រាជធានីភ្នំពេញ​៖ អភិបាល​នៃគណៈអភិបាល​រាជធានីភ្នំពេញ​ លោក ប៉ា សុជាតិវង្ស ​បានមានប្រសាសន៏ថា ​ចាប់ពីថ្ងៃនេះទៅ​មហាវិថីព្រះមុនីវង្ស ​ហាមចតយានជំនិះ​គ្រប់ប្រភេទ​លើចិញ្ចើមផ្លូវ ​ដើម្បីបញ្ចៀស​ការកក​ស្ទះចរាចរណ៏ ។

លោកអភិបាលរាជធានី​ភ្នំពេញ​ថ្លែងបែបនេះ ​នៅព្រឹកថ្ងៃទី០៥ ​កុម្ភៈ ២០១៤ ​ក្នុងឱកាសដែលលោក​បានអញ្ជើញជាអធិបតី​ក្នុងពិធីសម្ពោធបើក​ឲ្យដំណើរការ​សាកល្បង​រថយន្តក្រុង​នៅគល់ស្ពាន​ជ្រោយចង្វា ។ លោក ប៉ា សុជាតិវង្ស​ បានដាក់បទបញ្ជា​ឲ្យអាជ្ញាធរដែនដី​ត្រូវទទួលខុសត្រូវ​និងចាត់វិធានការ​ចំពោះអ្នកដែលចត​យានជំនិះគ្រប់ប្រភេទ​លើចិញ្ចើមផ្លូវ ។

បើតាមលោក​អភិបាលរាជធានីភ្នំពេញ​ មកដល់ពេលនេះ ​ក្នុងរាជធានីភ្នំពេញទំាងមូល​មានរថយន្តជាង៣០ម៉ឺនគ្រឿង​ និង​ ម៉ូតូជាង១លានគ្រឿង ។

សូមបញ្ជាក់ផងដែរថា​ រថយន្តក្រុងដែល​ដាក់ឲ្យដំណើរការសាកល្បង​ពីថ្ងៃទី០៥កុម្ភៈ ​ដល់ថ្ងៃទី០៤ ​មីនា ២០១៤នេះ ​មានចំនួន១០គ្រឿង ​ដោយដំណើរការលើមហាវិថី​ព្រះមុនីវង្ស​ចាប់ពីរង្វង់មូល​ជ្រោយចង្វា ដល់ផ្សារច្បារអំពៅ​ ហើយមានចំណត៣៦កន្លែង​ និង តម្លៃ ​១៥០០រៀល ៕