BBC ផ្សាយថា តុលាការក្រុងតូក្យូ បានសម្រេចឱ្យបុរសម្នាក់សងការខូចខាត៥សែនដុល្លារ ដល់ក្រុមគ្រួសាររបស់លោកយាយជរាម្នាក់ ដែលត្រូវរូបគេជិះកង់បុកបណ្តាលឱ្យស្លាប់បាត់បង់ជីវិត ក្រោយពីជនល្មើសបានជាប់ពន្ធនាគាររយៈពេល២ឆ្នាំ ។
បុរសអាយុ៤៦ឆ្នាំនោះ ត្រូវតុលាការសម្រេចឱ្យបង់ប្រាក់៤៥៩.០០០ដុល្លារពីបទជិះកង់ទៅបុកលោកយាយជរាម្នាក់អាយុ៧៥ឆ្នាំបណ្តាលឱ្យស្លាប់ ។ ចៅក្រមបញ្ជាក់ថា ចង់ឱ្យរឿងក្តីនេះក្លាយជាគំរូដល់អ្នកផ្សេងដឹងថា កង់ក៏អាចជាអាវុធសម្លាប់មនុស្សដែរ ដោយប៉ុន្មានឆ្នាំកន្លងទៅ ពលរដ្ឋក្នុងក្រុងតូក្យូជាច្រើននាក់ប្រើប្រាស់ទោចក្រយាន ។
ក្យូដូញូវ បានផ្សាយថា នៅក្នុងពេលកំពុងបើកសវនាការ តុលាការរកឃើញថា នៅពេលកង់ទៅបុកលោកយាយរ៉េអុីកូ អាស៊ូម៉ា ខាងចុងចោទជិះកង់ក្នុងល្បឿនប្រហែលពី១៥ទៅ២៥គីឡូម៉ែត្រក្នុងមួយម៉ោង ជាហេតុបង្កឱ្យគាត់រងរបួស និងប៉ះពាល់ដល់ក្បាល និងបានស្លាប់ក្នុងរយៈពេល៥ថ្ងៃបន្ទាប់ ។
នៅក្នុងរបាយការណ៍បញ្ជាក់ថា ចុងចោទមានកំហុសសម្លាប់មនុស្សដោយប្រមាថ និងជាប់គុករយៈពេល២ឆ្នាំ ប៉ុន្តែបន្ទាប់មកបន្ថែមរយៈពេល៣ឆ្នាំទៀត ដោយតុលាការផ្តល់ហេតុផលថា ជនល្មើសខ្វះការយកចិត្តទុកដាក់នៅលើដងផ្លូវនៅពេលជួបឧប្បត្តិហេតុ និងមិនមែនជាកំហុសរបស់លោកយាយរងគ្រោះទេ ។
BBC បញ្ជាក់ថា ជាញឹកញាប់បានប្រទះឃើញអ្នកជិះកង់ក្នុងក្រុងតូក្យូ មិនប្រតិបត្តិតាមច្បាប់ចរាចរណ៍ទាំងការល្មើសភ្លើងស្តុប ជិះកង់ជ្រៀតជ្រែកនៅក្នុងហ្វូងមនុស្ស ឬមានពេលខ្លះជិះកង់បណ្តើរ បញ្ជូនទិន្នន័យតាមទូរស័ព្ទ បណ្តើរ ៕
ចែករំលែកព័តមាននេះ