ខេត្តកំពង់ឆ្នាំង ៖ ក្មេងប្រុសស្រី៣នាក់បានស្លា.ប់បាត់បង់ជីវិតដោយសារផ្ទុះគ្រាប់កាំភ្លើងត្បាល់ប្រភេទ៦០មីល្លីម៉ែត្រមួយគ្រាប់ កាលពីវេលាម៉ោង១និង៣០នាទីរសៀលថ្ងៃទី៣០ មករា នៅចំណុចត្រពាំងត្រដោក ស្ថិតក្នុងភូមិពោធិ៍ ឃុំពោធិ៍ ស្រុកកំពង់លែង ខណៈក្មេងទាំង៣នាក់នោះទៅឃ្វាលគោ ហើយរើសយកគ្រាប់ពុំទាន់ផ្ទុះនោះមកដំលេង ។
ខេត្តកំពង់ឆ្នាំង ៖ ក្មេងប្រុសស្រី៣នាក់បានស្លាប់បាត់បង់ជីវិតដោយសារផ្ទុះគ្រាប់កាំភ្លើងត្បាល់ប្រភេទ៦០មីល្លីម៉ែត្រមួយគ្រាប់ កាលពីវេលាម៉ោង១និង៣០នាទីរសៀលថ្ងៃទី៣០ មករា នៅចំណុចត្រពាំងត្រដោក ស្ថិតក្នុងភូមិពោធិ៍ ឃុំពោធិ៍ ស្រុកកំពង់លែង ខណៈក្មេងទាំង៣នាក់នោះទៅឃ្វាលគោ ហើយរើសយកគ្រាប់ពុំទាន់ផ្ទុះនោះមកដំលេង ។
លោកប៉ាល់ ជឿន អធិការនគរបាលស្រុកកំពង់លែងបានឱ្យដឹងថា កុមាររងគ្រោះទាំង៣នាក់នេះមាន ១-ឈ្មោះ បឿន ចាន់ដេន ភេទប្រុស អាយុ១០ឆ្នាំ រស់នៅភូមិពាមទន្លា ឃុំកំពង់ហៅ ស្រុកកំពង់លែង ២-ឈ្មោះ នុត ធីតា ភេទស្រី អាយុ១២ឆ្នាំ និង៣-ឈ្មោះ នុត វណ្ណា ភេទប្រុស អាយុ៨ឆ្នាំ គេទាំង២នាក់ជាបងប្អូនបង្កើតនឹងគ្នា រស់នៅភូមិពោធិ៍ ឃុំពោធិ៍ ស្រុកកំពង់លែង ។ មុនពេលកើតហេតុ ពួកគេទាំង៣នាក់បានទៅឃ្វាលគោនៅចំណុចខាងលើ ហើយក៏បានរើសគ្រាប់កាំភ្លើងត្បាល់ប្រភេទ៦០មីល្លីម៉ែត្រ១គ្រាប់យកទៅដំលេង ក៏បណ្តាលឱ្យផ្ទុះស្លាប់២នាក់នៅកន្លែងកើតហេតុ និងម្នាក់ទៀតស្លាប់ពេលដឹកដល់មណ្ឌលសុខភាពស្រុកកំពង់លែង ។
ក្រោយពេលកើតហេតុ សមត្ថកិច្ចបានចុះទៅពិនិត្យទីកន្លែង ហើយរកឃើញគ្រាប់បេ៤០ចំនួន២គ្រាប់ និងគ្រាប់កាំភ្លើងត្បាល់ប្រភេទ៨០មីល្លីម៉ែត្រ១គ្រាប់ទៀតស្ថិតនៅកន្លែងកើតហេតុ ហើយបានរាយការណ៍ទៅមជ្ឈមណ្ឌលស៊ីម៉ាក់ឱ្យមកទទួលយក ។ មន្ត្រីសមត្ថកិច្ចឱ្យដឹងថា នៅចំណុចកើតហេតុជាសមរភូមិប្រយុទ្ធយ៉ាងខ្លាំងក្លាក្នុងជំនាន់សង្គ្រាមពីឆ្នាំ១៩៧៩ ដល់ឆ្នាំ១៩៩១។
ទោះជាយ៉ាងណា ការអប់រំអំពីគ្រាប់មីននិងគ្រាប់មិនទាន់ផ្ទុះហាក់នៅមានកម្រិត ហេតុនេះហើយឃាតករលាក់មុខនេះនៅតែឆក់យកជីវិតប្រជាពលរដ្ឋនៅទីជនបទជារឿយៗ ។ សពក្មេងរងគ្រោះទាំង៣នាក់ត្រូវបានសមត្ថកិច្ចប្រគល់ឱ្យក្រុមគ្រួសារយកទៅធ្វើបុណ្យតាមប្រពៃណីនៅតាមផ្ទះរៀងៗខ្លួន ក្រោមសម្រែកទ្រហោយំសោកស្តាយពីក្រុមគ្រួសារយ៉ាងក្រៃលែង ៕
ចែករំលែកព័តមាននេះ