វិស័យសារព័ត៌មានកម្ពុជាកំពុងវិវឌ្ឍន៍ទៅមុខលើយុវវ័យបន្តវេន…
- ភ្នំពេញ
រាជធានីភ្នំពេញ ៖ លោក ខៀវ កាញារីទ្ធ រដ្ឋមន្ត្រីក្រសួងព័ត៌មាន កាលពីព្រឹកថ្ងៃទី២០ កក្កដា បានអនុញ្ញាតឲ្យលោកស្រី សុផាត់ត្រា…
រាជធានីភ្នំពេញ ៖ លោក ខៀវ កាញារីទ្ធ រដ្ឋមន្ត្រីក្រសួងព័ត៌មាន កាលពីព្រឹកថ្ងៃទី២០ កក្កដា បានអនុញ្ញាតឲ្យលោកស្រី សុផាត់ត្រា គោសៃយៈកានុន (Supatra Kosaiyakanont) នាយិកាសាកលវិទ្យាល័យ និងជាសាស្ត្រាចារ្យជំនួយ Rajamangala University of Technology Phra Nakhon (RMUTP) ចូលជួបសម្តែងការគួរសមនៅទីស្តីការក្រសួង ។
ប្រតិភូប្រទេសថៃ បានបញ្ជាក់អំពីការចុះធ្វើទស្សនសិក្សាលើវិស័យព័ត៌មាននៅស្ថានីយ ទូរទស្សន៍ប៉ុស្តិ៍លេខ៥ និងទីចាត់ការកាសែតភ្នំពេញប៉ុស្តិ៍នៅរាជធានីភ្នំពេញ កាលពីល្ងាចថ្ងៃទី១៩ ខែកក្កដា ឆ្នាំ២០១៩ ។ ប្រតិភូបានលើកឡើងថា វិស័យសារព័ត៌មាននៅប្រទេសកម្ពុជាកំពុងតែវិវឌ្ឍន៍ទៅមុខប្រកបដោយវិជ្ជាជីវៈត្រឹមត្រូវ និងមានក្រមសីលធម៌ច្បាស់លាស់ សំខាន់គុណភាពដែលកំពុងកើតមាន គឹនៅលើយុវវ័យបន្តវេន ។ ខាងភាគីថៃ សូមស្វាគមន៍ជានិច្ចក្នុងការជួយបណ្តុះបណ្តាល ពង្រឹងបន្ថែមទៀត នៅពេលកម្ពុជាត្រូវការ ។
លោករដ្ឋមន្ត្រី ខៀវ កាញារីទ្ធ បានឆ្លើយតបវិញថា ក្មេងៗស្រករក្រោយនៅកម្ពុជា កំពុងទទួលយកបាន
នូវការបណ្តុះបណ្តាលដែលមានគុណភាពលើវិស័យព័ត៌មានប្រកបដោយក្រមសីលធម៌ពិតប្រាកដ តែភាគច្រើនទទួលបានចំណេះហើយ ច្រើនតែទៅធ្វើការឲ្យអង្កការអន្តរជាតិឬឯកជន ដែលទទួលបានប្រាក់ខែច្រើន និងមានតែប្រមាណ៣០%ប៉ុណ្ណោះដែលស្ម័គ្រចិត្តជួយធ្វើការបម្រើរដ្ឋ ។ ចំពោះការកែទម្រង់របស់រដ្ឋបង្កើតឲ្យមានច្រកចេញចូលតែមួយគ្រប់ខេត្ត ក្រុង និងគ្រប់ទីកន្លែងផងនោះ ក៏កំពុងត្រូវការមន្ត្រីព័ត៌មានសម្រាប់ជួយសម្រួលរឿងនេះផងដែរ ។
លោករដ្ឋមន្ត្រីថ្លែងទៀតថា អ្នកកាសែតថៃ គោរពបានវិន័យ ក្រមសីលធម៌វិជ្ជាជីវៈសារព័ត៌មានបានល្អ មានអំណាចប្រៀបដូចសត្វខ្លាដែលធំរឹងមាំ មានចង្កូមមុតស្រួច តែបើអ្នកកាសែតនៅកម្ពុជាប្រៀបដូចសត្វខ្លាស្គម ដែលគ្មានក្រចកគ្មានធ្មេញ ព្រោះតែគោរពមិនទាន់បានល្អផ្នែកក្រមសីលធម៌ និងវិជ្ជាជីវៈរបស់ខ្លួន ។
ចំពោះច្បាប់អនុញ្ញាតឲ្យបើកកាសែតគឺមានរហូតដល់ទៅ៧០០អង្គភាព តែពេលដំណើរការផ្សព្វផ្សាយជាប្រចាំមិនដល់៥០ផង ដែលមានផ្សាយ ប្រចាំថ្ងៃ និងយូរៗម្តង ។ ចំពោះវិទ្យុ ទូរទស្សន៍ និងកាសែត ត្រូវបានបង្កើតឲ្យមានបន្ថែម ទៀតតាមប្រព័ន្ធបច្ចេកវិទ្យា (អនឡាញ) ព្រោះវិស័យពាណិជ្ជកម្មបានធ្លាក់ចុះ។
ក្នុងឱកាសនោះ លោកស្រី សុផាត់ត្រា គោសៃយៈកានុន បានយល់ព្រមទទួលយកការជួយបណ្តុះបណ្តាលបន្ថែមទៀតដល់កម្ពុជា ព្រមទាំងអាហារូបករណ៍មួយចំនួនបន្ថែមទៀតផងដែរដើម្បីយកមកប្រើប្រាស់តាមតម្រូវការ ៕ (សម្រួលដោយ៖ ស្រីណា)
ចែករំលែកព័តមាននេះ