែកដល់ប្រជាកសិករដែលគាត់ខិតខំផលិតដោយគិតគូរដល់បរិស្ថាន និងសុខភាព ។
លោកបញ្ជាក់ថា អតិថិជនប្រៀបបានដូចជាស្ដេចដែលការគាំទ្ររបស់គាត់ទៅលើអង្ករសរីរាង្គក៏ដូចជាទៅលើផលិតផលសរីរាង្គផ្សេងៗទៀតរួមចំណែកឱ្យកសិកម្មកម្ពុជាដើរចំទិសដៅទាក់ទងទៅនឹងនិរន្តរភាពធនធានធម្មជាតិ ទាក់ទងទៅនឹងសុខភាពអ្នកប្រើប្រាស់អ្នកបរិភោគ និងអ្នកផលិតដែលវាជាធនធានដ៏សំខាន់បំផុតសម្រាប់មនុស្សគ្រប់រូប ៕
ចែករំលែកព័តមាននេះ