ខេត្តកំពង់ចាម ៖ ដីចំការព្រៃម៉ៃសាក់ក្នុងតំបន់ស្ថានីយដងទង់ ស្ថិតនៅភូមិនិគមលើ ឃុំស្រឡប់ ស្រុកត្បូងឃ្មុំ ត្រូវជនមិនស្គាល់មុខលួចដុតបណ្តាលឱ្យឆេះសន្ធោសន្ធៅរាលដាលពីកន្លែងមួយទៅកន្លែងមួយរហូតដល់ទៅជាង១០ហិកតា កាលពីល្ងាចថ្ងៃទី៣០ មករា ២០១៤ តែត្រូវបានកម្លាំងរដ្ឋបាលព្រៃឈើសហការជាមួយសមត្ថកិច្ចចុះអន្តរាគមន៍ទប់ស្កាក់ទាន់ពេល។
លោកគឹម ណារ៉ា នាយផ្នែករដ្ឋបាលព្រៃឈើត្រើយឆ្វេងបានឱ្យដឹងនៅរសៀលថ្ងៃទី២ កុម្ភៈ ២០១៤ នេះថា ស្ថានីយចំការម៉ៃសាក់ដងទង់មានទំហំទាំងអស់៣៥០ហិកតា ក្នុងនោះមានដាំកូនឈើប្រណីតជាច្រើនប្រភេទដើម្បីបង្កើតជាគម្របបៃតងក្រោមការថែទាំរបស់រដ្ឋបាលព្រៃឈើ។
លោកបន្តថា រហូតមកដល់ល្ងាចថ្ងៃទី៣០ មករា ស្រាប់តែមានអគ្គិភ័យឆេះព្រៃរាលដាលចូលមកដល់ចំការព្រៃម៉ៃសាក់ដែលគួរឱ្យឆ្ងល់ ដោយបានឆេះឡើងព្រមៗគ្នាចំនួន៣កន្លែងធ្វើឱ្យមានផ្សែងហុយទ្រលោមឡើងលើអាកាស។ បន្ទាប់មកក្រុមមន្ត្រីព្រៃរដ្ឋបាលព្រៃឈើក្រោមឱវាទបានរាយការណ៍មករូបលោកក៏បានចាត់ឱ្យកម្លាំងជាច្រើននាក់ រួមនិងមន្ត្រីនគរបាលស្រុកត្បូងឃ្មុំចុះទៅអន្តរាគមន៍ទាន់ពេល ។
លោកលើកឡើងថា ការឆេះព្រៃនេះមិនមែនសុខៗឆេះទេ អាចនឹងមានជនកំហូចណាលួចដុត ដើម្បីពង្រីកដីធ្វើជាកម្មសិទ្ធិរបស់ខ្លួន ស្របពេលដែលមានគម្រោងបង្កើតទីតាំងខេត្តត្បូងឃ្មុំថ្មីដាក់នៅក្បែរតំបន់ស្ថានីយចំការម៉ៃសាក់ខាងលើ។
ចែករំលែកព័តមាននេះ