ការស្រាវជ្រាវថ្មីមួយបានបង្ហាញថា ទទួលទានដំណេកពេលយប់មិនបានគ្រប់គ្រាន់អាចជំរុញដល់ល្បឿនលូតលាស់របស់ជំងឺមហារីក ដោយការរាំងស្ទះឬបង្អាក់សមត្ថភាពប្រព័ន្ធការពាររាងកាយក្នុងការកំណត់គោលដៅលើដុំសាច់ដែលដុះ ។
នេះជាការសិក្សាបោះពុម្ពផ្សាយនៅក្នុងព្រឹត្តិបត្រស្រាវជ្រាវជំងឺមហារីកលើកដំបូង ហើយដែលបានពិនិត្យមើលពីការជាប់ពាក់ព័ន្ធគ្នារវាងដំណេកនិងការលូតលាស់នៃដុំសាច់ក៏ដូចជាការរាតត្បាតរបស់វា ។
អ្នកដឹកនាំការសិក្សាស្រាវជ្រាវ វេជ្ជបណ្ឌិតDavid Gozal ប្រធានផ្នែកជំងឺកុមារនៅសាកលវិទ្យាល័យសុខាភិបាល University of Chicago Comerបាននិយាយថា ៖«វាមិនមែនជាដុំសាច់នោះទេ វាគឺជាប្រព័ន្ធការពាររាងកាយ។ ដេកមិនគ្រប់គ្រាន់បានផ្លាស់ប្តូរដំណើរដែលប្រព័ន្ធការពាររាងកាយប្រឆាំងនឹងជំងឺមហារីកហើយបណ្តាលឱ្យជំងឺមានកម្លាំងកាន់តែខ្លាំងក្លាឡើង» ។
លោកវេជ្ជបណ្ឌិតបានបន្ថែមថា ទោះជាយ៉ាងណា ការសិក្សានេះក៏បានរកឃើញនូវយន្តការមួយដែលធ្វើសកម្មភាពក្នុងនាមជាស្ពានចម្លងម៉ូលេគុលដើម្បីគ្រប់គ្រងឱ្យមានរបៀបរៀបរយនូវវិធីដែលប្រព័ន្ធការពាររាងកាយឆ្លើយតបទៅនឹងដំណេកមិនគ្រប់គ្រាន់ ។
បើទោះជាការរកឃើញលើកនេះផ្អែកលើទិន្នន័យរបស់សត្វកណ្តុរប៉ុន្តែលោកវេជ្ជបណ្ឌិតGozalអះអាងថា វាមិនខុសប្លែកច្រើនទេបើប្រៀបធៀបទៅនឹងមនុស្ស និងថាវាជាសារសុខភាពសំខាន់មួយដែលមហាជនទូទៅគួរតែយកចិត្តទុកដាក់ ។ លោកបន្ថែមថា៖«ការសិក្សានេះបានផ្តល់នូវការពន្យល់សមស្របទៅនឹងជីវសាស្រ្តនៃការជាប់ពាក់ព័ន្ធគ្នារវាងជំងឺរាតត្បាតតួយ៉ាងដូចជា មហារីកនិងដំណេកមិនគ្រប់គ្រាន់ ។ វាជាសារមួយដែលប្រាប់មនុស្សទូទៅឱ្យបានដឹងពីសារសំខាន់នៃការថែរក្សា គុណភាព និង បរិមាណនៃដំណេក »៕
ចែករំលែកព័តមាននេះ