រាជធានីភ្នំពេញ ៖ ក្នុងជំនួបពិភាក្សាការងារជាមួយលោកឧបនាយករដ្ឋមន្ត្រី ហោ ណាំហុង រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ នាព្រឹកថ្ងៃទី៣១ មករា នៅទីស្តីការក្រសួង លោក Hugo Swire អនុរដ្ឋមន្ត្រីការបរទេសចក្រភពអង់គ្លេស ចង់ដឹងការពិតអំពីព្រឹត្តិការណ៍បាតុកម្មរបស់គណបក្សសង្គ្រោះជាតិ កាលពីថ្ងៃទី២-៣ មករាកន្លងមក។
រាជធានីភ្នំពេញ ៖ ក្នុងជំនួបពិភាក្សាការងារជាមួយលោកឧបនាយករដ្ឋមន្ត្រី ហោ ណាំហុង រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ នាព្រឹកថ្ងៃទី៣១ មករា នៅទីស្តីការក្រសួង លោក Hugo Swire អនុរដ្ឋមន្ត្រីការបរទេសចក្រភពអង់គ្លេស ចង់ដឹងការពិតអំពីព្រឹត្តិការណ៍បាតុកម្មរបស់គណបក្សសង្គ្រោះជាតិ កាលពីថ្ងៃទី២-៣ មករាកន្លងមក។
លោកកុយ គួង អនុរដ្ឋលេខាធិការក្រសួងការបរទេស និងសហប្រតិបត្តិការអន្តរជាតិ បានប្រាប់ឱ្យដឹងថា ក្នុងជំនួបពិភាក្សានាឱកាសនោះ លោកឧបនាយករដ្ឋមន្ត្រី ហោ ណាំហុង បានមានប្រសាសន៍បញ្ជាក់ជូនលោកអនុរដ្ឋមន្ត្រីការបរទេសចក្រភពអង់គ្លេសអំពីបក្សប្រឆាំង ដែលតែងតែធ្វើបាតុកម្មបង្កចលាចលក្នុងសង្គមកម្ពុជាកន្លងមកនេះ ។ លោកឧបនាយករដ្ឋមន្ត្រី បានរំលឹកអំពីសេចក្តីថ្លែងការណ៍ផ្សេងៗរបស់បក្សប្រឆាំង ដែលបានធ្វើមុនថ្ងៃបោះឆ្នោតនៅថ្ងៃទី២៨ កក្កដា ២០១៣ កន្លងមក ដែលពេលនោះបក្សប្រឆាំងបានលើកឡើងថា គេចូលរួមការបោះឆ្នោត បុ៉ន្តែគេមិនទទួលស្គាល់លទ្ធផលនៃការបោះឆ្នោតទេ ។
ចំពោះបញ្ហានេះ លោកឧបនាយករដ្ឋមន្ត្រីបានលើកសំណួរទៅលោកអនុរដ្ឋមន្ត្រីការបរទេសចក្រភពអង់គ្លេសទៅវិញថា តើគេមានន័យថាយ៉ាងម៉េច? គឺមានន័យថា គេចង់តែពីរឿងឈ្នះ បើចាញ់ គឺអត់ទទួលស្គាល់លទ្ធផលទេ តែបើឈ្នះបានទទួលស្គាល់ ។ ដូច្នោះហើយ រឿងបាតុកម្មកន្លងមកនេះ គឺអ្វីៗទាំងអស់គេបានដឹងជាមុន បើបក្សសង្គ្រោះជាតិឈ្នះគឺមិនអីទេ តែបើបក្សនោះចាញ់ គឺច្បាស់ជាមានរឿងដូច្នេះហើយ ។ គេបានថ្លែងពីឆន្ទៈរបស់គេពិតប្រាកដមុនការបោះឆ្នោតទៅទៀត គឺគេបានធ្វើយុទ្ធនាការយ៉ាងសកម្ម ស្វាហាប់ ពុះកញ្ជ្រោលនៅតាមតំបន់ផ្សេងៗ បានសេចក្តីថា គេចង់ឈ្នះដោយអត់មានអ្នកណារំខានគេទេ នេះហើយសេរីភាពខ្លាំងណាស់ ។
