ថ្លើមគឺជាផ្នែកមួយដ៏សំខាន់សម្រាប់ការពារសុខភាពរាងកាយប្រសិនបើថ្លើមមានបញ្ហា ពិសេសមានផ្ទុកជំងឺថ្លើមប្រភេទBនោះវាពិតជាធ្វើឱ្យលោកអ្នកមានក្ដីកង្វល់យ៉ាងខ្លាំងនិងអស់សង្ឃឹមក្នុងឆាកជីវិតព្រោះជំងឺប្រភេទនេះអាចឆក់យកអាយុជីវិតរបស់លោកអ្នកគ្រប់ពេលវេលា ។
ថ្លើមគឺជាផ្នែកមួយដ៏សំខាន់សម្រាប់ការពារសុខភាពរាងកាយប្រសិនបើថ្លើមមានបញ្ហា ពិសេសមានផ្ទុកជំងឺថ្លើមប្រភេទBនោះវាពិតជាធ្វើឱ្យលោកអ្នកមានក្ដីកង្វល់យ៉ាងខ្លាំងនិងអស់សង្ឃឹមក្នុងឆាកជីវិតព្រោះជំងឺប្រភេទនេះអាចឆក់យកអាយុជីវិតរបស់លោកអ្នកគ្រប់ពេលវេលា ។
ជួបជាមួយលោកវេជ្ជបណ្ឌិតអ៊ុង ចក្រាវុធ ប្រធានផ្នែកជំងឺថ្លើម ក្រពះ ពោះវៀន និងជំងឺឫសដូងបាតនៃមន្ទីរពេទ្យកាល់ម៉ែតបានប្រាប់កោះសន្តិភាពថា ជំងឺថ្លើមមានប្រាំប្រភេទគឺA,B,C,D និងE ។ ចំណែកជំងឺថ្លើមប្រភេទBគឺជាជំងឺដែលបង្កឡើងដោយវីរុសប្រភេទB ។ ជាការពិតណាស់ ជំងឺថ្លើមប្រភេទB មានឥទ្ធិពលចម្លងទៅមនុស្សនៅក្នុងពិភពលោកយ៉ាងសកម្មបំផុតដែលកំពុងតែធ្វើឱ្យមានការព្រួយបារម្ភយ៉ាងខ្លាំងក្នុងបញ្ហាសុខភាពសាធារណៈពិសេសនៅក្នុងតំបន់អាស៊ីអាគ្នេយ៍រួមទាំងប្រទេសកម្ពុជាផងដែរ ។ ជំងឺថ្លើមប្រភេទB មានបង្កប់នៅក្នុងឈាម ទឹកមាត់ ទឹកដោះម្តាយ និងទឹករំអិលផ្សេងៗនៅក្នុងខ្លួនមនុស្សហើយក៏អាចឆ្លងដោយងាយផងដែរស្រដៀងគ្នានឹងការឆ្លងមេរោគអេដស៍ដែរហើយការឆ្លងរបស់វាមាន ៖
១-ឆ្លងតាមរយៈឈាម៖ ដូចជា ការរួមភេទ ពេលសម្រាលកូន ទទួលទានអាហារជាមួយគ្នាការប្រើប្រាស់សម្ភាររួមគ្នាមួយចំនួនដូចច្រាសដុសធ្មេញ កន្ត្រៃកាត់ក្រចក ម្ជុលចាក់ថ្នាំរួមគ្នាជាដើម ។
២-ឆ្លងតាមការរស់នៅក្នុងផ្ទះជាមួយគ្នា ជំងឺថ្លើមប្រភេទBក៏អាចឆ្លងតាមរយៈការរស់នៅក្រោមដំបូលផ្ទះជាមួយគ្នាផងដែរបើសិនជាសមាជិកណាម្នាក់ដែលរស់នៅក្នុងគ្រួសារតែមួយហើយកើតមានជំងឺថ្លើមប្រភេទBនោះសមាជិកផ្សេងទៀតក៏អាចកើតជំងឺប្រភេទនេះដូចគ្នាដោយឆ្លងតាមរយៈកត្តាមួយចំនួនដូចជា ទឹកមាត់ ញើស ការប្រើប្រាស់របស់របររួមគ្នា ។ល។
