សារព័ត៌មានបរទេស កាលពីថ្ងៃទី១២ កុម្ភៈ ២០១៤ ផ្សាយថា ចោរម្នាក់ប្រើផើងផ្កាគ្រប់ក្បាលរបស់ខ្លួន និងមានរណារអគ្គិសនីជាអាវុធចូលប្លន់ហាងទំនើបមួយក្នុងក្រុងអិុបស្វិក រដ្ឋគ្វីនលែន ប្រទេសអូស្ត្រាលី ។
ចោរនោះបានយករណារអគ្គិសនីគំរាមបុគ្គលិកក្នុងហាងយកប្រាក់ និងយកទឹកក្រូចដាក់ហោប៉ៅ ។ នៅមុនពេលចាកចេញចោរបង្ហាញកំប៉េះគូទដល់អតិថិជននៅក្នុងហាងទៀតផង ។
ក្រោយពីបានទទួលបណ្តឹងពីបុគ្គលិកក្នុងហាង ប៉ូលិសបានតាមរកហើយឃើញជនសង្ស័យកំពុងដើរនៅលើដងផ្លូវ ។ ចោរនោះសារភាពថា គេបានលួចរណារអគ្គិសនីយកទៅលាក់ទុកនៅគុម្ពឈើជិតហាងនោះ ។
ប៉ូលិសបានបញ្ជូនចោរនោះទៅតុលាការដើម្បីកាត់ទោស ។ ចោរម្នាក់នោះហាក់ដូចជាមនុស្សមិនគ្រប់ទឹកគឺយកផើងផ្កាគ្របក្បាល និងពេលប្លន់បានហើយមិនប្រញាប់គេចចេញ ដូចចោរទូទៅទេ គឺនៅបង្ហាញគូទដូចជាតួកំប្លែងដល់អតិថិជននៅក្នុងហាងទៀតផង៕
ចែករំលែកព័តមាននេះ