ចំពោះគណបក្សប្រជាជន បានធ្លាក់កៅអីពី៩០មកដល់៦៨ ឯគណបក្សសង្គ្រោះជាតិគេបានកើនយ៉ាងច្រើន ។ ផ្ទុយទៅវិញ គេអត់ព្រមចូលរួមប្រជុំសភាទេ ទោះបីព្រះករុណាព្រះមហាក្សត្រ ព្រះអង្គទ្រង់កោះអញ្ជើញឱ្យចូលរួមប្រជុំយ៉ាងណាក៏ដោយ ។ រហូតមកដល់ពេលនេះ គណបក្សប្រជាជននៅតែបើកទ្វារចំហជានិច្ច ដើម្បីចរចាគ្នាអំពីកំណែទម្រង់ផ្សេងៗដែលគណបក្សសង្គ្រោះជាតិធ្វើការទាមទារនេះ ។
នៅពេលដែលគណបក្សសង្គ្រោះជាតិទាមទារ គឺគេធ្វើបាតុកម្ម ធ្វើជាច្រើនខែ ចំណែករាជរដ្ឋាភិបាលក៏អនុញ្ញាតដែរ ឱ្យតែបាតុកម្មនោះដោយសន្តិវិធី គោរពច្បាប់ មិនត្រឹមតែធ្វើបាតុកម្មបុ៉ណ្ណោះទេ បក្សប្រឆាំងគេហ៊ានរហូតបោះជំរំនៅទីលានប្រជាធិបតេយ្យរាប់សប្តាហ៍ទៀតដូចគេបានគ្រោងទុក ។ ក្នុងករណីនេះ រាជរដ្ឋាភិបាលក៏នៅតែអនុគ្រោះ ឱ្យតែគេគោរពច្បាប់ដោយសន្តិវិធី ហើយកុំឱ្យប៉ះពាល់សិទ្ធិអ្នកដទៃ ។
បុ៉ន្តែជាអកុសល បាតុកម្មនោះចេះតែបន្តទៅ ហើយរាជរដ្ឋាភិបាលចេះតែអនុញ្ញាតឱ្យគោរពតាមច្បាប់ដោយសន្តិវិធី ស្រាប់តែព្រឹត្តិការណ៍នៅថ្ងៃទី២ និងទី៣ មករា កន្លងមកនេះ ពួកគេឈានពីសន្តិវិធីទៅដល់ភាពហិង្សា បក្សប្រឆាំងឈានទៅដល់ការញុះញង់ បំផ្លិចបំផ្លាញទ្រព្យសម្បត្តិសាធារណៈ ទ្រព្យសម្បត្តិឯកជន ក្រុមហ៊ុន ផ្ទះប្រជាជននៅតាមដងផ្លូវ បានបង្កឱ្យមានការខូចខាត ។ មិនត្រឹមតែបុ៉ណ្ណោះ បក្សប្រឆាំងបានញុះញង់កម្មករ កម្មការិនីនៅធ្វើការតាមរោងចក្រនានាឱ្យមករួមចំណែកធ្វើអំពើហិង្សាផ្សេងៗ ។
ដូច្នេះអំពើទាំងនេះរាជរដ្ឋាភិបាលមិនអាចទទួលយកបានទេ ។ ត្រង់ចំណុចនេះលោកឧបនាយករដ្ឋមន្ត្រី ហោ ណាំហុង បានបង្ហាញច្បាប់នៃការធ្វើបាតុកម្មដល់លោក Hugo Swire នូវមាត្រាដែលអនុញ្ញាតដោយការគោរពច្បាប់ និងដោយសន្តិវិធី ។
បុ៉ន្តែត្រង់មាត្រាមួយមិនអនុញ្ញាតបានទេ គឺនៅពេលដែលបាតុកម្មនោះឈានទៅដល់អំពើហិង្សា បង្កឱ្យមានការខូចខាតទ្រព្យសម្បត្តិ ស្លាប់ជីវិតមនុស្ស គឺត្រូវតែផ្អាក ។ ដូច្នេះរាជរដ្ឋាភិបាលមិនបានបញ្ឈប់ឱ្យធ្វើទេ គ្រាន់តែផ្អាកដោយអនុវត្តទៅតាមច្បាប់ ព្រោះច្បាប់បានចែងថា បើបាតុកម្មប្រែក្លាយទៅជាអំពើហិង្សា គឺត្រូវតែផ្អាកសិន ។ ដូច្នោះនៅពេលនេះ គឺគ្រាន់តែផ្អាកទេ ផ្អាករហូតដល់ស្ថានការណ៍ទៅរកភាពប្រក្រតីឡើងវិញ គាត់នឹងអាចប្រើសិទ្ធិធ្វើបាតុកម្មបន្តទៀតនៅក្នុងក្របខណ្ឌច្បាប់ ។
