សហគ្រិនគួរជាមនុស្សដែលវៃឆ្លាតស្រលាញ់ការងារ និងអាជីវកម្មរបស់ខ្លួនព្រមទាំងជាមនុស្សដែលមានមហិច្ឆតាខ្ពស់ ។ ប៉ុន្តែភាពវៃឆ្លាតទាំងនោះ មិនតែងតែមានន័យថា អាជីវករគ្រប់រូបអាចធ្វើការសម្រេចចិត្តបានត្រឹមត្រូវជារៀងរាល់ពេលទេ ។ ដោយហេតុដូចនេះបានជាយើងមើលឃើញអាជីវកម្មជាច្រើនបរាជ័យ ។
លោក Mark Cuban ដែលជាមហាសេដ្ឋីមួយរូប និងជាវិនិយោគិនក្នុងកម្មវិធី Shark Tank ដែលជួបជាមួយនឹងសហគ្រិនជាច្រើនបានចែករំលែកពីកំហុសឆ្គងធំៗរបស់សហគ្រិនដែលធ្វើឲ្យពួកគេបរាជ័យក្នុងអាជីវកម្មរបស់ខ្លួន ។
១. ការមិនមានចំណេះដឹងមូលដ្ឋានអាជីវកម្ម ៖ កត្តាមួយដែលលោក Cuban មិនពេញចិត្តជាងគេ គឺពេលដែលសហគ្រិនមិនមានចំណេះដឹងមូលដ្ឋានដូចជា ភាពខុសគ្នារវាងផលិតផល និងជម្រើស ។ ឧទាហរណ៍ ប្រសិនបើដៃគូប្រកួតប្រជែងរបស់អ្នកលក់អាវពណ៌ខៀវ ហើយអ្នកលក់អាវពណ៌ខៀវ និងក្រហមនោះ អ្នកគ្រាន់តែផ្តល់ជម្រើសដល់អតិថិជនប៉ុណ្ណោះមិនមែនផលិតផលថ្មីមួយទេ ។ ផលិតផល ឬសេវាកម្មអាចដោះស្រាយបញ្ហាដែលអតិថិជនជួបប្រទះដោយហេតុដូចនេះទើបពួកគេចង់ទិញផលិតផល ឬសេវាកម្មទាំងនោះ ។ ជម្រើសគ្រាន់តែបន្ថែមតម្លៃលើផលិតផលតែប៉ុណ្ណោះ ។ លោក Cuban បានបន្តថា ក្រុមហ៊ុនដែលជោគជ័យ គឺជាក្រុមហ៊ុនដែលបង្កើតបានផលិតផលមិនមែនជម្រើសទេ ។
២. គិតថា ខ្លួនដើរត្រូវពេលដែលឃើញមានដៃគូប្រកួតប្រជែងចូលក្នុងទីផ្សារ ៖ ការបង្កើតផលិតផល ឬសេវាកម្មថ្មីមួយមិនមែនជារឿងងាយស្រួលទេ ហើយការបញ្ចុះបញ្ចូលឲ្យអតិថិជនជ្រើសយកផលិតផល ឬសេវាកម្មរបស់អ្នក គឺកាន់តែពិបាកជាងនេះទៅទៀត ។ លោក Cuban បានចែករំលែកទៀតថា វាជាកំហុសឆ្គងមួយក្នុងការគិតថាអ្នកដើរផ្លូវត្រូវពេលដែលមើលឃើញដៃគូប្រកួតប្រជែងធំៗចាប់ផ្តើមចូលក្នុងទីផ្សាររបស់អ្នកដែរ ។ អ្វីដែលសហគ្រិនវៃឆ្លាតគួរតែធ្វើ គឺព្រួយបារម្ភ និងព្យាយាមរៀបចំគម្រោងការ ដើម្បីធ្វើឲ្យផលិតផល ឬសេវាកម្មរបស់ពួកគេប្រសើរជាងដៃគូប្រកួតប្រជែងទៅវិញ ។
៣. កុំពឹងផ្អែកលើបុគ្គលិកដែលមានសមត្ថភាពតែម្នាក់ ៖ អាជីវករជាច្រើនចូលចិត្តគិតថាបុគ្គលិកដែលពួកគេជ្រើសបន្ទាប់នឹងអាចដោះស្រាយបញ្ហាធំបំផុតរបស់ក្រុមហ៊ុន ប៉ុន្តែវាជាកំហុសឆ្គងមួយ ព្រោះមិនមាននរណាម្នាក់ដែលមានសមត្ថភាពគ្រប់គ្រាន់ក្នុងការដោះស្រាយបញ្ហាឲ្យអ្នកជារៀងរាល់ពេលទេ ។
ប្រសិនបើបុគ្គលិកដែលមានសមត្ថភាពខ្ពស់របស់អ្នកទ្រាំទ្រមិនបាន ឬបរាជ័យ ហើយចាកចេញពីក្រុមហ៊ុននោះបុគ្គលិកដទៃក៏អាចនឹងចាកចេញដែរ ។ ការកសាងអាជីវកម្មតម្រូវឲ្យបុគ្គលិកទាំងអស់សហការគ្នា ដើម្បីដោះស្រាយបញ្ហាជារួម ៕ កែសម្រួលដោយ ៖ សុឃាក់
ចែករំលែកព័តមាននេះ