ការនៅលីវផ្តល់អត្ថប្រយោជន៍ជាច្រើនដូចជា ផ្តល់សេរីភាព និងឱកាសក្នុងការផ្តោតស្មារតីលើការងារ ឬលើខ្លួនជាដើម ។ លើសពីនេះទៅទៀតការនៅលីវក៏ជួយឲ្យអ្នកសន្សំលុយបានច្រើនដែរ ព្រោះតែមូលហេតុខាងក្រោមនេះ ៖ ១. អ្មកមានពេលរកប្រាក់ចំណូលបន្ថែម…
ការនៅលីវផ្តល់អត្ថប្រយោជន៍ជាច្រើនដូចជា ផ្តល់សេរីភាព និងឱកាសក្នុងការផ្តោតស្មារតីលើការងារ ឬលើខ្លួនជាដើម ។ លើសពីនេះទៅទៀតការនៅលីវក៏ជួយឲ្យអ្នកសន្សំលុយបានច្រើនដែរ ព្រោះតែមូលហេតុខាងក្រោមនេះ ៖
១. អ្មកមានពេលរកប្រាក់ចំណូលបន្ថែម
ស្នេហាតម្រូវឲ្យមនុស្សប្រើពេលវេលា និងកម្លាំងច្រើន ដើម្បីមើលថែ និងការពារវាជាប្រចាំ ដែលមានន័យថា អ្នកត្រូវលះបង់ពេលទំនេររបស់អ្នកសម្រាប់ដៃគូអ្នកដូចជា កំដរគេទទួលទានអាហារ ឬដើរលេងជាមួយនឹងក្រុមគ្រួសារគេនៅថ្ងៃចុងសប្តាហ៍ជាដើម ។
ផ្ទុយមកវិញ អ្នកដែលនៅលីវមានសេរីភាពក្នុងការសម្រេចចិត្តថា ពួកគេចង់ចំណាយពេលទំនេររបស់ពួកគេដោយមិនមានសម្ពាធច្រើនដូចជា ការរកប្រាក់ចំណូលបន្ថែមជាដើម ។ អ្នកមានពេលក្នុងការធ្វើការថែមម៉ោង ឬរកប្រភពចំណូលផ្សេងទៀត ដើម្បីសម្រេចគោលដៅ របស់អ្នកបានកាន់តែឆាប់ ។
២. អ្នកមានលុយទុកវិនិយោគ
ពេលដែលអ្នកនៅលីវអ្នកមិនចាំបាច់ត្រូវព្រួយបារម្ភច្រើនពីមនុស្សម្នាក់ទៀតឡើយ ។ មានន័យថា អ្នកមិនចាំបាច់ត្រូវទិញអំណោយឲ្យគ្នា ឬចាយវាយថវិកា ដើម្បីចំណាយពេលវេលាជាមួយគ្នាជាដើម ។ លើសពីនេះទៅទៀត អ្នកមានសេរីភាពក្នុងការចាយវាយសន្សំលុយ និងវិនិយោគដែលជាចំណុចដ៏សំខាន់ដែលជួយឲ្យអ្នកអាចបង្កើនប្រាក់ចំណូលបាន ។
៣. អ្នកមិនមានសម្ពាធក្នុងការទុកលុយរៀបការ
ការរៀបអាពាហ៍ពិពាហ៍ គឺជាផ្នែកដ៏ធំមួយនៃគម្រោងរបស់គូស្នេហ៍ជាច្រើនរូប ហើយវាក៏ជាសម្ពាធធំមួយដែរ ជាពិសេសប្រសិនបើពួកគេមិនចង់ពឹងផ្អែកលើឪពុកម្តាយ ។ លើសពីនេះទៅទៀតការចំណាយលើការរៀបអាពាហ៍ពិពាហ៍ គឺមិនទាបឡើយ ។
ប្រសិនបើអ្នកនៅលីវ អ្នកមិនចាំបាច់ព្រួយបារម្ភច្រើនក្នុងការទុកលុយសម្រាប់អាពាហ៍ពិពាហ៍ទេ ។ ផ្ទុយមកវិញ អ្នកអាចយកលុយទាំងនោះទៅវិនិយោគ ឬបើកអាជីវកម្មផ្ទាល់ខ្លួន ឬយកមកអភិវឌ្ឍន៍ជំនាញ និងពង្រីកចំណេះដឹងរបស់ខ្លួនជាដើម ។
៤. ការចំណាយតិច
ទោះជាមនុស្សចូលចិត្តនិយាយថា លុយមិនសំខាន់ក្នុងស្នេហាពិតមែនក្តី លុយនៅតែជាកត្តាចាំបាច់មួយ ប្រសិនបើអ្នកចង់ថែរក្សាទំនាក់ទំនងរបស់អ្នកឲ្យកាន់តែរឹងមាំ ។ ក្រៅពីការចំណាយលើថ្លៃអាហារ ឬថ្លៃមើលកុននៅចុងសប្តាហ៍ហើយ អ្នកនៅលីវថែមទាំងអាចជៀសវាងការចាយវាយលុយនៅថ្ងៃបុណ្យពិសេសៗដូចជា បុណ្យនៃក្តីស្រលាញ់ ឬបុណ្យចូលឆ្នាំទៀតផង ៕ កែសម្រួលដោយ ៖ សុឃាក់
ចែករំលែកព័តមាននេះ