លទ្ធផលនៃការស្រាវជ្រាវមួយបានបង្ហាញថា បណ្តាស្ត្រីដែលលេបថ្នាំគ្រាប់វីតាមីនចម្រុះខណៈខ្លួនកំពុងព្យាយាមចង់បានកូនគឺជួបនូវហានិភ័យដ៏ធំសម្បើមពីការរលូត ។ ការពិសោធទៅលើស្ត្រីដែលនឹងក្លាយជាម្តាយគេចំនួន៣៥០០០នាក់របស់អ្នកវិទ្យាសាស្ត្រមកពីសាកលវិទ្យាល័យ South-ern Denmark សាកលវិទ្យាល័យ Aarhus ប្រទេសដាណឺម៉ាក និងសាកលវិទ្យាល័យ Pittsburghសហរដ្ឋអាមេរិកបានរកឃើញថា ពួកគេ៣២ភាគរយប្រឈមនឹងការរលូតកូន ប្រសិនជាលេបថ្នាំគ្រាប់វីតាមីនចម្រុះទៀងទាត់នៅអំឡុង៥-៦សប្តាហ៍មុនការចាប់កំណើតរបស់ទារកក្នុងផ្ទៃ ។ ដោយឡែក ប្រសិនជាលេបទៀងទាត់អំឡុង៣-៤សប្តាហ៍មុនការចាប់កំណើត ហានិភ័យធ្លាក់ចុះមកនៅត្រឹម ២៣ភាគរយ ។
តាមរយៈព្រឹត្តិបត្រអន្តរជាតិសិក្សាពីជំងឺរាតត្បាត ក្រុមអ្នកស្រាវជ្រាវបានបញ្ជាក់ថា ៖«ដើមឡើយស្ត្រីត្រូវគេផ្តល់ដំបូន្មានឱ្យប្រើប្រាស់ថ្នាំគ្រាប់វីតាមីនចម្រុះនៅពេលពួកគេមានគម្រោងយកកូន ហើយដោយឥតសង្ស័យ វីតាមីនទាំងនេះត្រូវពួកគេជឿថា មិនប៉ះពាល់ដល់សុខភាពឡើយ ។ ផ្ទុយមកវិញ ការសិក្សាស្រាវជ្រាវរបស់យើងលើកនេះបង្ហាញថា អ្នកប្រើប្រាស់ថ្នាំគ្រាប់វីតាមីនចម្រុះ ប្រឈមខ្ពស់នឹងកូនស្លាប់ក្នុងផ្ទៃ ជាពិសេសបណ្តាស្ត្រីដែលប្រើប្រាស់ទៀងទាត់មុនពេលកូនចាប់កំណើត »។ ពួកគេបានបន្តថា ការរកឃើញលើកនេះអាចនាំឱ្យមានការបារម្ភខ្លះៗ ប៉ុន្តែថា ក្រុមខ្លួនមិនទាន់អាចពន្យល់បាននូវហេតុផលដែលថ្នាំគ្រាប់វីតាមីនចម្រុះបង្កើនមហានិភ័យ នាំឱ្យរលូតកូននោះទេ ។
ទោះជាយ៉ាងនេះក្តី លោកស្ត្រីសាស្ត្រចារ្យ Lu-cilla Poston ប្រធានផ្នែកសុខភាពនៃសាកលវិទ្យាល័យ King’s College ប្រទេសអង់គ្លេសបានថ្លែងថា ស្ត្រីទាំងឡាយមិនគួរភ័យតក់ស្លុតចំពោះលទ្ធផលនេះទេ ។ លោកស្ត្រីបន្ថែមថា ៖«វាជារឿងល្អដែលទិន្នន័យរកឃើញមិនត្រូវបានប្រែក្លាយជាភស្តុតាងប្រឆាំងនឹងការប្រើប្រាស់ថ្នាំជំនួយសុខភាពវីតាមីន M,B9និងវីតាមីន Bc ។ លទ្ធផលលើកនេះចាំបាច់ត្រូវមានការសិក្សាបន្ថែមទៀត ។ ដូច្នេះ ស្ថិតក្នុងចន្លោះពេល ការប្រើប្រាស់ថ្នាំជំនួយសុខភាពគួរធ្វើបន្តទៅតាមវេជ្ជបញ្ជាគ្រូពេទ្យជំនាញ »៕
ចែករំលែកព័តមាននេះ