ប្រយ័ត្នបញ្ហាតូចៗដែលអាចក្លាយជាធំក្នុងអាជីវកម្មរបស់អ្នក

ថ្ងៃទី ១៤ ខែ សីហា ឆ្នាំ ២០១៩

ម៉ោង ១៥:៤២

ការដឹងពីបញ្ហាក្នុងអាជីវកម្មរបស់អ្នក គឺជារឿងល្អមួយ ព្រោះពេលដែលអ្នករកឃើញវាអ្នកអាចរកដំណោះស្រាយបាន ដែលជួយឲ្យក្រុមហ៊ុនអ្នកកាន់តែមានប្រសិទ្ធិភាព និងរកប្រាក់ចំណូលបានកាន់តែច្រើន ។ បញ្ហាពិតកើតមានឡើងពេលដែលអាជីវករមិនព្យាយាមរកដំណោះស្រាយ ដើម្បីឆ្លងកាត់បញ្ហាតូចៗ ។

លោក Brian D. Evans ដែលជាអ្នកផ្តល់ទីប្រឹក្សាក្រុមហ៊ុនជាច្រើន បានចែករំលែកពីបញ្ហាតូចៗមួយចំនួនក្នុងអាជីវកម្មដែលអាចក្លាយទៅជាបញ្ហាធំ ប្រសិនបើអាជីវកម្មមើលរំលង ។ ១. ខ្វះការរៀបចំផែនការ និងយុទ្ធសាស្ត្រ ៖ យុទ្ធសាស្ត្រប្រៀបបានជាផែនទី ដែលអ្នកត្រូវដើរតាមក្នុងរយៈពេលពីមួយទៅពីរឆ្នាំខាងមុខ ។ ពេលដែលអ្នកមានយុទ្ធសាស្ត្រច្បាស់លាស់ហើយអ្នកអាចបង្កើតផែនការមួយ និងអនុវត្តវាបានមានប្រសិទ្ធិភាពជាងមុន ឧទាហរណ៍ដូចជា យុទ្ធសាស្ត្រក្នុងការរកបុគ្គលិក ឬបង្កើនការលក់ជាដើម ។ ក្រុមហ៊ុនបង្កើតថ្មីភាគច្រើនបរាជ័យព្រោះ ពួកគេមិនមានផែនការទាំងនេះ ដើម្បីសម្រេចគោលដៅ ។ ពួកគេមិនមានយុទ្ធសាស្ត្រ និងការលក់ជាដើម ។

២. បុគ្គលិកមិនល្អ ៖ ការស្វែងរកបុគ្គលិក គឺជាផ្នែកដ៏សំខាន់ដែលអាចប៉ះពាល់ដល់ការប្រកបអាជីវកម្មរបស់អ្នក ។ ក្រុមហ៊ុនមួយចំនួនសុខចិត្តយកបុគ្គលិកបែប Freelance ឬ ក្រៅម៉ោងឲ្យតែពួកគេទទួលបានគុណភាពខ្ពស់ ។

សម្រាប់ក្រុមហ៊ុនដែលមានបុគ្គលិកពេញម៉ោងវិញក៏អាចជួបនឹងបញ្ហាជាច្រើនដែរ ។ ដូច្នេះលោក Brian ផ្តល់យោបល់ឱ្យគិតពីប្រភេទមនុស្សដែលអ្នកត្រូវការក្នុងពេលបច្ចុប្បន្ន និងក្នុងរយៈពេលវែងរាល់ពេលដែលអ្នកធ្វើការសម្រេចចិត្តជ្រើសរើសបុគ្គលិក ។

៣. មិនមានការផ្តោតសំខាន់លើអ្វីមួយ ៖ អាជីវករដែលទើបតែជាប់ផ្តើមដំបូងភាគច្រើនជួបការលំបាកក្នុងការផ្តោតស្មារតី និងទិសដៅក្រុមហ៊ុនលើអ្វីមួយឲ្យបានពិតប្រាកដ ។ ពេលដែលអ្នកចាប់ផ្តើមដំបូងអ្នកអាចនឹងគិតថា មានឱកាសច្រើនដែលក្រុមហ៊ុនអ្នកគួរតែចាប់យកបើទោះជាឱកាសទាំងនោះមិនទាក់ទងគ្នាក៏ដោយ និងធ្វើការផ្លាស់ប្តូរទិសដៅក្រុមហ៊ុនតាមចិត្តជាដើម ។
ប៉ុន្តែអ្នកគួរដឹងថា ការផ្លាស់ប្តូរទិសដៅក្រុមហ៊ុនម្តង ហើយម្តងទៀតអាចបង្កឲ្យបុគ្គលិកបាត់បង់ជំនឿចិត្តលើក្រុមហ៊ុន និងប៉ះពាល់ដល់ការងាររបស់បុគ្គលិកផងដែរ ៕ កែសម្រួលដោយ ៖ សុឃាក់