ពាក់ព័ន្ធទៅនឹងការកែទម្រង់ផ្សេងៗរបស់គណបក្សសង្គ្រោះជាតិដែលលើកឡើង លោកឧបនាយករដ្ឋមន្ត្រី ហោ ណាំហុង មានប្រសាសន៍ថា យល់ស្របជានិច្ច តែសុំឱ្យពួកគេមានការកែទម្រង់នៅក្នុងសភា មិនមែនទាមទារឱ្យកែទម្រង់តាមរបៀបនៅតាមដងផ្លូវទេ ឱ្យចូលមកប្រជុំដើម្បីជជែកគ្នា… ព្រោះការកែទម្រង់ផ្សេងៗដូចជា ឱ្យមានការបោះឆ្នោតសាជាថ្មី ទាមទារឱ្យបោះឆ្នោតមុនអាណត្តិ… ទាំងនេះគឺតម្រូវឱ្យមានការកែរដ្ឋធម្មនុញ្ញ ។ ការកែរដ្ឋធម្មនុញ្ញគឺត្រូវមានការជជែកគ្នានៅក្នុងសភា មិនមែននៅតាមចិញ្ចើមថ្នល់ទេ ព្រោះច្បាប់នៅក្នុងរដ្ឋធម្មនុញ្ញមិនអាចរំលាយសភាមុន៥ឆ្នាំបានទេ ធ្វើម៉េចឱ្យចប់៥ឆ្នាំ ទើបអាចបោះឆ្នោតឡើងវិញបាន ។ បើទាមទារឱ្យមានការបោះឆ្នោតមុនអាណត្តិ ឬបោះឆ្នោតឡើងវិញនោះ គឺវាទាល់តែប្រជុំក្នុងសភាជជែកគ្នា ត្រូវកែរដ្ឋធម្មនុញ្ញ ត្រូវតែចូលសភាជជែកគ្នា ។
លោកឧបនាយករដ្ឋមន្ត្រីគូសបញ្ជាក់ថា ត្រូវចូលក្នុងសភាប្រជុំជជែកពិភាក្សា មិនមែនទៅស្រែកតាមចិញ្ចើមថ្នល់ទាមទារស្រេចតែចិត្តបានទេ ព្រោះត្រូវតែគោរពច្បាប់ទាំងអស់គ្នា ។ លោកអនុរដ្ឋមន្ត្រីការបរទេសចក្រភពអង់គ្លេស បានអញ្ជើញលោកឧបនាយករដ្ឋមន្ត្រី ហោ ណាំហុង ទៅប្រទេសអង់គ្លេសនៅពេលខាងមុខ ដើម្បីចូលរួមកិច្ចប្រជុំមួយដែលលោករដ្ឋមន្ត្រីការបរទេសអង់គ្លេសបានផ្តើមឱ្យមានកិច្ចប្រជុំមួយថ្នាក់ពិភពលោក មានប្រទេសប្រមាណ១៤០ ចូលរួមស្តីអំពីការបញ្ចប់អំពើហិង្សាផ្នែកផ្លូវភេទ ។ ជាការឆ្លើយតប លោកឧបនាយករដ្ឋមន្ត្រី សូមធ្វើការពិចារណាអំពីលទ្ធភាពនៃការចូលរួមនេះ ។
លោកអនុរដ្ឋមន្ត្រីការបរទេស និងជាសមាជិកសភាអង់គ្លេស លោក Hugo Swire បានមកដល់កម្ពុជានៅវេលាម៉ោង៦ល្ងាចថ្ងៃទី៣០ មករាកន្លងមកនេះ ដើម្បីផ្តើមដំណើរទស្សនកិច្ចរយៈពេល២ថ្ងៃនៅកម្ពុជា ។ តាមគម្រោងគឺចាប់ពីម៉ោង៩ព្រឹកថ្ងៃទី៣១ មករា លោកអនុរដ្ឋមន្ត្រីការបរទេស Hugo Swire នឹងជួបលោកឧបនាយករដ្ឋមន្ត្រី ហោ ណាំហុង រដ្ឋមន្ត្រីការបរទេសកម្ពុជា ។ នៅពេលបាយថ្ងៃត្រង់ជួបថ្នាក់ដឹកនាំគណបក្សសង្គ្រោះជាតិ ដឹកនាំដោយលោកកឹម សុខា ហើយនៅពេលរសៀលថ្ងៃទី៣១ មករា លោក Hugo Swire នឹងជួបជាមួយសម្តេចតេជោ នាយករដ្ឋមន្ត្រី ហ៊ុន សែន ។
