ខេត្តកំពង់ធំ ៖ នៅសាលប្រជុំខេត្តកំពង់ធំ (អគារB) កាលពីរសៀលថ្ងៃទី០៦ កុម្ភៈ ២០១៤ មានរៀបចំកិច្ចប្រជុំសាមញ្ញលើកទី៥៧ របស់ក្រុមប្រឹក្សាខេត្ត ក្រោមអធិបតីភាព ឯកឧត្តម ណាំ ទុំ ប្រធានក្រុមប្រឹក្សាខេត្ត ឯកឧត្តម អ៊ុត សំអន អភិបាល នៃគណៈអភិបាលខេត្ត ដោយមានការអញ្ជើញចូលរួមពីមន្ត្រីរាជការក្រោមឱវាទសរុបចំនួន ៥៨រូប។
ខេត្តកំពង់ធំ ៖ នៅសាលប្រជុំខេត្តកំពង់ធំ (អគារB) កាលពីរសៀលថ្ងៃទី០៦ កុម្ភៈ ២០១៤ មានរៀបចំកិច្ចប្រជុំសាមញ្ញលើកទី៥៧ របស់ក្រុមប្រឹក្សាខេត្ត ក្រោមអធិបតីភាព ឯកឧត្តម ណាំ ទុំ ប្រធានក្រុមប្រឹក្សាខេត្ត ឯកឧត្តម អ៊ុត សំអន អភិបាល នៃគណៈអភិបាលខេត្ត ដោយមានការអញ្ជើញចូលរួមពីមន្ត្រីរាជការក្រោមឱវាទសរុបចំនួន ៥៨រូប។
លោក ឡង គីសឹង នាយករដ្ឋបាលសាលាខេត្ត បានអានកំណត់ហេតុស្តីអំពីកិច្ចប្រជុំសាមញ្ញលើកទី៥៦ របស់ក្រុមប្រឹក្សាខេត្តចប់រួចមក ឯកឧត្តម ហួន វ៉ាន់និត អភិបាលរងខេត្ត បានអានរបាយការណ៍ស្តីអំពីលទ្ធផលការងារ ប្រចាំខែធ្នូ ឆ្នាំ២០១៣ របស់រដ្ឋបាលខេត្តកំពង់ធំ ដែលសម្រេចបានជូនគណៈអធិបតី និងអង្គពិធី ជាទីសណ្តាប់។
ឯកឧត្តម ណាំ ទុំ បានអញ្ជើញមានប្រសាសន៍ថា កិច្ចប្រជុំសាមញ្ញលើកទី៥៧ របស់ក្រុមប្រឹក្សាខេត្ត នៅវេលារសៀលថ្ងៃនេះ គឺមានរបៀបវីរៈ ចំនួន២ ដែលត្រូវលើកមកនិយាយ និងពិភាក្សាគ្នា រួមមាន ទី១. ពិនិត្យ និងអនុម័តលើកំណត់ហេតុ នៃកិច្ចប្រជុំសាមញ្ញលើកទី៥៦ របស់ក្រុមប្រឹក្សាខេត្ត និងទី២. ពិនិត្យ និងអនុម័តលើរបាយការណ៍ប្រចាំខែមករា ឆ្នាំ២០១៤ របស់រដ្ឋបាលសាលាខេត្តកំពង់ធំ ដែលសម្រេចបាន។
ឯកឧត្តមប្រធានអង្គប្រជុំ មានប្រសាសន៍ថា ស្នើឲ្យសមាជិកក្រុមប្រឹក្សាខេត្ត ពិនិត្យរួមយោបល់លើរបាយការណ៍ រួមមាន ១. បទល្មើសកាប់ឈើធ្វើអាជីវកម្ម និងទន្ទ្រានយកដី ត្រូវបានថយចុះ តែការងារនេះ ត្រូវគ្រប់គ្រងឲ្យបានហ្មត់ចត់បន្ថែមទៀត ២. បទល្មើសដឹកជញ្ជូនឈើគ្រញូងខុសច្បាប់ឆ្លងកាត់ភូមិសាស្រ្តខេត្ត នៅមានលបលួចធ្វើសកម្មភាពម្តងម្កាលនៅឡើយ ៣. បញ្ហាឆែកឆេរបង្ក្រាបបទល្មើសរបស់សមត្ថកិច្ចនៅតែមាន ធ្វើឲ្យមានភាពអនាធិបតេយ្យរវាងសមត្ថកិច្ចមូលដ្ឋាន និងសមត្ថកិច្ចថ្នាក់លើ ដែលខេត្តពិបាកក្នុងការគ្រប់គ្រង ជាហេតុធ្វើឲ្យប៉ះពាល់ដល់សតិអារម្មណ៍របស់ប្រជាពលរដ្ឋ។
៤. ធ្វើបញ្ជីសង្ខេប ដើម្បីចុះខ្លឹមសារផ្សេងៗ ដែលចូលមករដ្ឋបាលខេត្ត ៥. សុំបង្កើនការយកចិត្តទុកដាក់លើបញ្ហាបង្កបង្កើនផលស្រូវប្រដេញទឹកនៅរដូវប្រាំងនេះ ត្រូវទំនាក់ទំនងគ្នាឲ្យបានល្អរវាងឃុំ-សង្កាត់ និងក្រុង-ស្រុក ដែលនៅតំបន់បង្កបង្កើនផលស្រូវ និង ទី៦. ចំពោះផែនការសកម្មភាពប្រចាំឆ្នាំរបស់រដ្ឋបាលខេត្ត ដែលត្រូវឆ្លងក្នុងរបៀបវារៈទី៣ ត្រូវសុំលើកទៅដាក់ក្នុងកិច្ចប្រជុំក្រុមប្រឹក្សាខេត្តនៅលើកក្រោយ ដើម្បីឲ្យមន្ទីរ អង្គភាព ទាំងអស់ពិនិត្យឡើងវិញសិន បើនៅខ្វះចន្លោះអ្វីសុំឲ្យសហការជាមួយក្រុមលេខាធិការដាក់បន្ថែមឲ្យគ្រប់សកម្មភាព ដែលត្រូវអនុវត្តបន្ត។
ចុងក្រោយ ឯកឧត្តមប្រធានសំណូមពរសុំឲ្យពង្រឹងគោលនយោបាយភូមិ-ឃុំ មានសុវត្ថិភាពទាំង ៩ចំណុច របស់ក្រសួងមហាផ្ទៃ បន្ថែមទៀត ដើម្បីទប់ស្កាត់ឲ្យបាននូវភាពអសកម្មផ្សេងៗ ដែលបម្រុងនឹងកើតមាន បង្កឲ្យមានភាពអសន្តិសុខដល់សង្គមជាតិ៕
ចែករំលែកព័តមាននេះ