រាជធានីភ្នំពេញ ៖ ការធ្វើកូដកម្មតវ៉ាទាមទារលក្ខខណ្ឌការងាររបស់កម្មករក្រុមហ៊ុនសុុិន ទ្រី ជាមួយនឹងការទាមទារឱ្យមានការដំឡើងប្រាក់ខែគោលរបស់ខ្លួននោះ បានធ្វើឱ្យកក្រើកគ្រប់មជ្ឈដ្ឋាននានា នៅទូទាំងរាជធានីភ្នំពេញ ព្រោះនៅកន្លែងណាក៏មានភ្នំសំរាមដែរ ដោយសារតែកម្មករក្រុមហ៊ុនសុិន ទ្រី បានបោះបង់ចោលការងារគ្រប់ផ្នែកសំខាន់ៗទាំង៣របស់ក្រុមហ៊ុន ក្នុងនោះមានផ្នែកអ្នកបោសសម្អាត ផ្នែកកម្មករអូសរទេះនិងកើប និងផ្នែកអ្នកបើកបរ និងអ្នកជួសជុលរថយន្តដឹកសំរាម ។
ពួកគេបានធ្វើការតវ៉ាយ៉ាងស្វិតស្វាញ ដែលគិតមកដល់ថ្ងៃទី៥ កុម្ភៈ មានរយៈពេល៤ថ្ងៃមកហើយ ដោយទាមទារលក្ខខណ្ឌការងារចំនួន៧ចំណុច ក្នុងនោះចំណុចសំខាន់គឺ ទាមទារប្រាក់ខែគោលទៅតាមផ្នែករៀងៗខ្លួន ។ ឯចំណុចសំខាន់មួយទៀតគឺ សុំមិនឱ្យក្រុមហ៊ុនកាត់ប្រាក់ថ្លៃកាត់អាវ ហើយនៅក្នុងរយៈពេលនេះបានធ្វើឱ្យអាជ្ញាធរ និងមន្ត្រីស្ថាប័នពាក់ព័ន្ធនានា មានការខ្វល់ខ្វាយយ៉ាងខ្លាំង ព្រោះគ្មានអ្នកប្រមូលសំរាម ។ ដោយប្រការនេះហើយ ទើបមានការខិតខំដោះស្រាយរហូតទទួលបានលទ្ធផលត្រូវរ៉ូវគ្នាមួយ និងឈានដល់ការបញ្ចប់វិបត្តិទាំងស្រុង ។ ទាក់ទិនទៅនឹងហេតុការណ៍នេះ ត្រូវបានឱ្យដឹងថា នៅព្រឹកថ្ងៃទី៥ កុម្ភៈ កម្មករទាំងអស់ បានបន្តធ្វើកូដកម្មតវ៉ាទៀត ខណៈគណៈកម្មការចម្រុះ មានមន្ត្រីមកពីក្រសួងការងារ មន្ត្រីសាលារាជធានីភ្នំពេញ មន្ត្រីសាលាខណ្ឌដង្កោ បានហៅតំណាងកម្មករ និងតំណាងក្រុមហ៊ុនសុិន ទ្រី ជួបដោះស្រាយគ្នារកគន្លឹះបញ្ចប់បញ្ហាខាងលើ ។
លោក ចេង មុនីរ៉ា អភិបាលរងខណ្ឌដង្កោ បានប្រាប់កោះសន្តិភាពតាមទូរស័ព្ទថា ការដោះស្រាយបានប្រព្រឹត្តទៅ ចាប់តាំងពីវេលាព្រឹក រហូតដល់ម៉ោង២រសៀល ទើបបញ្ចប់ និងត្រូវរ៉ូវគ្នា ដោយកម្មករសម្រេចទទួលយកដំណោះស្រាយដូចខាងក្រោម ៖
១-ផ្នែកកម្មករបោសសម្អាត បានយល់ព្រមទទួលយកប្រាក់ខែគោលចំនួន៩០ដុល្លារ ក្នុង១ខែ ។
២-កម្មករផ្នែកអូសរទេះ និងកម្មករកើបសំរាម សម្រាប់អ្នកធ្វើការវេនថ្ងៃ យល់ព្រមទទួលយកប្រាក់ខែគោលចំនួន១២០ដុល្លារក្នុង១ខែ និងអ្នកធ្វើការវេនយប់ យល់ព្រមទទួលយកប្រាក់ខែគោលដែលមានស្រាប់ មិនថាអ្នកនោះប្រាក់ខែចាស់ប៉ុន្មាននោះឡើយ ។ ចំណែកប្រាក់ថ្លៃកាត់អាវ ដែលពីមុនក្រុមហ៊ុនកាត់ប្រាក់ក្នុងអាវ១ថ្លៃ១៥ដុល្លារ គឺឈប់កាត់ទៀតហើយ ។ បន្ទាប់ពីការដោះស្រាយបានបញ្ចប់ ក្រុមកម្មករបានបំបែកជួរគ្នាទៅធ្វើការតាមផ្នែករៀងៗខ្លួន ដោយពួកគេចាប់ផ្តើមធ្វើការតាមភារកិច្ចនៅវេលារសៀលថ្ងៃដដែលនេះតែម្តង ។ ចំណែកអ្នកណាដែលអស់កម្លាំង ក៏ត្រូវអនុញ្ញាតឱ្យឈប់សម្រាកយកកម្លាំងសិន ដោយក្រុមហ៊ុនមិនបានកាត់ប្រាក់ខែក្នុងរយៈពេលដែលពួកគេធ្វើកូដកម្មតវ៉ានាប៉ុន្មានថ្ងៃកន្លងមកនេះឡើយ ។
គួរកត់សម្គាល់ថា កូដកម្មរបស់កម្មករក្រុមហ៊ុនសុិន ទ្រី រយៈពេល៤ថ្ងៃកន្លងមកនេះ បានធ្វើឱ្យគំនរសំរាមក្នុងរាជធានីភ្នំពេញ គរទុកចោលពាសវាលពាសកាល ហើយលោកអភិបាលរាជធានីភ្នំពេញ បានចាត់ទុកថា ជាគ្រាប់បែកមួយកណ្តាលក្រុង ។ ការដោះស្រាយបញ្ហាបាននាពេលនេះ ចាត់ទុកជាលទ្ធផលវិជ្ជមានមួយ និងឈានទៅបញ្ចប់បញ្ហាភ័យព្រួយពីរឿងសំរាមស្អុយអសោចិ៍ទៀតហើយ ៕
ចែករំលែកព័តមាននេះ