រាជធានីភ្នំពេញថ្ងៃទី៧ កុម្ភៈ ឆ្នាំ២០១៤ ៖ អ្នកចូលរួមប្រហែល៧០នាក់ ជាតំណាងរាជរដ្ឋាភិបាលមកពីក្រសួងបរិស្ថាន ក្រុមប្រឹក្សាស្តារអភិវឌ្ឍន៍វិស័យកសិកម្មនិងជនបទ ក្រសួងពាក់ព័ន្ធ ដៃគូអភិវឌ្ឍន៍ អង្គការសង្គមស៊ីវិល អង្គការមិនមែនរដ្ឋាភិបាល គ្រឹះស្ថានសិក្សា និងតំណាងសហគមន៍ បានមកជួបជុំគ្នានៅថ្ងៃទី៧ កុម្ភៈ ដើម្បីចូលរួមក្នុងសិក្ខាសាលាផ្សព្វផ្សាយរយៈពេលកន្លះថ្ងៃស្តីពី «របាយការណ៍ហិរញ្ញប្បទានការប្រែប្រួលអាកាសធាតុនៅកម្ពុជា» ដែលរៀបចំទ្បើងដោយវេទិកានៃអង្គការមិនមែនរដ្ឋាភិបាល ស្តីពីកម្ពុជានៅសណ្ឋាគារកាំបូឌីយ៉ាណា រាជធានីភ្នំពេញ ។
បន្ថែមពីលើគោលបំណងដើម្បីធ្វើការចែករំលែកបទពិសោធន៍ បញ្ហាប្រឈម និងការអនុវត្តល្អស្តីពីគម្រោងបន្សុាំទៅនឹងបម្រែបម្រួលអាកាសធាតុ និងការវិវត្តនៃការប្រែប្រួលអាកាសធាតុនៅកម្ពុជា គោលបំណងចម្បងនៃព្រឹត្តិការណ៍នេះ គឺសំដៅបង្ហាញលទ្ធផលនៃការស្រាវជ្រាវជាមួយនឹងអនុសាសន៍ជាយុទ្ធសាស្ត្រ ជូនភាគីពាក់ព័ន្ធនានា ដូចជាទីភ្នាក់ងារអង្គការសហប្រជាជាតិ អ្នកធ្វើសេចក្តីសម្រេច គ្រឹះស្ថានសិក្សា អង្គការមិនមែនរដ្ឋាភិបាល និងសហគមន៍អំពីស្ថានភាពជាក់ស្តែងនៃហិរញ្ញប្បទានការប្រែប្រួលអាកាសធាតុនៅកម្ពុជា ។
លោក តឹក វណ្ណារ៉ា នាយកប្រតិបត្តិស្តីទីនៃវេទិកាអង្គការមិនមែនរដ្ឋាភិបាលស្តីពីកម្ពុជា បានមានប្រសាសន៍នៅក្នុងអង្គសិក្ខាសាលានេះថា «ក្នុងអំទ្បុងប៉ុន្មានឆ្នាំចុងក្រោយនេះ ប្រទេសកម្ពុជាបានទទួលរងគ្រោះយ៉ាងធ្ងន់ធ្ងរពីគ្រោះមហន្តរាយធម្មជាតិជាបន្តបន្ទាប់ និងកាន់តែខ្លាំងទ្បើងៗ ពីមួយឆ្នាំទៅមួយឆ្នាំ ។ ជាក់ស្តែងនៅក្នុងឆ្នាំ២០១៣ ប្រទេសកម្ពុជាបានជួបប្រទះគ្រោះទឹកជំនន់ និងគ្រោះរាំងស្ងួតក្នុងពេលតែមួយ ដែលប៉ះពាល់ដល់អាយុជីវិតមនុស្សចំនួន១៦៨នាក់ (ភាគច្រើនជាកុមារ) ផ្ទៃដីដំណាំកសិកម្មជាច្រើនហិកតា និងហេដ្ឋារចនាសម្ព័ន្ធរូបវ័ន្តជាច្រើន ត្រូវបានបំផ្លាញ ។ លោកមានប្រសាសន៍បន្ថែមទៀតថា «ឆ្លើយតបនឹងបញ្ហាទាំងនេះ ប្រជាជនកម្ពុជា ពិសេសជនក្រីក្រនិងងាយរងគ្រោះ ពិតជាត្រូវការចាំបាច់នូវថវិកា បច្ចេកវិទ្យា សមត្ថភាព និងការគាំទ្រពីប្រទេសអភិវឌ្ឍន៍ ដើម្បីធន់ទ្រាំទៅនឹងអាកាសធាតុ ដែលកំពុងតែប្រែប្រួលពីមួយឆ្នាំទៅមួួយឆ្នាំ» ។
