មកដឹងពីមូលហេតុដែល Kylie Jenner ក្លាយជាមហាសេដ្ឋីវ័យក្មេងបំផុតលើលោក

ថ្ងៃទី ១៤ ខែ សីហា ឆ្នាំ ២០១៩
ម៉ោង ១៥:៥១
ណៃ ដាលីន

យោងតាមទស្សនាវដ្តី Forbes បានឲ្យដឹងថានាង Kylie Jenner ដែលមានអាយុ២១ឆ្នាំ គឺជាមហាសេដ្ឋីវ័យក្មេងជាងគេលើពិភពលោក ដែលមានទ្រព្យសម្បត្តិសរុបប្រមាណ១ពាន់លានដុល្លារ ។ កត្តាដែលជួយបង្កើនទ្រព្យសម្បត្តិរបស់នាងជាងគេ គឺមកពីក្រុមហ៊ុន Kylie Cosmetic របស់ខ្លួនដែលមានតម្លៃប្រមាណ៩០០លានដុល្លារ ។

Kyle Cosmetics នឹងរកប្រាក់ចំណូលបានដល់ទៅ ១ពាន់លានដុល្លារនៅឆ្នាំ២០២២ទៀតផង ។ នាងក៏បានប្រាប់ដែរថានឹងព្យាយាមផ្តោតសា្មរតីលើក្រុមហ៊ុននេះ រហូតឲ្យកូនស្រី Stormi របស់ខ្លួនបន្តតំណែងនៅថ្ងៃអនាគត ។

អ្នករិះគន់មួយចំនួនលើបណ្តាញសង្គមបានចែករំលែកថា ភាពជោគជ័យរបស់នាង គឺមកពីនាងកើតក្នុងគ្រួសារដែលមានទ្រព្យសម្បត្តិ និងល្បីឈ្មោះប៉ុណ្ណោះ តែយើងត្រូវទទួលស្គាល់ថា នាងក៏បានខិតខំប្រឹងប្រែងក្នុងនាមជាសហគ្រិនមួយរូបដែរ ។

ក្រៅពីក្រុមហ៊ុននេះ គឺមានមួយផ្នែកទៀតនៃប្រភពចំណូល គឺបានមកពីកម្មវិធីទូរស័ព្ទដែលមានឈ្មោះថា Kylie Jenner Official App និងការលក់ផលិតផលផ្សេងៗមកពី The Kylie Shop ការលក់សម្លៀកបំពាក់សៀវភៅ កម្មវិធីទូរទស្សន៍ Keeping Up With the Kardashians និង Life of Kylie រួមទាំងការសហការជាមួយនឹងយីហោល្បីៗដូចជា Adidas, Topshop និង Quay Australia ជាដើម ។

នាងបានចាប់ផ្តើមក្រុមហ៊ុនខ្លួនឯង ព្រោះតែចំណូលចិត្តក្នុងការមើលវីដេអូលើ YouTube ទាក់ទិននឹងការផាត់មុខតាំងពីក្មេងមក ។ នាងបានប្រាប់ដល់ Forbes ថា ការផាត់មុខជួយឲ្យនាងមានជំនឿចិត្តលើខ្លួនឯង ។ ផលិតផលរបស់នាងតែងតែលក់អស់ ក្នុងរយៈពេលមួយរំពេច ព្រោះតែនាងតែងតែចេញលក់ក្នុងចំនួនមួយកំណត់រាល់ពេលដាក់លក់ដំបូង ។ លើសពីនេះទៅទៀតនាងក៏បានឲ្យដឹងថា ភាពជោគជ័យក៏កើតមានឡើង ព្រោះតែបណ្តាញសង្គមផងដែរ ។

នាង Jenner មានអ្នក Follwer លើ Instagram ដល់ទៅ១២៨លាននាក់ ហើយប្រើបណ្តាញសង្គមរបស់ខ្លួន ដើម្បីផ្សព្វផ្សាយពីផលិតផលដល់អតិថិជន និងអ្នកគាំទ្រ ៕ កែសម្រួលដោយ ៖ សុឃាក់