រាជធានីភ្នំពេញ ៖ សម្តេចតេជោនាយករដ្ឋមន្ត្រី បានយល់ព្រមតាមសំណើរបស់លោកឧបនាយករដ្ឋមន្ត្រី ស ខេង ដែលបានសុំគោលការណ៍អនុញ្ញាតប្រើប្រាស់ដីចម្ការម៉ៃសាក់ទំហំប្រមាណ៣២២ ហិកតា បច្ចុប្បន្នស្ថិតក្រោមការគ្រប់គ្រងរបស់ក្រសួងកសិកម្មរុក្ខាប្រមាញ់ និងនេសាទដើម្បីរៀបចំជាទីតាំងតំបន់រដ្ឋបាលរបស់ខេត្តត្បូងឃ្មុំ ដែលជាខេត្តទើបបង្កើតថ្មី ដោយចេញមួយផ្នែកពីខេត្តកំពង់ចាម ។
សំណើរបស់លោកឧបនាយករដ្ឋមន្ត្រី ស ខេង ចុះថ្ងៃទី៣១ មករា ក៏បានសុំឱ្យផ្ទេរសិទ្ធិ គ្រប់គ្រងមកក្រោមរដ្ឋបាលខេត្តត្បូងឃ្មុំ ក្រោយពេលបង្កើតបានរចនាសម្ព័ន្ធ និងប្រព័ន្ធគ្រប់គ្រងស្របទៅតាមច្បាប់រៀបចំអង្គការ ។ ខេត្តត្បូងឃ្មុំ ត្រូវបានបង្កើតឡើងដោយបំបែកចេញពីខេត្តកំពង់ចាម ។ ទន្ទឹមនេះ រាជរដ្ឋាភិបាលបានសម្រេចកំណត់យកទីតាំងរដ្ឋបាលអចិន្ត្រៃយ៍របស់ខេត្តត្បូងឃ្មុំ ស្ថិតនៅភូមិប្រធាតុ ឃុំស្រឡប់ ស្រុកត្បូងឃ្មុំ (ម្តុំផ្លូវបំបែកពីផ្លូវជាតិលេខ៧ នៅស្រុកតំបែរ) ឬដីចម្ការម៉ៃសាក់របស់រដ្ឋស្ថិតនៅក្នុងភូមិនិគមលើ ឃុំស្រឡប់ ស្រុកត្បូងឃ្មុំ ។ ផ្អែកតាមការសម្រេចនេះ ក្រសួងមហាផ្ទៃបានសិក្សាបន្ថែមលើជម្រើសទីតាំងទាំងពីរនេះ ។
ផ្អែកតាមការសិក្សាអំពីស្ថានភាពភូមិសាស្ត្រការតាំងទីលំនៅរបស់ប្រជាពលរដ្ឋ តម្រូវការនៃការរៀបចំទីតាំងរដ្ឋបាល និងពិនិត្យទៅលើផលប៉ះពាល់ផ្សេងៗដែលអាចកើតមាន ក្រសួងមហាផ្ទៃសុំគោលការណ៍សម្រេច ដើម្បីយកដីចម្ការម៉ៃសាក់របស់រដ្ឋស្ថិតនៅក្នុងភូមិនិគមលើ ឃុំស្រឡប់ ស្រុកត្បូងឃ្មុំ ធ្វើជាទីតាំងតំបន់រដ្ឋបាលរបស់ខេត្តត្បូងឃ្មុំ រួមទាំងសាលាខេត្ត មន្ទីរ អង្គភាពនានាជុំវិញខេត្ត ហេដ្ឋារចនាសម្ព័ន្ធមន្ទីរពេទ្យ សាលារៀន ពហុកីឡដ្ឋាន សាលមហាស្រព សួនច្បារសាធារណៈ ។ល។ ដីចម្ការម៉ៃសាក់នេះមានទំហំប្រមាណ៣២២ហិកតា ដែលបានបោះបង្គោលព្រំដីរួចរាល់ហើយ ស្ថិតក្រោមការគ្រប់គ្រងរបស់ក្រសួងកសិកម្ម រុក្ខាប្រមាញ់ និងនេសាទ ដោយមានទីតាំងស្ថិតនៅជាប់នឹងផ្លូវជាតិលេខ៧៣ និងមានចម្ងាយប្រមាណ៤គីឡូម៉ែត្រពីផ្លូវជាតិលេខ៧(គិតពីផ្លូវបំបែកប្រធាតុ)។
នាពេលថ្មីៗនេះ ក្រសួងមហាផ្ទៃបានពិនិត្យឃើញថា មានជនខិលខូចមួយចំនួនបានលួចដុតឆេះអស់ប្រមាណ១០ហិកតា និងបានចូលកាប់ដើមម៉ៃសាក់ ដើម្បីទន្ទ្រានកាន់កាប់ដីចម្ការម៉ៃសាក់ដោយខុសច្បាប់ ដោយសារតម្លៃដីនៅតំបន់នោះមានការកើនឡើងខ្ពស់ បន្ទាប់ពីមានព័ត៌មានថារដ្ឋនឹងយកដីចម្ការម៉ៃសាក់ធ្វើជាទីតាំងរដ្ឋបាលរបស់ខេត្តត្បូងឃ្មុំ ៕
ចែករំលែកព័តមាននេះ