រាជធានីភ្នំពេញ ៖ មានការភ្ញាក់ផ្អើលមួយកាលពីវេលាម៉ោង១និង៣០នាទីរសៀលថ្ងៃទី៥ កុម្ភៈ នៅចំណុចផ្លូវលេខ១១១ សង្កាត់អូរឫស្សីទី១ ខណ្ឌ៧មករា ដោយសារបុរសម្នាក់បានព្យាយាមដេញតាមចាប់បុរសម្នាក់ទៀត និងស្រែកថាចោរៗ ។
រាជធានីភ្នំពេញ ៖ មានការភ្ញាក់ផ្អើលមួយកាលពីវេលាម៉ោង១និង៣០នាទីរសៀលថ្ងៃទី៥ កុម្ភៈ នៅចំណុចផ្លូវលេខ១១១ សង្កាត់អូរឫស្សីទី១ ខណ្ឌ៧មករា ដោយសារបុរសម្នាក់បានព្យាយាមដេញតាមចាប់បុរសម្នាក់ទៀត និងស្រែកថាចោរៗ ។
ករណីខាងលើនេះត្រូវបានគេដឹងថា នារីម្នាក់មានអាយុ១៧ឆ្នាំ រស់នៅស្រុកមេមត់ ខេត្តកំពង់ចាម និងមានគូដណ្តឹងអាយុ២០ឆ្នាំ នៅស្រុកភូមិជាមួយគ្នា ។ នៅថ្ងៃទី៤ កុម្ភៈ ក្រុមគ្រួសារបាត់នាងពីផ្ទះ ពេលនោះម្តាយបង្កើតនាងនិងបុរសជាគូដណ្តឹងក៏បានឆោឡោនិងតាមស្វែងរកនាង ។ លុះមកដល់ថ្ងៃទី៥ កុម្ភៈ ក្រុមគ្រួសារទទួលបានដំណឹងថានាងកំពុងស្ថិតនៅក្នុងរាជធានីភ្នំពេញ និងកំពុងល្អូកល្អិន ជាមួយបុរសម្នាក់អាយុ១៧ឆ្នាំ ដែលជាសង្សារ ។ ប្រភពព័ត៌មានឱ្យដឹងទៀតថា ពេលទទួលបានព័ត៌មានដូច្នេះ ម្តាយនាងនិងគូដណ្តឹងបានជិះរថយន្តមកភ្នំពេញ តាមរកកូនដើម្បីនាំត្រឡប់ទៅផ្ទះវិញ ។ នៅវេលាម៉ោង១និង៣០នាទីរសៀលថ្ងៃទី៥ កុម្ភៈ ក៏បានប្រទះឃើញនាងនៅចំណតរថយន្តផ្សារអូរឫស្សីជាមួយសង្សារ ឈ្មោះពៅ ពន្លក អាយុ១៧ឆ្នាំ ដែលមានស្នាក់នៅក្នុងសង្កាត់អូរឫស្សីទី៤ ខណ្ឌ៧មករា ។ ពេលម្តាយនិងគូដណ្តឹងឃើញនាងនៅចំណតរថយន្តផ្សារអូរឫស្សី ភ្លាមនោះយុវជនជាសង្សាររត់ឡើងជិះម៉ូតូមិត្តភក្តិរបស់ខ្លួន២នាក់ទៀត ដែលនៅជាមួយបម្រុងគេចខ្លួន តែត្រូវបានបុរសជាគូដណ្តឹងចិត្តសឿងជិះម៉ូតូឌុបដេញតាមបានប្រមាណ៣០០ទៅ៤០០ម៉ែត្រ ក៏ចាប់ខ្លួន បានខណៈស្រែកថាចោរៗ ។ ចាត់ទុកថា សំណាងដែរ ដែលគ្មានអ្នកវាយដំ ស្មានថាចោរនោះ គឺគ្រាន់តែជួយចាប់ប៉ុណ្ណោះ ។
ដោយមានការអន្តរាគមន៍ពីសមត្ថកិច្ចនគរបាលប៉ុស្តិ៍អូរឫស្សីទី១ ខណ្ឌ៧មករា ផង នគរបាលបាននាំពួកគេទៅកាន់ស្នាក់ការប៉ុស្តិ៍ ដើម្បីសាកសួរពីមូលហេតុដែលធ្វើឱ្យមានការភ្ញាក់ផ្អើលដេញចាប់ហើយស្រែកថាចោរៗ ធ្វើឱ្យផ្អើលឆោឡោ ។ ពេលនាំទៅដល់ស្នាក់ការនគរបាលប៉ុស្តិ៍សួរនាំទៅ ក៏លេចចេញជារឿងគូដណ្តឹងដេញចាប់យុវជនជាសង្សាររបស់គូដណ្តឹងទៅវិញ ក៏បានប្រគល់ការងារនោះឱ្យទៅសាលាសង្កាត់ធ្វើការសម្របសម្រួល ។ អស់រយៈពេលជាច្រើនម៉ោង មន្ត្រីសាលាសង្កាត់អូរឫស្សីទី១ បានផ្សះផ្សាគូភាគីទាំង២តម្រូវឱ្យឯកភាពគ្នា ដោយឱ្យធ្វើកិច្ចសន្យារៀងៗខ្លួន និងតម្រូវឱ្យយុវជនឈ្មោះ ពៅ ពន្លក ឈប់ទាក់ទងគូដណ្តឹងរបស់គេ ហើយនារីអាយុ១៧ឆ្នាំ នោះក៏ឱ្យឈប់ទាក់ទងយុវជនឈ្មោះពន្លកជាសង្សារទៀតដែរ ព្រោះនាងមានគូដណ្តឹងហើយ ពោលគឺសុំកុំឱ្យខ្លួន១ជិះទូក២ ។
ក្រោយពីធ្វើកិច្ចសន្យានៅសាលាសង្កាត់ព្រមព្រៀងគ្នាហើយ នាងដែលរត់តាមសង្សារត្រូវម្តាយនិងគូដណ្តឹងនាំវិលទៅផ្ទះសម្បែងវិញ ឯខេត្តកំពង់ចាម ហើយយុវជនពៅ ពន្លក ក៏ចាកចេញទាំងក្តីអាលោះអាល័យនាងជាសង្សារដែរ៕
ចែករំលែកព័តមាននេះ