ខេត្តព្រះសីហនុ ៖ អគ្គមេបញ្ជាការរង និងជាមេបញ្ជាការកងទ័ពជើងគោកឧត្តមសេនីយឯក ហ៊ុន ម៉ាណែត បានថ្លែងនូវការព្រមាននឹងចាត់វិធានការដោយម៉ឺងម៉ាត់ចំពោះរាល់ការតែងតាំងមិនប្រក្រតីក្នុងរូបភាពសូកប៉ាន់ ដើម្បីផលប្រយោជន៍បុគ្គលព្រោះថា បើយើងជ្រើសរើសតែងតាំងតាមរបៀបសូកប៉ាន់នោះ វាមិនអាចធ្វើឲ្យអង្គភាពមួយធានាបានកត្តាសាមគ្គីភាពឯកភាព…
ខេត្តព្រះសីហនុ ៖ អគ្គមេបញ្ជាការរង និងជាមេបញ្ជាការកងទ័ពជើងគោកឧត្តមសេនីយឯក ហ៊ុន ម៉ាណែត បានថ្លែងនូវការព្រមាននឹងចាត់វិធានការដោយម៉ឺងម៉ាត់ចំពោះរាល់ការតែងតាំងមិនប្រក្រតីក្នុងរូបភាពសូកប៉ាន់ ដើម្បីផលប្រយោជន៍បុគ្គលព្រោះថា បើយើងជ្រើសរើសតែងតាំងតាមរបៀបសូកប៉ាន់នោះ វាមិនអាចធ្វើឲ្យអង្គភាពមួយធានាបានកត្តាសាមគ្គីភាពឯកភាព រួមទាំងប្រសិទ្ធភាពការងារនោះឡើយ ។
ឧត្តមសេនីយ៍ឯក ហ៊ុន ម៉ាណែត បានព្រមាន ដូច្នេះក្នុងឱកាសចូលរួមក្នុងពិធីប្រកាស តែងតាំងផ្លាស់ប្តូរមុខងារមេបញ្ជាការតំបន់ប្រតិបត្តិការសឹករងខេត្តព្រះសីហនុ កាលពីថ្ងៃ ព្រហស្បតិ៍ ទី០៨ ខែសីហា ឆ្នាំ២០១៩ កន្លងទៅនៅទីបញ្ជាការការតំបន់ប្រតិបត្តិការសឹករង ខេត្តព្រះសីហនុ ។
លោក ហ៊ុន ម៉ាណែត បានលើកឡើងថា ការជ្រើសរើសរើសថ្នាក់ដឹកនាំអង្គភាពឬមេបញ្ជាការ នាយសេនាធិការបានត្រឹមត្រូវ គឺជាកត្តាធានាបានសាមគ្គីភាពឯកភាព និងប្រសិទ្ធភាពការងារ ។ លោកថា គោលការណ៍របស់កងទ័ពជើងគោក គឺការជ្រើសរើសថ្នាក់ដឹកនាំអង្គភាពចាប់ពីថ្នាក់តំបន់ប្រតិបត្តិការសឹករង និងកងព្រំដែនឡើងទៅត្រូវមានគណៈកម្មការកងទ័ពជើងគោកមួយដើម្បីពិនិត្យវាយតម្លៃសំដៅធានាបានតម្លាភាព និងប្រសិទ្ធភាព ។
លោកបានសង្កត់ធ្ងន់ថា ឆន្ទៈ និងគោលការណ៍នៃការដឹកនាំរបស់លោកដែលជាមេបញ្ជាការកងទ័ពជើងគោក គឺមិនឱ្យមានការសូកប៉ាន់ក្នុងការតែងតាំងថ្នាក់ដឹកនាំអង្គភាព ដើម្បីផល ប្រយោជន៍ផ្ទាល់ខ្លួន ។ ប៉ុន្តែត្រូវជ្រើសរើសនាយទាហានដែលមានឆន្ទៈបម្រើជាតិតាមរយៈ ការវាយតម្លៃទៅលើសមត្ថភាពគុណធម៌ សីលធម៌ បទពិសោធន៍ សុខភាព ព្រោះយើងគិតពីបុគ្គលឲ្យមានយុត្តិធម៌តម្លាភាព សមត្ថភាព និរន្តរភាព និងប្រសិទ្ធភាពរបស់អង្គភាព ។
ឧត្តមសេនីយឯក ហ៊ុន ម៉ាណែត បានលើកឡើងថា ខេត្តព្រះសីហនុ គឺជាខេត្តដែលមានសក្ដានុពលនៃការរីកចម្រើនដូច្នេះយើងទាមទារកងកម្លាំងប្រដាប់អាវុធរបស់យើងដែលមានលក្ខណៈគ្រប់គ្រាន់ ដើម្បីត្រៀមជួយដល់ប្រជាពលរដ្ឋ និងការងារសន្តិសុខផ្សេងៗក្នុងនោះផ្ដោតលើមេបញ្ជាការ និងនាយសេនាធិការដែលមានសមត្ថភាព និងឆន្ទៈនៅក្នុងការងារ ។
ផ្ទុយទៅវិញបើការជ្រើសរើសការតែងតាំងមិនប្រក្រតីក្នុងរូបភាពសូកប៉ាន់ ដើម្បីផលប្រយោជន៍ សូមរកឱ្យឃើញនូវភស្តុតាង និងចាត់វិធានការឱ្យបានម៉ឺងម៉ាត់ព្រោះយើងទទួលភារកិច្ចពីរាជរដ្ឋាភិបាលក្នុងការជ្រើសរើសថ្នាក់ដឹកនាំអង្គភាព ហើយនេះ គឺជាអ្វីដែលជាការខិតខំរបស់យើង ដើម្បីផ្ដល់ឱកាសទៅដល់អ្នកខំខិតខំប្រឹងប្រែងអ្នកដែលធ្វើការយូរនៅក្នុងអង្គភាព ។
ទន្ទឹមនោះការជ្រើសរើសថ្នាក់ដឹកនាំអង្គភាព គឺផ្ដោតលើយុត្តិធម៌សម្រាប់បុគ្គល និងយុត្តិធម៌ សម្រាប់អង្គភាព ។ បើយើងផ្តោតយុត្តិធម៌សម្រាប់បុគ្គល គឺយើងថ្លឹងថ្លែ យុត្តិធម៌សម្រាប់អង្គភាពប្រសិទ្ធភាពការងារ និងការដឹកនាំបញ្ជា ។ លោកថានេះ គឺជាគោលការណ៍របស់កងទ័ពជើងគោក ដើម្បីបញ្ជាក់ឲ្យនាយទាហានថ្នាក់ដឹកនាំនៅក្នុងអង្គភាពបានយល់ច្បាស់ ព្រោះការដំឡើងឋានៈការតែងតាំងមុខងារណាមួយមិនមែនជាការផ្ទេរសិទ្ធិអំណាចនោះទេ ។ ប៉ុន្តែ គឺជាការផ្ទេរការទទួលខុសត្រូវបន្តវេនពីមួយជំនាន់ទៅមួយជំនាន់ ដើម្បីប្រសិទ្ធភាព និងនិរន្តរភាពនៃការបំពេញភារកិច្ចរបស់កងយោធពលខេមរភូមិន្ទ ៕ កែសម្រួលដោយ ៖ សុឃាក់
ចែករំលែកព័តមាននេះ