លោកវេជ្ជបណ្ឌិតអ៊ុង ចក្រាវុធ បានថ្លែងបន្តថា ជំងឺថ្លើមប្រភេទBចាប់ផ្តើមកើតមានដំបូងគឺមិនមានរោគសញ្ញាអ្វីឱ្យអ្នកជំងឺបានកំណត់សម្គាល់់ទេ តែអ្នកជំងឺអាចដឹងតាមរយៈការពិនិត្យឈាម ។ ក្នុងករណីខ្លះជំងឺនេះក៏អាចលេចចេញនូវរោគសញ្ញាមួយចំនួនផងដែរដូចជា អ្នកជំងឺមានការក្តៅខ្លួន ផ្តាសាយ ភ្នែកឡើងលឿងទឹកនោមលឿងជាដើម ។ ប៉ុន្តែតែ៩០%ចំពោះអ្នកដែលកើតមានជំងឺនេះមិនមានរោគសញ្ញាអ្វីទាំងអស់ ហើយភាគច្រើនអ្នកជំងឺអាចដឹងថារូបគេកើតមានជំងឺថ្លើមប្រភេទB នេះច្រើនតែហួសពេល ដោយជំងឺនេះអាចវិវឌ្ឍទៅរកអាការៈធ្ងន់ ធ្ងរដែលអាចឈានដល់ការកើតមានជំងឺក្រិនថ្លើម មហារីកថ្លើម ទើបវាលេចចេញនូវរោគសញ្ញានេះឱ្យអ្នកជំងឺបានដឹង ។ ជំងឺថ្លើមប្រភេទB អាចឆ្លងគ្រប់វ័យហើយនៅទ្វីបអាស៊ីយើងនេះភាគច្រើនឆ្លងតាំងពីទារកទើបនឹងកើតមកម្លេ៉ះតាមរយៈការសម្រាលកូន ។
ជំងឺថ្លើមប្រភេទB អាចបណ្តាលឱ្យមានផលប៉ះពាល់យ៉ាងខ្លាំងអាចធ្វើឱ្យបាត់បង់ជីវិត ។ មកដល់បច្ចុប្បន្ននេះមិនទាន់មានថ្នាំព្យាបាលដើម្បីសម្លាប់មេរោគនេះឱ្យមានប្រសិទ្ធភាពនៅឡើយទេ ដូចជាជំងឺអេដស៍ គ្រាន់តែអាចពន្យារអាយុជីវិតបានប៉ុណ្ណោះ ។ តែជាភ័ព្វសំណាងរបស់មនុស្សព្រោះជំងឺនេះមានវ៉ាក់សំាងចាក់បង្ការកុំឱ្យកើតមានរហូតដល់ទៅការពារបាន១០០ភាគរយ ។ នៅប្រទេសកម្ពុជាជំងឺថ្លើមប្រភេទBគឺអាចកើតមានទៅដល់១០ភាគរយហើយអត្រាដែលអ្នកស្លាប់ដោយសារជំងឺនេះមិនទាន់មានតួលេខច្បាស់លាស់នៅឡើយទេ ។ ដើម្បីកាត់បន្ថយអត្រាឆ្លងជំងឺថ្លើមពីកំណើតក្រសួងសុខាភិបាលបានអនុវត្តកម្មវិធីចាក់ថ្នាំបង្ការសម្រាប់ទារកដោយឥតគិតថ្លៃ ។ ចំពោះអ្នកដែលមិនទាន់បានចាក់វ៉ាក់សាំងការពារជំងឺថ្លើមប្រភេទBត្រូវតែទៅធ្វើតេស្តឈាមរកជំងឺថ្លើមប្រភេទBដើម្បីមានវិធានការទប់ស្កាត់ឬការពារទើបជាការប្រសើរ ។ ចំណែកឯអ្នកដែលកើតមានជំងឺថ្លើមប្រភេទBមិនត្រូវទទួលទានគ្រឿងស្រវឹងទេ ព្រោះការទទួលទានស្រាចំពោះអ្នកដែលមានផ្ទុកជំងឺថ្លើមប្រភេទBប្រៀបដូចជាយកសាំងទៅចាក់ពីលើភ្លើងអ៊ីចឹង ។
គ្រួសារដែលមានសមាជិកណាម្នាក់មានផ្ទុកជំងឺថ្លើមប្រភេទBសមាជិកក្នុងគ្រួសារនោះមិនត្រូវរើសអើងរហូតដល់ទទួលទានអាហារផ្សេងគ្នាឬក៏ដាក់អ្នកជំងឺឱ្យរស់នៅដាច់ដោយឡែកពីគេនោះ ។ ការធ្វើបែបនេះគឺអាចធ្វើឱ្យអ្នកជំងឺមានវិបត្តិផ្លូវចិត្តធ្ងន់ធ្ងរដូច្នេះសមាជិកគ្រួសារគ្រប់រូបត្រូវតែទៅចាក់វ៉ាក់សាំងការពារកុំឱ្យកើតមានជំងឺនេះទើបជាការប្រសើរ ។ លោកអ្នកត្រូវចងចាំថា ជំងឺថ្លើមប្រភេទBមិនមែនជាជំងឺតំណពូជទេតែវាជាជំងឺឆ្លង ៕
ចែករំលែកព័តមាននេះ