កិច្ចប្រជុំដាច់ដោយឡែកពីគ្នារវាងថ្នាក់ដឹកនាំកំពូលនៃរាជរដ្ឋាភិបាល ដែលជាមេដឹកនាំគណបក្សប្រជាជនកម្ពុជា និងមេដឹកនាំគណបក្សសង្គ្រោះជាតិ ជាមួយអនុរដ្ឋមន្ត្រីការបរទេសអង់គ្លេស Hugo Swire នៅថ្ងៃទី៣១ មករា នឹងពិភាក្សាលើប្រធានបទរួម គឺស្ថានការណ៍នយោបាយនៅកម្ពុជាបច្ចុប្បន្នដែលមិនទាន់មានការស្រុះស្រួលគ្នានៅឡើយ ហើយបន្តអូសបន្លាយ ។
គណបក្សសង្គ្រោះជាតិ តាមរយៈអ្នកនាំពាក្យលោកយ៉ែម បុញ្ញឫទ្ធិ ត្រូវបានវិទ្យុបារាំងអន្តរជាតិដកស្រង់សម្តីថា ក្នុងជំនួបនាពេលបាយថ្ងៃត្រង់ចន្លោះពីម៉ោង១២ទៅម៉ោង១រសៀល ថ្ងៃទី៣១ មករា រវាងថ្នាក់ដឹកនាំគណបក្សសង្គ្រោះជាតិដឹកនាំដោយលោកកឹម សុខា ជាមួយលោកអនុរដ្ឋមន្ត្រីការបរទេសអង់គ្លេស គឺគណបក្សសង្គ្រោះជាតិគ្រោងនឹងលើកឡើងឱ្យរដ្ឋាភិបាលអង់គ្លេសបានដឹងពីការមិនគោរពសិទ្ធិមនុស្សនៅកម្ពុជា ការបង្ក្រាបបាតុកម្មរបស់កម្មករ និងប្រជាពលរដ្ឋដោយអំពើហិង្សា ការបិទសិទ្ធិសេរីភាពមិនឱ្យមានការជួបជុំ ការរំខានការធ្វើនយោបាយមិនស្មើមុខគ្នា និងការរំលោភដីធ្លី ដែលនៅតែបន្តកើតមាននាពេលថ្មីៗនេះដូចជា នៅខេត្តកោះកុង និងខេត្តរតនគិរីជាដើម ។
អំពីស្ថានការណ៍នយោបាយវិញត្រូវបានលោកយ៉ែម បុញ្ញឫទ្ធិ លើកឡើងថា អ្នកនយោបាយខ្មែរនិងខ្មែរអាចជជែកដោះស្រាយគ្នាបាន ដោយគ្រាន់តែមានសុច្ឆន្ទៈពិតប្រាកដ ។ រីឯការលើកឡើងរបស់គណបក្សសង្គ្រោះជាតិខាងលើ គ្រាន់តែចង់ជម្រាបជូនដល់រដ្ឋាភិបាលអង់គ្លេសឱ្យបានដឹងពីស្ថានការណ៍ពិតពីបញ្ហានយោបាយ និងបញ្ហាសង្គមនៅកម្ពុជាបុ៉ណ្ណោះ ។ បុ៉ន្តែសម្រាប់លោកកុយ គួង អ្នកនាំពាក្យក្រសួងការបរទេសថ្លែងថា ដំណើរទស្សនកិច្ច២ថ្ងៃនៅកម្ពុជារបស់អនុរដ្ឋមន្ត្រីការបរទេសអង់គ្លេស ជាដំណើរទស្សនកិច្ចដែលផ្តោតសំខាន់ដើម្បីជំរុញ និងពង្រឹងពង្រីកទំនាក់ទំនងសហប្រតិបត្តិការវាងរាជរដ្ឋាភិបាលកម្ពុជា និងចក្រភពអង់គ្លេស។
លោកកុយ គួង បញ្ជាក់ថា ស្ថានភាពនយោបាយនៅកម្ពុជា ដូចអ្វីដែលសម្តេចតេជោ ហ៊ុន សែន លើកឡើងរួចមកហើយ គឺកម្ពុជាមិនពឹងពាក់បរទេសឱ្យជួយដោះស្រាយទេ ។ ក្នុងនោះទាំងរាជរដ្ឋាភិបាល និងទាំងរដ្ឋសភានាពេលនេះដំណើរការជាប្រក្រតីគ្រប់ស្ថាប័នទាំងអស់ ព្រោះស្ថាប័នជាតិទាំងអស់នោះកើតឡើងដោយស្របច្បាប់ ដោយឆន្ទៈរាស្ត្រ ដូចតាមសំឡេងឆ្នោតបានបង្ហាញកាលពីខែកក្កដា ឆ្នាំ២០១៣ ៕
ចែករំលែកព័តមាននេះ