ក្រោយពីការបញ្ចប់សិក្ខាសាលាណែនាំថ្នាក់ជាតិនេះ យើងសង្ឃឹមថា អ្នកចូលរួមទាំងអស់នឹងអាចពង្រីកបាននូវការយល់ដឹងសំខាន់ៗ មួយចំនួនទាក់ទងទៅនឹងការអនុវត្តល្អ ក៏ដូចជាបញ្ហាប្រឈមនៅក្នុងការអនុវត្តគម្រោងការបន្សុាំទៅនឹងការប្រែប្រួលអាកាសធាតុ រួមជាមួយនឹងរូបមន្តគោលនយោបាយ ដែលទាក់ទងទៅនឹងការប្រែប្រួលអាកាសធាតុ ។ អ្វីដែលសំខាន់ជាងនេះទៅទៀត គឺការយល់ដឹងឱ្យកាន់តែស៊ីជម្រៅ និងការផ្សព្វផ្សាយពីសំណាក់អ្នកចូលរួម ផ្តោតជាសំខាន់ទៅលើតួលេខនៃផ្នែកហិរញ្ញប្បទាន នៃគម្រោង និងកម្មវិធីការប្រែប្រួលអាកាសធាតុ ជាពិសេសគឺអនុសាសន៍ល្អៗ ដែលទទួលបានពីការស្រាវជ្រាវ ដែលអាចផ្តល់នូវអត្ថប្រយោជន៍ទៅដល់ការបង្កើតគោលនយោបាយ និងផែនការទប់ទល់នឹងការប្រែប្រួលអាកាសធាតុរបស់ពួកគាត់ ។
លទ្ធផលនៃការសិក្សារបស់វេទិកានៃអង្គការមិនមែនរដ្ឋាភិបាលស្តីពីកម្ពុជា បានបង្ហាញយ៉ាងច្បាស់ថា ពីឆ្នាំ២០០៣ រហូតដល់បច្ចុប្បន្នប្រទេសកម្ពុជា បានទទួលហិរញ្ញប្បទានសរុបចំនួន៦៥៥,៦លានដុល្លារ ដែលក្នុងនោះ៦៤% នៃទឹកប្រាក់នេះ គឺជាជំនួយឥតសំណង និង៣៦%ទៀត គឺជាកម្ចីសម្បទាន ។ ថវិកានេះ បានមកពីគម្រោងពាក់ព័ន្ធនឹងអាកាសធាតុក្នុងស្រុកសរុបចំនួន៩៥ ហើយក្នុងនោះ មាន៤៣គម្រោងត្រូវបានបញ្ចប់រួចរាល់ និង៤៥គម្រោង គឺកំពុងដំណើរការ និង៧គម្រោងមិនទាន់ដំណើរការ ។ ក្នុងចំណោមទឹកប្រាក់ដែលប្រទេសកម្ពុជា ប្រមូលបាន មានទឹកប្រាក់ចំនួន៣៣៨,៨លានដុល្លារ ត្រូវបានប្រើប្រាស់រួចហើយ និងទឹកប្រាក់ចំនួន៣១៦,៨លានដុល្លារទៀត នឹងត្រូវប្រើប្រាស់សម្រាប់រយៈពេលប្រាំពីរឆ្នាំបន្ទាប់ទៀត គឺចាប់ពីឆ្នាំ២០១៤ រហូតដល់ឆ្នាំ២០២០ ។
សេចក្តីកំណត់សម្គាល់ៈ ចំពោះការរៀបចំផ្តល់បទសម្ភាសន៍ ការទទួលបាននូវរូបភាព និងព័ត៌មានបន្ថែមផ្សេងៗ សូមធ្វើការទាក់ទងទៅកាន់ កញ្ញា ងិន លីដា អ្នកសម្របសម្រួលព័ត៌មាន និងទំនាក់ទំនង នៃវេទិកាអង្គការមិនមែនរដ្ឋាភិបាល ស្តីពីកម្ពុជា តាមរយៈទូរស័ព្ទលេខ ០១២ ២៩២៩៣៦ ឬអីុម៉េល lyda@ngoforum.org.kh
អង្គការមិនមែនរដ្ឋាភិបាល ស្តីពីកម្ពុជា NGO Forum គឺជាអង្គការសមាជិកភាពមួយ ដែលត្រូវបានបង្កើតទ្បើងនៅដើមទសវត្សឆ្នាំ១៩៨០ ដោយអង្គការមិនមែនរដ្ឋាភិបាលអន្តរជាតិ ដែលធ្វើយុទ្ធនាការ ដើម្បីតស៊ូមតិលើការសុំបញ្ឈប់ការដាក់ទណ្ឌកម្ម និងហាមឃាត់ជំនួយ ដែលត្រូវបានដាក់លើប្រទេសកម្ពុជានៅពេលនោះ ។
ចាប់តាំងពីពេលនោះមក អង្គការមិនមែនរដ្ឋាភិបាល ស្តីពីកម្ពុជា បានបន្តវិវឌ្ឍន៍ជាការឆ្លើយតបទៅនឹងស្ថានភាពផ្ទៃក្នុង និងក្រៅប្រទេស ដែលកំណត់កិច្ចអភិវឌ្ឍន៍ប្រទេសកម្ពុជា ។ គម្រោងនិងការងាររបស់វេទិកានៃអង្គការមិនមែនរដ្ឋាភិបាល ស្តីពីកម្ពុជា គឺ១-កម្មវិធីស្នូល ២-កម្មវិធីបញ្ហាអភិវឌ្ឍន៍ ៣-កម្មវិធីបរិស្ថាន ៤-កម្មវិធីដីធ្លី និងជីវភាព ៥-មជ្ឈមណ្ឌលស្រាវជ្រាវ និងព័ត៌មាន ៕
ចែករំលែកព័តមាននេះ