ខេត្តមណ្ឌលគិរី ៖ ប្រជាសហគមន៍ជនជាតិដើមភាគតិចនៅភូមិឡៅការបានឱ្យដឹងថា ខណៈក្រុមល្បាតភូមិមានគ្នា១៩នាក់ដើរល្បាតក្នុងព្រៃសហគមន៍សម្រាប់អាស្រ័យផលរបស់ពួកគាត់ កាលពីថ្ងៃទី១៥ កុម្ភៈ ២០១៤ ក៏ប្រទះឃើញរថយន្តបង្កង់១គ្រឿង ដឹកឈើប្រណីតជាច្រើនកំណាត់ចេញពីក្នុងព្រៃ ពួកគាត់ក៏បានឃាត់រថយន្តនោះ និងរាយការណ៍ជូនមន្ត្រីបរិស្ថាន ប៉ុន្តែមន្ត្រីជំនាញហាក់បីដូចជាមានចេតនាមិនព្រមចេញចំណាត់ការសោះ បន្ទាប់ពីពួកគាត់បានឃាត់រថយន្តដឹកឈើខុសច្បាប់ប្រគល់ទៅឱ្យហើយនោះ ។
ប្រជាសហគមន៍ជនជាតិដើមភាគតិចបានចោទប្រកាន់ថា ប្រធានទីស្នាក់ការបរិស្ថានមិនបានបញ្ជូនរថយន្តដឹកឈើខុសច្បាប់មកកាន់មន្ទីរបរិស្ថានខេត្តទេ ដោយមន្ត្រីបរិស្ថានស្នាក់ការឡៅការនិយាយថា មានគេរត់ការដោះស្រាយយកចេញបាត់ហើយ ទើបពួកគាត់ជាប្រជាសហគមន៍ក្នុងភូមិឡៅការ សង្កាត់សុខដុម ក្រុងសែនមនោរម្យលើកគ្នាទៅតវ៉ានៅស្នាក់ការបរិស្ថានឡៅការ ក្នុងគោលបំណង ចង់ឱ្យប្រធានស្នាក់ការបរិស្ថានខាងលើ បញ្ជូនរថយន្តដឹកឈើខុសច្បាប់នេះ ទៅមន្ទីរបរិស្ថានខេត្តដោះស្រាយតាមច្បាប់ រហូតដល់ម៉ោង៨យប់ថ្ងៃទី១៦ កុម្ភៈ ទើបប្រធានស្នាក់ការបញ្ជូនមកដល់មន្ទីរបរិស្ថានខេត្តចាត់ការបន្ត។
បើតាមលោកអៀង ញឹក ប្រធានទីស្នាក់ការបរិស្ថានឡៅកាបានឱ្យដឹងថា ឈើប្រណីតទាំងនោះមានចំនួន៤៣ដុំ ក្នុងនោះ ប្រភេទធ្នង់៤១ដុំ និងបេង២ដុំធំៗ តែមិនទាន់បានវាស់វែងនៅឡើយ ។ ជុំវិញករណីនេះ កោះសន្តិភាពមិនអាចធ្វើការទំនាក់ទំនងសុំការបំភ្លឺបាននៅឡើយទេ ពីលោកឈិត សុផល ប្រធានមន្ទីរបរិស្ថានខេត្តមណ្ឌលគិរី ។
ចែករំលែកព័តមាននេះ