ពេលកុមារក្តៅខ្លួនឡើងខ្ពស់ ជាសញ្ញាប្រាប់ថា កំពុងតែមានការជ្រៀតជ្រែករបស់ពពួកមេរោគគប្បីយកចិត្តទុកដាក់ថែទាំដោយការឱ្យទទួលទានថ្នាំប្រភេទប៉ារ៉ាសេតាម៉ុល ទទួលទានទឹក និងការសម្រាកគ្រាប់គ្រាន់ អាចធ្វើឱ្យកុមារមានអាការៈធូរស្រាល ។ គ្រុនក្តៅ ភាគច្រើនកើតមានតែ២ទៅ៣ថ្ងៃប៉ុណ្ណោះ ។ ប៉ុន្តែជួនកាលវាអាចកើតមានក្នុងរយៈពេលយូរបង្កទៅជាជំងឺផ្សេងៗ ។
ជាធម្មតារាងកាយមនុស្សមានសីតុណ្ហភាព៣៧អង្សា ។ ក្នុងករណីកម្តៅឡើងរហូតដល់៣៩អង្សា វាជាអាការៈគ្រុនក្តៅស្រាល និងជាសញ្ញាប្រាប់ថា រាងកាយកំពុងប្រឆាំងនឹងមេរោគ ។ បើកម្តៅរាងកាយឡើងខ្ពស់ជាងនេះ វាអាចធ្វើឱ្យកុមារមានអាម្មរណ៍មិនស្រួលក្នុងខ្លួន ដែលពួកគេអាចមានអាការៈគ្រុនរងា ឬគ្រុនញាក់ និងជួនកាលមានការចេញញើសច្រើនអាចខ្សោះជាតិទឹក ។ វាមានសារសំខាន់ដែលមាតាបិតាត្រូវគ្រប់គ្រងសីតុណ្ហភាពរាងកាយរបស់កុមារឱ្យបានជាប់លាប់ ពីព្រោះអាការៈគ្រុនក្តៅខ្លាំងអាចបង្កជាបញ្ហាធ្ងន់ ។ បើសិនជាកម្តៅមិនថយចុះអាចមានការប្រកាច់ ឬរលាកខួរក្បាល ។
លោកវេជ្ជបណ្ឌិតលឹម ហ៊ុយ ប្រធានផ្នែកវេជ្ជសាស្ត្រនៃក្រុមហ៊ុនឱសថសាណូហ្វីបានមានប្រសាសន៍ថា នៅពេលគ្រុនក្តៅខ្លាំង (៤០អង្សា) មាតាបិតាត្រូវព្យាយាមបញ្ចុះកម្តៅកូនជាបន្ទាន់តាមដែលអាចធ្វើទៅបាន ត្រូវឱ្យសម្រាកនៅកន្លែងត្រជាក់ និងបន្ថយកម្តៅដោយប្រើក្រណាត់ជ្រលក់ទឹកដាក់នៅលើថ្ងាស និងដើមទ្រូង ព្រមទាំងទទួលទានថ្នាំដូចជាថ្នាំ ប៉ារ៉ាសេតាម៉ុល តាមកម្រិតអាយុអ្នកជំងឺ ។ កុមារមានអាការៈគ្រុនក្តៅអាចមានភាពធូរស្រាលក្នុងអំឡុងពេលបីថ្ងៃតាមរយៈការថែទាំនៅផ្ទះដោយយកចិត្តទុកដាក់លើការទទួលទានថ្នាំ ការទទួលទានទឹកជាប្រចាំ និងការសម្រាកឱ្យបានច្រើន ។ ចំពោះក្មេងមានអាយុក្រោម៣ខែ ត្រូវនាំទៅជួបវេជ្ជបណ្ឌិតជាបន្ទាន់បើមានអាការៈគ្រុនក្តៅ ព្រោះវាអាចបង្កជាជំងឺធ្ងន់ធ្ងរ ។ ករណីអាការៈអ្នកជំងឺមិនមានភាពធូរស្រាលបែរជាប្រកាច់ ឬសន្លប់អ្នកត្រូវប្រញាប់នាំអ្នកជំងឺទៅមន្ទីរពេទ្យជាបន្ទាន់ ។
កម្រិតនៃការប្រើប្រាស់ថ្នាំប៉ារ៉ាសេតាម៉ុលត្រូវធៀបនឹងទម្ងន់ ដូចជាទម្រង់រាងកាយ មានទម្ងន់៦ទៅ៨គីឡូក្រាម ឬអាយុ៣-៩ខែ ប្រើកម្រិតថ្នាំ១០០មីល្លីក្រាម ។ ទម្ងន់៨ទៅ១២គីឡូក្រាមអាយុ៦-២៤ខែ ប្រើថ្នាំ១៥០មីល្លីក្រាម ។ ១២ទៅ១៦គីឡូក្រាម អាយុ២-៥ឆ្នាំ ប្រើកម្រិតថ្នាំ២០០មីល្លីក្រាម ។ បើទម្ងន់១៦-២៤គីឡូក្រាម អាយុ៤-៩ឆ្នាំ ប្រើថ្នាំ៣០០មីល្លីក្រាម ។ ទម្ងន់២៥ទៅ៣០គីឡូក្រាម អាយុ៩-១១ឆ្នាំ ត្រូវប្រើថ្នាំ៣០០មីល្លីក្រាម ។ ២៧-៤០គីឡូក្រាមអាយុ៨-១៣ឆ្នាំ ប្រើថ្នាំ៥០០មីល្លីក្រាម ។ ៤១ទៅ៥០គីឡូក្រាម ឬអាយុ១២-១៥ឆ្នាំ ប្រើថ្នាំ៥០០មីល្លីក្រាម ។ ទម្ងន់ចាប់ពី៥០ឡើង ឬសម្រាប់មនុស្សធំ ត្រូវប្រើថ្នាំ ៥០០មីល្លីក្រាម -១.០០០មីល្លីក្រាម ហើយសូមប្រើប្រាស់ថ្នាំដែលផ្តល់ដោយក្រុមហ៊ុនឱសថដែលមានគុណភាពខ្ពស់ ។
ក្នុងករណីកុមារក្តៅខ្លាំង លើសពី៤០អង្សាត្រូវបញ្ចុះកម្តៅជាបន្ទាន់ដោយដាក់អ្នកជំងឺនៅកន្លែងដែលត្រជាក់ រួចដោះសម្លៀកបំពាក់គាត់ចេញទាំងអស់ និងត្រូវបក់ឱ្យគាត់ផងដែរ ។
ហើយត្រូវយកក្រណាត់ជ្រលក់ទឹកត្រជាក់ល្មមទៅដាក់លើទ្រូងនិងថ្ងាសរបស់អ្នកជំងឺ ហើយប្តូរក្រណាត់ជាញឹកញាប់ ដើម្បីរក្សាវាឱ្យនៅ ត្រជាក់ល្មមដដែល ។ ត្រូវធ្វើរបៀបនេះ រហូតដល់កម្តៅថយចុះនៅក្រោម៣៨អង្សា ។ អ្នកជំងឺទទួលទានទឹកត្រជាក់ល្មមឱ្យបានច្រើន និងលេបថ្នាំបញ្ចុះកម្តៅ តែបើសិនជាកម្តៅមិនថយចុះក្នុងពេលពីរឬបីថ្ងៃត្រូវនាំកុមារទៅជួបគ្រូពេទ្យជាបន្ទាន់ ៕
ចែករំលែកព័តមាននេះ