ខេត្តកណ្តាល ៖ រយៈពេល៣ថ្ងៃក្នុងឱកាសបុណ្យចូលឆ្នាំចិន-វៀតណាម គិតពីថ្ងៃទី៣១ មករា ដល់ថ្ងៃទី២ កុម្ភៈ នៅក្រុងតាខ្មៅ គេសង្កេតឃើញមានក្រុមម៉ុងសាយចេញលោត នៅតាមផ្ទះប្រជាពលរដ្ឋ ដែលមានស្រែស្រឡាយ ចិន-វៀតណាម និងតាមក្រុមហ៊ុនមួយចំនួនយ៉ាងមមាញឹកបំផុត ។ រហូតមកដល់ព្រឹកថ្ងៃទី២ កុម្ភៈ គេនៅតែឮសំឡេងស្គរម៉ុងសាយ យ៉ាងកងរំពង ។
ខេត្តកណ្តាល ៖ រយៈពេល៣ថ្ងៃក្នុងឱកាសបុណ្យចូលឆ្នាំចិន-វៀតណាម គិតពីថ្ងៃទី៣១ មករា ដល់ថ្ងៃទី២ កុម្ភៈ នៅក្រុងតាខ្មៅ គេសង្កេតឃើញមានក្រុមម៉ុងសាយចេញលោត នៅតាមផ្ទះប្រជាពលរដ្ឋ ដែលមានស្រែស្រឡាយ ចិន-វៀតណាម និងតាមក្រុមហ៊ុនមួយចំនួនយ៉ាងមមាញឹកបំផុត ។ រហូតមកដល់ព្រឹកថ្ងៃទី២ កុម្ភៈ គេនៅតែឮសំឡេងស្គរម៉ុងសាយ យ៉ាងកងរំពង ។
មានការកត់សម្គាល់ថា ឆ្នាំនេះខុសប្លែកពីឆ្នាំមុនៗបន្តិច ព្រោះមិនមានឮស្នូរផ្ទុះផាវទៀតឡើយ នៅតាមទីប្រជុំជននិងផ្ទះប្រជាពលរដ្ឋក៏ដូចជានៅតាមរោងអ្នកតាចិន ដែលមានប្រារព្ធពិធីទៅតាមជំនឿ ។ នេះក៏ដោយសារប្រជាពលរដ្ឋបានគោរពតាមការណែនាំរបស់អាជ្ញាធរ និងសមត្ថកិច្ចផងដែរ ។ លោកកុក ស្រេង សមាជិកសមាគមចិនក្រុងតាខ្មៅ និងជាក្រុមប្រឹក្សាសង្កាត់តាខ្មៅ បានប្រាប់ឱ្យដឹងថា សមាគមចិននៅក្រុងតាខ្មៅ មានម៉ុងសាយ៤ក្រុមបានចេញទៅសម្តែងនៅតាមផ្ទះប្រជាពលរដ្ឋដែលជាប់សែស្រឡាយចិន-វៀតណាម ក្នុងឱកាសបុណ្យចូលឆ្នាំថ្មីនេះ យ៉ាងមមាញឹកមិនដែលទំនេរឡើយ ទៅតាមសំណូមពររបស់ប្រជាជនដែលមានជំនឿលើការលោតម៉ុងសាយនេះ ។ ឆ្នាំនេះ ប្រជាជនដែលចូលរួមប្រារព្ធពិធីបុណ្យចូលឆ្នាំចិន មិនមានការថយចុះឡើយ តែមានការកើនឡើងពីមួយឆ្នាំទៅមួយឆ្នាំ ។ ការលោតម៉ុងសាយតាមផ្ទះប្រជាពលរដ្ឋ ខាងសមាគមមិនមានកំណត់ឡើយ គឺអាស្រ័យលើទឹកចិត្តរបស់ប្រជាពលរដ្ឋដែលចូលបច្ច័យដាក់ក្នុងអាំងប៉ាវ ។
