ខេត្តសៀមរាប ៖ លោកគ្រូ អ្នកគ្រូជាង១០០នាក់នៃវិទ្យាល័យ១០មករា ១៩៧៩ បាននាំគ្នាផ្តិតមេដៃដាក់ញ្ញតិទៅឲ្យប្រធានមន្ទីរអប់រំខេត្ត ដើម្បីរកដំណោះស្រាយឲ្យពួកគាត់ ដែលចង់បានការបោះឆ្នោតជ្រើសរើសនាយកថ្មី និងឲ្យនាយករងទាំង៤រូបដែលមានឈ្មោះនៅក្នុងសាលាវិទ្យាល័យ១០មករានេះ មកធ្វើជាបេក្ខជនក្នុងការបោះឆ្នោតរកនាយកថ្មី កុំឲ្យមានការតែងតាំងពីអ្នកខាងក្រៅ ឬយកមនុស្សពីក្នុងសាលានោះមកតែងតាំងឲ្យសោះ ដែលពួកគាត់មិនឯកភាពឡើយ ។
តាមប្រភពពីលោកគ្រូអ្នកគ្រូបានបង្ហើបឱ្យដឹងថា កាលពីលោកនាយកកែវ សូរ ដែលបានទទួលមរណភាពកាលពីថ្ងៃទី១៣ កុម្ភ:២០១៣កន្លងទៅ រហូតមកដល់ពេលនេះ នៅមិនទាន់មាននាយកថ្មីនៅឡើយទេ បើនាយកស្តីទីវិញក៏នឹងត្រូវចូលនិវត្តន៏នៅថ្ងៃទី២០ កុម្ភ: ២០១៤ ខាងមុខនេះដែរ ដូច្នេះពួកគាត់ជាង១០០នាក់ ក៏បានផ្តុំគ្នាផ្តិតមេដៃដាក់ញ្ញតិទៅឲ្យប្រធានមន្ទីរអប់រំខេត្ត ដើម្បីរកនាយកថ្មីឲ្យបានក្នុងពេលឆាប់ៗនេះ តែសូមឲ្យគោរពតាមលក្ខខណ្ឌដូចខាងក្រោម ៖ ១-សុំធ្វើការបោះឆ្នោតជ្រើសរើសរកនាយកថ្មី ២-បេក្ខជនឈរឈ្មោះត្រូវឲ្យមាននាយករងទាំង៤រូប ៣-មិនឲ្យមានការតែងតាំងមនុស្សពីខាងក្រៅ ឬលើកលោកគ្រូ អ្នកគ្រូក្នុងវិទ្យាល័យ១០មករា ១៩៧៩ នេះ មកធ្វើជានាយកឡើយ។
ចែករំលែកព័តមាននេះ