ខេត្តបាត់ដំបង ៖ ជនមិនស្គាល់មុខបានគាស់ផ្ទះប្រជាពលរដ្ឋចំនួន២កន្លែងក្បែរគ្នា រួចចូលលួចលុយនិងគ្រឿងអលង្ការអស់គ្មានសល់ ដែលគេសង្ស័យអាចកើតឡើងនៅចន្លោះពីម៉ោង៧ និង៣០នាទីទៅម៉ោង៨ព្រឹកថ្ងៃទី២២ កក្កដា នៅក្នុងភូមិរាមគន់ ឃុំគារ ស្រុកមោងឫស្សី ខណ:ដែលម្ចាស់ផ្ទះចេញទៅលក់ដូរនៅផ្សារផុតបន្តិច។ នេះបើតាមសេចក្ដីរាយការណ៍របស់សមត្ថកិច្ច។
សេចក្ដីរាយការណ៍បានឲ្យដឹងថា ជនរងគ្រោះទី១-ឈ្មោះណុប គឹមសេង ភេទប្រុស អាយុ៣៦ឆ្នាំ មានមុខរបរលក់មាន់ និងជនរងគ្រោះទី២-ឈ្មោះម៉ុច ម៉ាប់ ភេទស្រី អាយុ៧៦ឆ្នាំ មានមុខរបរលក់ដូរនៅផ្សារមោងប្ញស្សី និងត្រូវជាម្ដាយជនរងគ្រោះទី១ ដែលរស់នៅផ្ទះក្បែរគ្នាក្នុងភូមិ-ឃុំកើតហេតុខាងលើ។
សមត្ថកិច្ចបាននិយាយថា ជនសង្ស័យអាចមានបក្សពួកយ៉ាងតិច២នាក់ ហើយហាក់បានធ្វើសកម្មភាពព្រមៗគ្នា ក្រោយពេលម្ចាស់ផ្ទះទាំង២បិទទ្វារ រួចនាំគ្នាចេញទៅលក់ដូរនៅផ្សារផុតបន្តិច។ ប៉ុន្តែក្រោយពីជនរងគ្រោះទៅដល់ផ្សារមួយភ្លេតត្រឡប់មកវិញក៏មានការភ្ញាក់ផ្អើលតែម្ដង ដោយសារឃើញស្នាមចោរគាស់ផ្ទះនិងបាត់ទ្រព្យសម្បត្តិ។
ជាមួយគ្នានេះ បើតាមរបាយការណ៏បឋមដែលជនរងគ្រោះម្ដាយនិងកូនបានរាយការណ៏ប្រាប់សមត្ថកិច្ច គឺជនរងគ្រោះណុប គឹមសេង បានបាត់បង់ទ្រព្យសម្បត្តិរួមមាន ប្រាក់ខ្មែរចំនួន១១លានរៀល, ប្រាក់ថៃចំនួន១ម៉ឺនបាត និង គ្រឿងអល័ង្ការមាន ខ្សែកមាសចំនួន១ដំឡឹង, ក្រវឹលមាសចំនួន១ជី, ខ្សែដៃមាសចំនួន៥ជី និងកងដៃប្លាទីនចំនួន១ជី។ ដោយឡែក ជនរងគ្រោះឈ្មោះម៉ុច ម៉ាប់ បានបាត់បង់ប្រាក់ខ្មែរចំនួន២លានរៀល, ខ្សែកមាស១ខ្សែ មានទម្ងន់១,៥តម្លឹង និង ខ្សែដៃមាស១ខ្សែទម្ងន់១,៥តម្លឹង។
ពាក់ព័ន្ធនឹងករណីនេះ សមត្ថកិច្ចនូវមិនទាន់ធ្វើការសន្និដ្ឋានជាក់លាក់អំពីសកម្មភាពគាស់ទម្លុះទម្លាយនៅឡើយទេ តែបើតាមការពិនិត្យនិងការបង្ហាញពីម្ចាស់ផ្ទះ គឺក្រុមជនល្មើសបានគាស់ទម្លុះក្តារបាតផ្ទះ រួចឡើងទៅខាងលើរើកកាយទូរលួចទ្រព្យសម្បត្តិតែម្ដង ។
សមត្ថកិច្ចនិយាយដែរថា បើតាមពេលវេលានៃការធ្វើសកម្មភាពរបស់ក្រុមជនល្មើសនេះគឺបានធ្វើព្រមៗនៅផ្ទះទាំង២ក្នុងរយ:ពេលខ្លី។ ពួកចោរទំនងជាបានតាមឃ្លាំមើលសកម្មភាពចេញចូលរបស់ជនរងគ្រោះជាប្រចាំ ទើបពេលម្ចាស់ផ្ទះបិតទ្វារចេញផុតបន្តិចពួកគេធ្វើសកម្មភាពភ្លាមៗតែម្ដង។
ទោះយ៉ាងណាសមត្ថកិច្ចហាក់មិនបាននិយាយអំពីការកំណត់មុខសញ្ញាក្រុមចោរដៃឆើតទាំងនេះនៅឡើយទេ ហើយក៏មិនទាន់ហ៊ានប៉ាន់ប្រមាណពីចំនួនជនលកមើសនៅឡើយដែរ ដោយគ្រាន់តែវាយតំលៃជាបឋមថា ក្រុមចោរអាចមានបក្សពួកយ៉ាងតិចចំនួន២នាក់ ។ ពេលនេះ មន្ត្រីជំនាញបានត្រិមតែទទូលចម្លើយបំភ្លឺពីជនរងគ្រោះម្ដាយនិងកូនតែប៉ុណ្ណោះ រីឯមុខសញ្ញាជនសង្ស័យហាក់ដូចគ្មានតម្រុយបន្តិចឡើយ តែយ៉ាងមន្ត្រីជំនាញកំពុងដុតដៃដុតជើងដើម្បីធ្វើការស៊ើបអង្កេតហើយ៕ (សម្រួលដោយ៖ ស្រីណា)
ចែករំលែកព័តមាននេះ