ចំណែកនៅតាមក្រុមហ៊ុន សហគ្រាសធំៗ ដែលគេអញ្ជើញក្រុមម៉ុងសាយទៅលោត ការជួយឧបត្ថម្ភ ឬអាំងប៉ាវសម្រាប់ក្រុមម៉ុងសាយជាលុយកាក់គឺច្រើនជាងតាមផ្ទះប្រជាពលរដ្ឋដែលមានចាប់ពី១០០ដុល្លារ ទៅ៣០០ដុល្លារ ឬលើសពីនេះក៏មាន ហើយថវិកាដែលបានពីការលោតម៉ុងសាយ ខាងសមាគមយកមកសម្រាប់ធ្វើការកសាងសាលាចិន និងពង្រីកសមាគមបន្ថែមទៀត ។ លោកកុក ស្រេង ឱ្យដឹងទៀតថា ម៉ុងសាយចេញលោតមានរយៈពេល១៥ថ្ងៃ ចាប់ពីថ្ងៃចូលឆ្នាំចិនរហូតដល់ថ្ងៃហែអ្នកតាចិនជាថ្ងៃហែធំ មានម៉ុងសាយពីសមាគមចិនផ្សេងៗមកហែរួមគ្នានៅក្រុងតាខ្មៅ ដែលជាកន្លែងលោកតាធំជាងគេនៅក្នុងប្រទេសកម្ពុជា មានទីតាំងនៅភូមិតាខ្មៅ សង្កាត់តាខ្មៅ ក្រុងតាខ្មៅ ឈ្មោះថា លោកតាប៉ាវ សែតៃទី ឬប៉ាវសិនតាទី ឬភាសាខ្មែរហៅថាលោកតាធំ ។ តាមជំនឿតៗគ្នា តាំងពីបុរាណកាលមក គេជឿថា ម៉ុងសាយដែលគេធ្វើជារូបសត្វតោ និងនាគ ពេលទៅលោតនៅក្នុងភូមិណា ឬផ្ទះណាមួយគឺអាចបណ្តេញនូវភាពឧបទ្រពចង្ក្រៃទាំងឡាយទាំងពួង ហើយនាំមកនូវសេចក្តីសុខ សេចក្តីចម្រើនដល់ក្រុមគ្រួសារ ។
ជំនឿនេះមានរឿងតំណាលថា កាលពីបុរាណកាលនៅស្រុកមួយក្នុងប្រទេសចិន មានអ្នកភូមិកើតជំងឺតម្កាត់ និងមានសត្វសាហាវចេញពីព្រៃមកយាយីថែមទៀត ។ ពេលនោះអ្នកភូមិក៏បែកគំនិតគិតឃើញថា សត្វក្នុងលោកនេះដែលមានមហិទ្ធិឫទ្ធិ ខ្លាំងជាងគេមានតែសត្វតោ និងសត្វនាគជាដើម ។ ពេលនោះប្រជាពលរដ្ឋក៏បានធ្វើជារូបសត្វនាគ និងសត្វតោ ដាក់នៅក្នុងភូមិនិងតាមផ្ទះ ដើម្បីបន្លាចសត្វសាហាវដែលតែងតែមកយាយីនោះ ហើយចាប់តាំងពីពេលនោះមកសត្វសាហាវក៏លែងហា៊នមកយាយីអ្នកភូមិ ឯអ្នកភូមិក៏មានសេចក្តីសុខ តាំងពីពេលនោះមកដែរ ។ ដោយសារតែមានជំនឿបែបនេះហើយទើបប្រពៃណីទំនៀមទម្លាប់ចិន-វៀតណាម ចង់ឱ្យម៉ុងសាយ មកលោតនៅផ្ទះរបស់ខ្លួនដើម្បីបណ្តេញខ្មោចព្រាយបិសាចភាពឧបទ្រពចង្រៃចេញពីផ្ទះនិងក្រុមគ្រួសាររបស់ពួកគេគ្រប់ៗគ្នា៕
ចែករំលែកព័តមាននេះ